1 Makabhewu 4
4
Judha a ngu simama gu dugelela mulitungani
(2 Makabhewu 8:23-29,34-36; 11:1-12)
1Gorigiya a di hatha livbandre magumi mazana (5.000) vama nya gugimbile khu mawundru ni likhumi mazana (1.000) vama nya gukhilele dzikavalu, a gu khuga navo gupfolani nya lidambo, 2nari ni gikungo nya guya mana Vajudha na va pfhade, gasi gu va dhumela khu githugedza. Gorigiya ni vathu vaye, va di nonedzwa ndzila khu vama va likhokholani. 3Aholu, Judha a di tugula gikungo gyawe, a duga nuye ni vadwani vaye nya gutiye vaya dhumela dzinyimbi dza mufumeli dzi nga bani na dziri Emawusi, 4gikhati gyogyo, talo watshavbo nya masotshwa wu di phalalegide panini, 5Gorigiya vbohide ni wutshigu lizumbotunu ga Judha, aholu kha nga ya mana muthu. Khavbo avbo, a di va vbwetedzela musigomoni, khuye: “Va thavide va tutuma.”
6Aholu Judha a di vboha panini gukhugani nya Wuronga, nari ni magumararu mazana vama (3.000), aholu va diri mwalo matshari ni sitshangu nya guenele idzo va nga bani va gola khidzo. 7Va di wona lizumbo la va nya mayigo na li emide khu tshivba, li vhikedwa maphuvbo yatshavbo khu vakhileli nya dzikavalu, vatshavbo nari vama va dongisedwego gwadi guya dwana nyimbi. 8Judha a di embela vangana vaye, khuye: “Mu nga thavi talo nya tengo wawe, gambe mu nga khali hwanga khu gu wona guthisa nya tshivba yawe; 9dundrugani idzo va nga vbanyiswago khidzo vababe vathu Phwani nya Gufuvile gikhati Faro a nga va landrago khu talo nya dzinyimbi dzaye.” 10Olu hongoleni hi khusedze lito lathu ndzadzini, na hi gu tumba gukhethu uye a na hi pwela wusiwana, a alakanya gidzumeledzwano a giridego ni vababe vathu, a gu mbembisa muhuno dzinyimbi dzedzi hi dzi wonago khu maho yathu 11va nya mayigo vatshavbo va na dziti nya gukhayo womo uye a dzegisago ni gu vbanyisa Israyeli.
12Avbo va nyamayigo va nga khusago maho va khedzisa, va di wona Vajudha na va gu va yela, 13va di duga navo khu lizumboni gwawe gasi guya dwana navo. Masotshwa ya Judha ma di womba mipundru. 14Gu di dwanwa litunga, aholu va nya mayigo va di padwa, va gu tutuma va phalalega panini. 15Vatshavbo va nga tshalago hwane, va di songwa khu matshari. Vajudha va di va lundra kala Gezeri, kala ni mapanini ya Idhumeya, Asidhodhi ni Yaminiya. Gu fude tengo nya magumararu mazana (3.000) vathu. 16Judha, na gu wuya khiyo nya gulundre, 17a di embela masotshwa yaye, khuye:
“Mu nga giri makolo mu dzega phango nya esi si tshidwego, kholu hi na ni limbe litunga mbeli gwathu. 18Gorigiya ni dzinyimbi dzaye womo vbafuvbi musigomoni. Olu khingani nala mu dwane naye; khu hwane, khavbo mu na dzi kodzago gu phanga satshavbo nyamba thava gilo.”
19Khavbo avbo, Judha na nga guganela, gu di vboha vama nya gukari va Gorigiya, na va gu tshiga khu gigomoni. 20Avbo va nga wonago dzinyimbi dzawe na dzi phalalegisidwe, lizumbo na li tsagamide khu nilo, kholu wutshi wu nga bani na wu gu wonega, wu di gu nonedza gwadi iso si dugeledego, 21va di tala khu hwanga nya wukhongolo, wu nga engedzelana, avbo va wonidego dzinyimbi dza Judha panini na dzi emisedwe gu dwana litunga, 22va di tutuma vatshavbo va thavela tigoni ga Vafilisitiya.
23Khavbo avbo, Judha a di bwelela lizumboni ga valala gasi guya dzegedzela sile va si tshidego, masotshwa yaye ma di dzega ndralama nya yingi, parata, siwindri nya lisima, myendra nya siwunguwungu nya guvbyuge, nga damboni, ni livala nya nga phwani, ni dzimbe dzithomba nya dzingi. 24Guwuyani gwawe, va di embelela ndzimo, va rungudza Pfhumu Nungungulu wa ndzadzini: “Kholu uye khwadi, wuhindzi waye wu ngu simama kala gupindruga.” 25Israyeli a di vbuluga litshigu lolo, khavbo nya gupale gogu nya gukhongolo ngudzu 26va nya mayigo va nga vbulugago, va diya tivisa Lisiya satshavbo si nga dugelelago. 27Uye, na pwide mahungu yaya, a di goroga ngudzu a gu vbela tshivba, kholu kha dzi kodza gu gira gugola gwaye ga va na Israyeli ni gu gira iso a nga rumwa khu mufumeli.
