1 Makabhewu 7
7
Bhakidhe ni Alisimo tigoni ga Judha
(2 Makabhewu 14:1-16; 15:1-39)
1Khu mwaga nya lizana ni livbandre magumi na moyo (151), Dhemetriyo mwamana wa Selewuko, khugide khu Roma gumogo ni vathu vaye, a ta tshegema siwoni nya lidhoropa li guromo vbafuvbi ni yiphwa, a gu dzi gira mufumeli. 2Avbo a nga belago nyumbani nya wufumu wa vababe vaye, masotshwa ma di hunga Antiyoko ni Lisiya, gasi guya va ningela ga mufumeli. 3Aholu mufumeli a di dziti, a ganela, khuye: “Kha nyi vbweti gu va wona dzikhovbe dzawe.” 4Khavbo avbo, masotshwa ma diya va songa. Kharato, Dhemetriyo a di khala vbagikhalotunu nya wufumu waye. 5Va na Israyeli vatshavbo va nga dangago Nayo ni guvivbedwa khu monyo, va diya dzi pata gwaye, na va gu thangedwa khu Alisimo a nga bani a suva gu girwa muphasi nya khongolo nya mhamba. 6Avo va di thuledza gidzemo mbeli ga mufumeli, khavo: “Judha ni vandriyaye, va songetede dzipari dzago dzatshavbo, bwelo khavbo va hi tutumisa tigoni gwathu. 7Olu, uwe mufumeli, hi ngu gu lomba u rumela mwama moyo nya gu mu tumbe ata wona khu maho tshanisa nya yikhongolo hi gu nayo ethu gumogo ni litigo latshavbo la mufumeli, gasi gu va ninga tsayiso yi va yelago avo gumogo ni vatshavbo nya tsawa wawe.”
8Mufumeli a di hatha Bhakidhe, moyo nya dzipari dzaye, mwamangulu wa gipandre gya khisikheyi nya tsongo, moyo nya madhota nya makhongolo nya mufumo, pari nya gutumbege ya mufumeli. 9A mu rumede gumogo ni Alisimo, mwama nya guvivbedwe khu monyo a nga mu pharisago thumo nya wuphasi nya mhamba, a gu mu ninga nayo nya guphodze ga sanana sa Israyeli. 10Khu guralo, va di bela ndzilani, va gu vboha tigoni ga Judheya na vari ni talo nya masotshwa nya tshivba. Bhakidhe a di rumela myango ga Judha ni vandriyaye, gasi guya va senga khu magana nya gurule. 11Aholu, avo kha va nga khodwa ga magana yaye, kholu va di tiviswa gupwani va vbohide na vari ni talo nya masotshwa nya tshivba. 12Tsawa nya vahevbudzi nya nayo wu di hidzimela nuwo ga Alisimo ni Bhakidhe, gasi guya lomba gulamudwa. 13Vahaseti khavo nya guphele ga sanana sa Israyeli guya va lomba gurula, 14kholu va di pimisa gukhavo: “Muphasi nya mhamba nya gyanana gya Aroni a vbohidego ni masotshwa, kha na hi girela guvivba.” 15Alisimo a di ganela navo mahungu nya gurule, a gu sambanya gwawe, khuye: “Kha nyi na gira guvivba ga enu mwendro ga dzipari dzanu.” 16Avo va di khodwa ga magana yaye, aholu uye a di hunga livbandre na limwedo magumi nya avo, a gu ruma gu va songwe litshigu lolo la limwedo gukhedza khu magana ma lovidwego, pwani: 17“Sirumbi sa va nya guaga vago ni novba wawe si swayedwe bambe ga Jerusalema, gumwalo muthu nya gu va dzinge.” 18Khavbo avbo, vathu vatshavbo va di tala khu hwanga ni rerema, kholu va di khavo: “Ava vathu va mwalo lisine, gambe va mwalo gululama, kholu va kavide gidzumeledzwano ni gisambanyo va nga girago.” 19Bhakidhe a di duga Jerusalema a gu ya ghova Bheti-Suri; a diya hunga vama nya vangi va nga dzi pambula va gu duga tsawani nya masotshwa yaye ni vambe vathu nya gidzemo, a ruma gukhuye va songwe va rinywa namboni nya wukhongolo. 20A di ningela wufumu nya litigo ga Alisimo, a mu tshiya ni tsawa nya masotshwa gasi gu mu phasedza. Khavbo avbo, Bhakidhe a di bwelela ga mufumeli.
21Alisimo a di hengula khu tshivba nya matshari fanelo nya gukhale uye muphasi nya khongolo nya mhamba. 22Vatshavbo va golago gu wusa pfilupfilu vbakari nya vathu, va diya dzi pata gwaye, va mu phasa gu wandra litigo la Judheya, va gu gira ndrwadza nya yikhongolo ngudzu tigoni ga Israyeli. 23Judha khu gu wona gukhuye guvivba gu girwago khu Alisimo ni gikwata gyaye ga sanana sa Israyeli, guvbindra ugo gu nga girwago khu va nya mayigo, 24a di bela ndzilani a gu tsemakanya litigo latshavbo la Judheya kala mivbinganoni gwaye, a tsayisa va nya gu dzi pambula, a va himbedzela gu gimbilagimbila tigoni.
