1 Makabhewu 5
5
Judha a ngu dwanisa mayigo nya vaakelane
(2 Makabhewu 10:14-33; 12:10-31,32-45)
1Avbo mayigo nya vaakelane va pwidego gupwani giluvelo gi wusedzidwe ni gu vbahedzwa Nyumba ya Nungungulu kha nga idzo yi nga bani yi romo khidzo khu gale, va di goroga ngudzu.#5:1 Gasi gu tshula nya lisine vathu va na Israyeli ni nayo, kha gu eneli basi gu vbahedza nyumba ya Nungungulu ni gu wusedza giluvelo. Gu di vbwetega gambe gu tshula va na Israyeli vale va vbanyago mayigoni ya vbafuvbi, aholu va digidego nayo nya tumbunugo wa Vajudha khu gu gurumedzwa gu landra tumbunugo wa va nya mayigo. 2Va di hunga gikungo nya guvbedze khu gu songetela sanana satshavbo sa Jakobe si nga bani si gu vbanya vbakari gwawe, va di phela gu songetela ni gu fuvisa vathu vbakari nya gidzemo. 3Judha a di ya dhumela sanana sa Esawu, tigoni gwa Idhumeya vbafuvbi ni wulanga wu ranwago pwani Akarabhata kholu si di gu tshanisa va na Israyeli. A di va pala, a va tshonigisa, a gu phanga dzithomba dzawe.
4A di alakanya guvivba ga sanana sa Bheyani, si nga bani siri naphwi ni mhango ga vathu vaye kholu va di sihala, va gu siyamela khu dzindzilani. 5A di va gurumedza gu thavela makhokholani gwawe, a gu va randrela, a va mbembisa ni gu vbisa makhokhola ma tsagama gumogo ni vathu vatshavbo va nga bani vari ndrani gakone.
6Khu vbale, a di wugela Vaamoni. Avbovbo, a di ya mana vadwani nya nyimbi nya tshivba, ni talo nya wukhongolo nya vathu na va gu thangedwa khu Thimoti. 7A di dwana navo mayunga nya mangi kala a va pala khu gu va sasela havo bhi. 8A di wandra lidhoropa la Jazeri gumogo ni mayigwana yaye, a vbedza a gu bwelela Judheya.
Gutshudwa ga Vajudha va Galileya
9Mayigo ya Gileyadhi ma di pwanana ma gu hunga gimbuti nya guwugele va na Israyeli va nga bani va gu vbanya mayigoni gwawe, va fela gu va mbembisa, aholu avo va di thavela likhokholani la Dhatema. 10Va di rumela lidangalila ga Judha ni vandriyaye, ni mahungu yaya, ma gukhayo: “Mayigo ma hi randredego ma patanide ma hi wugela, ma gu vbweta gu hi mbembisa. 11Ma gu dzi dongisela gasi guta wandra likhokhola hi thavedego umo. Thimoti khuye a thangelago dzinyimbi dzawe. 12Khu guralo, vbiredza u ta hi vbulugisa gu songwa khu mandza yawe, kholu nya vangi va na gyathu va songidwe. 13Va songetede vandriyathu vatshavbo va nga bani va vbanya tigoni ga Tobhi, va dzegide vagadzi vawe, ni sanana sawe gumogo ni dzithomba dzawe. Avo va fudego wulanga wule va ngu ningana gipimo nya likhumi mazana (1.000) vama.”
14Va di nga tshanganide gasi gu hevbula lidangalila lolo, gikhati va vbohidego vambe vathu va Galileya na va pferulede guambala va resa lidangalila li ganelago khu mahungu ya mamowo, 15va ganela, khavo: “Mayigo ya Pitolomayidha, ya Sidhoni, ya Tiro ni Galileya gwatshavbo ma patanide ma hi wugela, gasi gu hi mbembisa.”