Huwelelo nya guhegule ya Lisiya
(2 Makabhewu 11:1-12)
28Khu mwaga wu nga landrelago, Lisiya a di tombanisa livbandre na limwedo magumi magumi mazana (60.000) vama nya guhathedwe ni livbandre magumi mazana (5.000) vakhileli nya dzikavalu, gasi guya dwana ni Vajudha. 29Libutho nya masotshwa yaya, li di vboha Idhumeya, lita zumba Bheti-Suri. Judha a di va khinga nari ni likhumi magumi mazana (10.000) vama. 30Avbo a nga wonago tengo nya masotshwa nya tshivba lizumboni, Judha a di khusa lito a gira nombelo, khuye: “U na rungudzwe Muvbanyisi wa Israyeli, uwe u vbedzidego tshivba ya gidandrangulu khu mandza ya githumi gyago Dhavhidhe, u gu ningela masotshwa ya Vafilisitiya mandzani ga Jonatane, mwamana wa Sawule ni ga muphari nya matshari yaye. 31Gira gambe muhuno idzosaye, u ningela mabutho yaya nya dzinyimbi mandzani ga vathu vago va na Israyeli, u fenengedza khu dzitshoni vadwani vaye nya nyimbi ni vakhileli vaye nya dzikavalu. 32Va thele hwanga, va tale khu rerema, va gire va fanya matshandza va gu nawo khu gu tumba tshivba yawe, va na tale khu dzitshoni gupadwani gwawe. 33Va mbembise khu matshari ya vale va gu golago, gasi vatshavbo va tigo lina lago, va embelele dzindzimo nya rungudzo wago.
34Khavbo avbo, va di va dhumela khu maphuvbo yatshavbo, li dwanwa litunga nya tshimatshima, masotshwa ya Lisiya ma di padwa, gufa livbandre magumi mazana vama (5.000), va gu mbambamela mbeli gwawe. 35Lisiya na wone gupadwa ga masotshwa yaye ni gutiya ga masotshwa ya Judha, ma nga sambanyago gufa ni guvbanya khu guzundzega, a di bwelela Antiyokiya#4:35 A di bwelela Antiyokiya: Omu ga 2 Mak 11:13 hi ngu tiviswa gupwani hwane nya litunga leli nya likhongolo, Lisiya ni Judha va di khala vbavbatshi va gu hevbula ndzila nya gugire pwanano nya gurule. gasi guta rengelela vadwani nya nyimbi khu dzitsapawu, a kodza gu wuya gambe Judheya nari ni tengo nya wungi nya masotshwa.
Guagiswa nya Nyumba ya Nungungulu
36Khavbo avbo, Judha gumogo ni vandriyaye va di ganela, khavo: “Wonani, valala vathu va mbembisidwe, khu guralo hongoleni hi gwele hi dzi agise ni gu vbahedza nyaluphye wulanga nya guage,#4:36 Hongoleni hiya agisa wulanga nya guage: Wulanga nya guage wu nga nyenyeziswago khu vathu nyambana nayo, gu wonwa kha nga givangelo nya gikhongolo gi nga gira Vajudha va gu wugela wufumeli, va gu dwana litunga leli. Wulanga nya guage a diri ilo litshina nya tumbunugo nya wukhodwa ni milayo ni mavbanyelo nya Vajudha. Guagisa wulanga nya guage khu gu dusela satshavbo sile si ngata engedzedwago ga mavbahelo ni esi si ngata thedzedwago avbo nya Nyumba ya Nungungulu khu mahedheni, gasi gu yi vbahedza nyaluphye kha nga idzo wu rumago khidzo Nayo nya wukhodwa wa Vajudha. hi wu agisa.”
37Khu kharato, gu di tshangana libutho latshavbo nya nyimbi, va gwela gigomoni gya Siyoni. 38Va diya mana wulanga nya guage na wu vbindrugedzide wu khala marumbi nyamba sayisega, giluvelo na gi nyenyezisidwe, malimba na ma vbisidwe, na gu tade khu mwasi makupakupani gakone, gu khala likhabi nya guthise, dzinyumba nya guage na dzi thegide. 39Na va wone esi, va di pferula dzingandzu dzawe, va lila, va dzi phorodza nguma hungoni, 40va di khidzima va thega khu khovbe mafuni, va womba mipundru va rana ndzadzini. 41Khavbo avbo, Judha a di laya masotshwa yaye gukhuye ma dwanisa vale va dhoropani ga Akara nyamba va ninga gikhati nya guhefemule kala gu vbedza guhandza Wulanga nya Guage. 42Na vbedzide, a di hatha vama nya gu dzi vegise ni gu khathalela nayo va khala vaphasi nya mhamba, 43khavo va na agisago Nyumba ya Nungungulu, va gu dzega siwindri si nyenyezisidwego va si rinya wulanga nya gunyenyeze.