Judha a ngu pala Nikanori
(2 Makabhewu 14:5-36)
25Alisimo na wone nya gukhuye Judha ni gikwata gyaye, va na ni tshivba ngudzu gu mu vbindra, ni gukhuye gima kha na mu tiyela gu dwana naye, a di bwelela ga mufumeli aya va thuledza, a va singedza guvivba gwatshavbo nya guthise. 26Khavbo avbo, mufumeli a di rumela Nikanori, moyo nya muthangeli waye nya nyimbi nya guthavisege ngudzu, a nga bani ari ni likhulo ni wulala ga va na Israyeli, a mu ninga nayo nya guvbedze vathu vatshavbo.
27Nikanori a dita Jerusalema nari ni talo nya mabutho nya nyimbi, a gu rumela myango ga Judha ni vandriyaye, gasi guya va senga khu magana yaya nya gurule, khuye: 28“Gu nga dwanwi litunga ga enu ni ethu. Nyi nata ni vama nya vadugwane gasi hi ta manana khu gurula.” 29Khu guralo, a dita va ta losana khu gurula va vavili, aholu masotshwa yaye ma di gu dzi dongisela gasi gu hunga Judha. 30Aholu, Judha na gu dziti gukhuye mwama wule a guta gasi guta mu senga, a di khala hwanga, a gu ndreya hwindzo ni Nikanori nyamba dzina gambe ni gu mu wona khovbe yaye. 31Nikanori khu gu wona nya gukhuye gikungo gyaye gi tugudwe, a di duga aya dhumela Judha, vbafuvbi ni Kafarisalama. 32Va difa livbandre mazana vama (500) nya nyimbi ya Nikanori, avo va nga vbulugago va di thavela Dhoropani ga Dhavhidhe. 33Hwane nya litunga, Nikanori a di gwela gigomoni gya Siyoni, vaphasi nya mhamba va di duga khu Nyumbani ga Nungungulu ni madhota nya litigo, gasi gu mu losa khu gurula ni gu mu nonedza miphaso nya guvbiswe va nga ningelago khu gu alakanya mufumeli. 34Aholu, uye a di va vala, a va hembulula ni gu va hega, a di ganela navo khu linyenyo; 35na tade khu likhulo a di sambanya, khuye: “Judha ni masotshwa yaye va gumba ningedwa furi olu mandzani gwangu, guvbelani nya nyimbi, nyi na wuya gasi guta vbisa nyumba yeyi.” Khu vbale, a di khuga na tade khu likhulo. 36Vaphasi nya mhamba va di bela gambe nyumbani, na va emide mbeli nya giluvelo ni mbeli nya Nyumba ya Nungungulu, va di rana, khavo:
37“Khuwe u hathidego nyumba yeyi gasi li rungudzwe umo lina lago nya guage, gasi gu khala nyumba nya miphaso ni milombelo ya vathu vago. 38Phodza ga mwama yoyu ni masotshwa yaye, va gire va songwe khu matshari. Alakanya sihembululo sawe, u nga va digi va vbuluga.”
Gupadwa ni gufa ga Nikanori
(2 Makabhewu 15:1-36)
39Nikanori a di khuga khu Jerusalema aya zumba Bheti-Horoni, iyo masotshwa ya Siriya ma nga ya patanago naye. 40Judha a di ya zumba Adhasa ni magumararu mazana (3.000) vama, a gu gira nombelo khu magana yaya, khuye: 41“Pfhumu, gikhati sirumwa sa mufumeli si ngata ganela magana nya guhembulule, ngilozi yago yi di wonega yi ta songa lizana ni livbandre na mararu ni livbandre magumi mazana (185.000) vathu vawe. 42Gira idzosaye muhuno, u mbembisa mahoni gwathu, libutho leli nya masotshwa; gasi vatshavbo va dziti nya gukhawe Nikanori vade nyumba yago nya miphaso, uwe mu lamule gukhedza khu guvivba nya monyo waye.”
43Li di dwanwa litunga khu litshigu nya likhumi na mararu nya ngima nya Adhari, li padwa libutho la Nikanori. Khuye muthu nya guphele gu songwa litungani. 44Avbo masotshwa yaye ma nga wonago nya gukhavo Nikanori thegide, ma di dzudzuga matshari ma tutuma ma thava. 45Vajudha va di ma lundra litshigu rumba, gukhugela Adhasa kala Gezeri, na va gu womba mipundru gasi gu tivisa vakwawe. 46Khavbo avbo, va di duga vavbanyi va dzindrangani dzatshavbo dza Judheya ni mayigwana ya vbafuvbi, va khinga avo va nga bani va gu thava, va va randrela, avo va di dwana navo va va songetela vatshavbo khu matshari, nyamba tshala ni moyo basi wawe. 47Vajudha va di phanga silo sawe. Va di pila hungo wa Nikanori ni mandza ya nyamudye, mandza a nga bani a gu ma khusedza khu matshandza, va ma vbayega mbeli ga vatshavbo vbafuvbi ni Jerusalema. 48Vathu va di nengela ngudzu, va gu vbedza litshigu lile na va gu tsaka ni gu ghiya. 49Va di vega nayo nya gualakanye litshigu lolo mwaga ni mwaga khu litshigu nya likhumi na mararu nya ngima nya Adhari. 50Guvbelani nya esi, litigo la Judheya, li di wona gurula ni gutangala khu gikhati nya gukari.
Currently Selected:
1 Makabhewu 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.