16Avbo Judha ni vathu va Israyeli va pwidego mahungu yaya, va di ramba tshangano nya wukhongolo, gasi gu hevbula ginani va fanedego gu gira, gasi guya phasedza vandruye va guromo gutshanisekani khu gu dhumedwa khu va nya mayigo. 17Khavbo avbo, Judha a di embela ndriyaye Simoni, khuye: Hatha vama u ya tshula vandriyago va Galileya, aholu eni, gumogo ni ndriyangu Jonatane, hi na hongola tigoni ga Gileyadhi. 18Gasi gu vhikela litigo la Judheya a di tshiya Josefa, mwamana wa Zakariya, ni Azariya, muthangeli nya gidzemo, gasi gu thangela dzinyimbi dzi tshadego. 19A di va ninga nayo yoyu, khuye: “Fumelani vathu vava, aholu mu nga dzi bedzi mayungani ni va nya mayigo kala hi gu wuya ethu.”
20Simoni a di dzega magumararu mazana (3.000) vama a gu hongola Galileya. Judha a di dzega livbandre na mararu magumi mazana (8000) vama gasi guya dwana tigoni ga Gileyadhi. 21Simoni a di duga a gu hongola Galileya, hwane nya gudwane dzinyimbi nya dzingi ni va nya mayigo, a di va pala, 22a di va lundra kala dzinyangwani nya lidhoropa la Pitolomayidha. Va fude gipimo nya magumararu mazana va nya mayigo, a gu phanga dzithomba dzawe. 23Khavbo avbo, Simoni, khu gunengela nya gukhongolo ngudzu, a di dzega Vajudha va nga bani va vbanya Galileya ni Aribhata gumogo ni vagadzi vawe, ni sanana ni silo sawe satshavbo a gu hongola navo Judheya.
24Judha Makabhewu gumogo ni ndriyaye Jonatane va di tsemakanya tsongo wa Joridhani, va gu gimbila matshigu mararu giwulani. 25Va di ya mana Vanabheti va nga va hakhago gwadi khu gurula, va gu va embeledzela satshavbo iso si dugeledego vandriyawe tigoni ga Gileyadhi, 26ni gukhavo nya vangi vawe va randredwe, va girwa sibotshwa madhoropani ga Bhosira ni Bhosori, ni Alema, ni Kasifo ni tigoni ga Makedi ni Karinayimi, madhoropa yayo yatshavbo nya makhongolo ma vhikedwego khu mabhiyo. 27Va di engedza gambe khavo, vomo gambe va giridwego sibotshwa ga mambe madhoropa ya Gileyadhi. Valala va ngu dzi dongisela gasi mindru avba gugyago, va dhumela madhoropa yoyo, gasi va fela gu mbembisa Vajudha vatshavbo khu litshigu limwedo. 28Khu guvbiredza, Judha a di dzegela gu thendregedza a bela khu yimbe ndzila, a tsemakanya giwula gumogo ni vathu vaye, gasi gu vboha Bhosira khu githugedza, nyamba tidwa. A di wandra lidhoropa a gu ruma gu songwa vama vatshavbo, a gu phanga dzithomba dzawe, a hegisa a rotha lidhoropa. 29Ni wutshigu wowo furi a di vbindra a gu hongola likhokholatunu. 30Na guya gugyani, masotshwa yaye ma di khusa maho ma khedzisa, ma di wona mwandra nyambana tengo na vari ni sigandro ni satshavbo si vbwetegago gasi gu dhumela likhokhola, va di phede gu randrela avo va nga bani va giridwe sibotshwa. 31Judha a di dziti nya gukhuye litunga li phede, ni gupwa dzihuwa dza dhoropani, dzi nga bani dzi gu gwela kala ndzadzini, ni gukwangula khu tshivba, ni gudzuma nya mipundru, ni ligwaha nya tshivba nya vathu, 32a di embela masotshwa yaye, khuye: “Muhuno dwanelani vandriyanu.” 33A di va kabanisa khu sikwata siraru, va dhumela valala khu hwane na va gu womba mipundru, ni gu kwangula khu tshivba va rana Nungungulu khu nombelo. 34Vbakari nya dzinyimbi dza Thimoti, gu di pwala mahungu nya gupwani Makabhewu vbohide, va di thava vatshavbo va tutuma mbeli gwaye; Makabhewu a di va sasela, gu thega litshigu lolo gipimo nya livbandre na mararu magumi mazana (8000) vama.