44Khavbo avbo, gu di tshangana huwo gasi gu hunga ginani va yedego gu gira khu giluvelo nya miphaso nya guvbiswe gi nga nyenyeziswa. 45Va di tedwa khu mapimo nya gu gi khungumule, gasi va si thedwi khigyo dzitshoni kha nga gi nga bani gi nyenyezisidwe khu va nyamayigo. Khu guralo va di gi khungumula. 46Va di dzega siwindri sakone va ya si vega wulanga nya gusayisege vbatshani nya gigomo nya Nyumba ya Nungungulu, kala a dugelela Muprofeti nya gu va embele ginani va yelago gu gira khu iso. 47Khavbo avbo, va di dzega siwindri nya lisima nya mirumba, kha nga idzo wu rumago khidzo nayo, va gu vbaha giluvelo nya giphya nya idzosaye ni egi gya gale. 48Va di vbahedza gambe Nyumba ya Nungungulu gumogo ni ndrani gwaye, va gu agisa makupakupa. 49Va di gira sombo nya siphya nya guagiswe va yisa nyaluphye gidzigaredzo nya dzikandriya, giluvelo nya mafura nya gunungele ni meza, wulangani nya guage. 50Khavbo avbo, va di vbisa libani vbagiluvelotunu, va khondrisa dzikandriya dza vbagidzigaredzotunu, gasi gu wenengedza Nyumbani ga Nungungulu. 51Va di vega sibaba nya gukategiswe vbamezatunu, va fenengedza myendra, wu vbedzisa kharati thumo watshavbo va nga wu phelago.
52Khu litshigu nya magumavili na livbandre nya ngima nya livbandre na wu na, a gu ngima wa Kisilewu, nya mwaga nya lizana ni magumana na livbandre na miraru (148), va di wuga na gu ngari dzimindru ngudzu, 53va ningela miphaso, kha nga guruma nya Nayo, vbagiluvelotunu nya giphya nya miphaso nya guvbiswe, va nga bani va vbahide. 54Giluvelo gi agisidwe nyaluphye, khu litshigu la limwedo, ni gikhati gya gimwegyo nya ngima wamoyo, gi nga nyenyeziswago khuwo khu va nya mayigo.#4:54 myaga miraru hwane, Vaasiriya va di nyenyeziside nyumba ya Nungungulu 1 Mak 1:54. Litshugu nya guagiswe gu di gu wombwa wutsendze nya mihwambi, sitshatsharo ni siphaphato nya dzisimbi. 55Gidzemo gyatshavbo gi di noga khu khovbe vbavbatshi, va khozela ni gurungudza Nungungulu a va ningidego gupala. 56Va di vbedza gipimo nya livbandre na mararu matshigu na va gu gira buzo nya gubikele giluvelo, va di ningela miphaso nya sirengo nya guvbiswe, va paya sirengo nya miphaso nya pwanano ni gubonga. 57Va di mburisela mwanyatunu nya Nyumba ya Nungungulu khu vbavbandze, khu dzihari nya ndralama ni sitshangu nya sidugwana, va di kategisa myanya nya Nyumba ya Nungungulu, ni makhuvi yakone va nga bani va ma thede malimba.
58Gu di manega gunengela nya gukhongolo ngudzu vbakari nya vathu, kholu dzitshoni va nga thedwago khu va nya mayigo dzi yisidwe hwindzo. 59Judha ni vandriyaye gumogo ni tshangano watshavbo nya vathu va Israyeli va di vega nayo nya gu khu mwaga ni mwaga khu matshigu yoyo, wu girwe buzo nya gubikedwe giluvelo khu litshigu laye. Buzo wu di yela gu girwa khu gutsaka ni gunengela, wu dzega gipimo nya livbandre na mararu matshigu, gukhugela litshigu nya magumavili na livbandre nya ngima nya Kisilewu. 60Matshigu yoyo va di vbaha gigomoni gya Siyoni libhiyo nya gulaphe ni makhokhola nya gutiye, gasi va nya mayigo va siti gambe vata gandredzela, kha nga idzo va nga girago guhegulani 61Judha a di vega vbale masotshwa gasi gu li ghadha, a tiyisa gambe likhokhola la Bheti-Suri gasi gu vathu va mane likhokhola nya wuvhikeli mbeli ga Idhumeya.
Currently Selected:
1 Makabhewu 4: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.