35Khu hwane, Judha a di simama guya mbeli, a guya dhumela Alema, gu dwanwa litunga a va pala, a gu wandra lidhoropa. A di songa vama vatshavbo, a phanga dzithomba dzawe, a rotha lidhoropa khu nilo. 36Gukhuga gwaye khu vbale a di vbindra, aya dhumela Kasifo, ni Mekadi, ni Bhosori ni mambe madhoropa ya Gileyadhi, a ma wandra. 37Khu hwane nya satshavbo sesi, Thimoti a di tshanganisa gambe dzimbe dzinyimbi, aya zumba vbafuvbi ni Rafoni, khisikheyi nya tsongo. 38Judha a di ruma guya sola lizumbo, va wuya vata mu embela, khavo: “Mayigo yatshavbo nya vaakelane vathu, ma pwanane ma gira libutho nya likhongolo nya tshivba, gasi gu hi wugela. 39Gu diga nya isoso, va rengelede nya vangi va Arabhiya khu dzitsapawu gasi vata ghova khisikheyi nya tsongo. Olu womo va dongisela gu tsemakanya tsongo gasi guta hi dhumela.” Judha a di va yela ava khinga. 40Thimoti a di ninga sileletelo ga vathangeli nya dzinyimbi dzaye, khuye: “A gu kala Judha a phela khuye a tshatuga tsongo a hi tela ata hi dhumela, gima kha hi na mu tiyela, kholu a na hi pala nyamba garadzega. 41Aholu a gu khala hwanga gu tshatuga tsongo, a gu zumba khisikheyi nya tsongo, ethu hi na tshatuga, hi mu yela hiya mu dhumela, hi na mu pala.” 42Aholu, me ni gu vboha tsongoni, Judha a di sasamedzela dzindruna#5:42 dzindruna, vambe khavo valovi. nya nyimbi bambe nya tsongo, a va laya, khuye: “Mu nga dzumedzisi muthu guta ema avba, aholu vatshavbo va na hongole vaya dwana.” 43Uye khuye a nga phela khuye a tshatuga, khu hwane gu landrela vathu vatshavbo va nya mayigo va di padwa, va gu dzudzuga matshari yawe, va tutuma va thavela nyumbani nya nombelo ya Karinayimi. 44Aholu vama va Judha, va di wandra lidhoropa, va gu rotha khu nilo nyumba nya nombelo ni vatshavbo va nga bani na vari umo. Karinayimi gu di randredwa nyamba kodza gu dzi vhikela ga Judha. 45Khavbo avbo, Judha a di ramba va na Israyeli vatshavbo va nga bani na va guvbanya tigoni ga Gileyadhi, gukhugela oyu nya dugwane wakone kala oyu nya khongolo, vanyamayi ni sanana ni dzithomba dzawe, gidzemo nyambana tengo gasi a va yisa tigoni ga Judheya. 46Va di gimbila kala vaya vboha Efroni, lidhoropa nya likhongolo li bhiyidwego gwadi, li gu romo ndzilani gwawe. Gu di si kodzegi gu li dzuwuluga khu nyambade mwendro khu nyamudye, gu di lomba gu li tsemakanya khu vbakari. 47Vavbanyi va dhoropani va di dzi khothela ndrani va tshika myanya khu siwindri gasi gu himbedzela guvbindra va na Israyeli. Judha a di va rumela myango ni magana nya gurule a va embela, khuye: 48“Ha gu vbweta guvbindra khu tigoni gwanu, hiya tigoni gwathu, mwalo a na gu mi girelago guvivba; ha gu vbweta basi ndzila nya gu tsemakanye khu mawundru.” Aholu avo kha va nga dzumela gu va tulela ndzila. 49Khavbo avbo, Judha a di tivisa masotshwa yaye yatshavbo gukhuye moyo ni moyo a eme avbo a guromo a dzi dongisela gu dwana. 50Vama vatshavbo nya nyimbi, moyo ni moyo khavbo a nga bani vari avbo, va di dwana, va gu tsaramisana ni lidhoropa litshigu latshavbo ni wutshigu watshavbo, kala li gu rereka li thegela mandzani gwawe. 51Judha a di songa vama vatshavbo khu litshari, a gu khungumulela lidhoropa, a phanga dzithomba, va tsemakanya lidhoropa khu vbatshani nya sirumbi. 52Na va tshatugide tsongo wa Joridhani, va di vboha panini nya gukhongolo, mbeli ga Bheti-Kani. 53Judha a nga bani a tshade khu hwane, a di si garali khu gu hetedzela avo va nga bani vari hwane ni gu tiyisela vathu, kala va gu vboha tigoni ga Judheya. 54Va di gwela gigomo gya Siyoni khu gutsaka ni gunengela va gu ningela dzimhamba nya miphaso nya guvbiswe, kholu va widego gwadi khu mawundru ni mawogo yawe nyambafa ni moyo basi.
Josefa ni Azariya va ngu padwa
(2 Makabhewu 12:32-45)
55Gikhati Judha ni Jonatane va nga bani vari Gileyadhi, ndriyaye Simoni nari Galileya vbafuvbi ni Pitolomayidha, 56Josefa, mwamana wa Zakariya ni Azariya, muthangeli nya dzinyimbi dzaye, va dipwa mahungu nya sigiro saye nya wungwazi ni mayunga yaye, 57va di ganela, khavo: “Hongoleni nethu hi pwadza ndruma nya malina yathu khu gu hi dwana ni mayigo ya vaakelane vathu.” 58Va di rumela dzinyimbi dzawe guya dhumela Lidhoropa la Jaminiya. 59Aholu Gorigiya a di duga khu dhoropani ni masotshwa yaye gasi guya dwana navo. 60Josefa ni Azariya va di padwa va gu lundrwa kala mivbinganoni nya litigo la Judheya. Litshigu lolo gu difa gipimo nya magumavili mazana (2.000) vama va na Israyeli. 61Vathu va manide tshanisa yeyi nya gupadwe nya gukhongolo, kholu va ngamba yingela ni gumba landrisa milayo ya Judha ni vandriyaye, khu gu pimisa gukhavo va ngu kodza navo gu gira sigiro nya sikhongolo. 62Kholu avo va di si lumbi lifumbu nya vama#5:62 Josefa ni Azariya va di siri va na Makabhewu, kha va hakha gikategiso ni fanelo nya gutshule Israyeli. Avo va padwe kholu va nga dwanela gu gira matshandza yawe, va vbweta gu pwala ndruma. Khandri va di landra gugola gwa Nungungulu, aholu va di vbweta gu dzi khusedza vabune. Esi nya matshandza si ngu kawukwa ngudzu umo nya Milowo nya guage. vale va ningidwego fanelo nya guvbanyise Israyeli. 63Aholu, ndrena Judha gumogo ni vandriyaye va manide wuzundzo nya wukhongolo mahoni ga Israyeli ni ga mayigo yatshavbo ma pwidego ndruma yaye. 64Vathu vatshavbo va di hidzimela vbafuvbi gwawe va va kulungela. 65Khu guvbiredza Judha ni vandriyaye va di duga gambe va ya dwana ni sanana sa Esawu tigoni ga Marandzi. A di wandra Hebroni ni mayigwana yaye a pfhungumula makhokhola yawe, a gu vbisa dzilangwe ni mabhiyo yawe. 66Khu vbale, a di vbindra a guya dhumela litigo la Vafilisitiya, a gu tsemakanya Maresa.#5:66 Vomo va pimisago gukhavo “Maresa” gu thudwa lidhoropa la Samariya. 67Litshigu lolo va fude vaphasi nya mhamba nya gukari va nga duga va ya dwana litunga khu gu fela gu nonedza wungwazi wawe. 68Judha a di thendregedza a guya dhumela Asidhodhi, tigoni ga Vafilisitiya, a gu khungumulela siluvelo sawe ni malanga nya miphaso, a vbisa sithombe sa vanungungulu vawe, a gu phanga madhoropa, a bwelela ni phango tigoni ga Judha.
Currently Selected:
1 Makabhewu 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.