1 Makabhewu 2
2
Matatiya ni sanana saye
1Khu matshigu yale, Matatiya, mwamana wa Johane, mwamana wa Simiyoni, muphasi nya mhamba nya linyumba la Joyaribi, a dita khu Jerusalema ata vbaha Modhini. 2A diri ni livbandre sanana a gu esi: Johane a ranwago gambe pwani khu Gadhi, 3Simiyoni a tidwa khu lina nya gupwani khu Tasi, 4Judha, a tidwago pwani khu Makabhewu.#2:4 Makabhewu: Lina la Judha va mu riyidego na ngari gyanana mwendro lidzaha, lina leli la gu tshamusela gupwani “oyu a hathidwego khu Pfhumu” (Isa 62:2). Khu matshigu, lina leli li di khala Lina nya gilongo gyatshavbo, kholu ndranga yeyi yi di hathwa khu Nungungulu gasi gu dwana litunga nya gutshule litigo ni wukhodwa wa Vathu va Nungungulu. 5Eliyazari a ranwago pwani Avharani, ni Jonatane, a ranwago pwani Afosi. 6Na wone gipoyilo gi girwago Judheya ni Jerusalema, Matatiya a di samala, khuye: 7“Wusiwana wangu! Nyi velegedwe ginani eni? Gasi gu wona gumbembiswa ga vathu vangu, ni gukhungumudwa nya lidhoropa nya guage, nyi gurumedzwa guta khala avba nyi li wona na li gu khungumudwa mandzani ga valala vaye, ni gu wona wulanga nya guage na gu nyenyeziswa khu valombo?
8Nyumba yaye nya miphaso ya gu fanana
ni mwama nya nyalidede,
9ni sombo nya guage nya wuzundzo waye
si vbagedwe si yiswa wugumbitunu;
sanana saye si di pidwa migolo mitendrelani,
ni madzaha yaye ma di songwa khu matshari ya nala.
10Khu levbini litigo li ngamba bela li wandra
wufumu waye,
mwendro li ngamba phanga dzithomba dzaye?
11Va li tshulede gungangamela
nya simburiselo saye,
li di bani li tshulegide, olu li
vbindrugedzide li khala khumbi.
12Wulanga wathu nya guage,
wumburi ni wuzundzo wathu,
wu vbindrugedzide wu khala marumbi,
wu nyenyezisidwe khu va nyamayigo.
13Hi nga gu vbanyela ginani gambe? 14Matatiya gumogo ni sanana saye,
va di pferula dzingandzu dzawe,
va ambala dzindzowo va gira gililo
nya gikhongolo ngudzu.
Phaso tigoni ga Modhini
15Khu gikhati gyogyo, dzindruna dza mufumeli dzi di vboha dhoropani ga Modhini, gasi guta gurumedza vathu gu diga wukhodwa wawe, ni gu gira dzimhamba nya guhambane ni tumbunugo wawe. 16Nya vangi va na Israyeli va di dzumela milayo yeyi, aholu Matatiya ni sanana saye, va di tiya va dzi pambula. 17Dzindruna dza mufumeli dzi diya ga Matatiya, dziya khidzo: “Uwe u na ni tshivba ni ndruma ni githawo dhoropani momu gwatshavbo, vandriyago ni sanana sago, vatshavbo va gu gu wona kha nga muthangeli. 18Delu uta phela khuwe u landrisa guruma ga mufumeli, kha nga va giridego vathu nya mafumbu yatshavbo, ni vathu va na Judha, ni avo va tshadego dhoropani ga Jerusalema. Uwe gumogo ni sanana sago, mu na khala dzipari dza mufumeli. Uye a na mi rungudza ni gu mi tadza khu wufumu nya parata, ni ndralama ni siningwa nya singi ngudzu.”
19Matatiya a di va hakha khu lito nya tshivba, khuye: “Ambari mayigo yatshavbo ma lumbago mufumo ma gu dzumela gu diga gukhodwa gwa vakokwe vawe, ma yingisa guruma ga mufumeli, 20eni gumogo ni sanana sangu ni vandriyangu, hi na simama gu landrisa gidzumeledzwano gya vababe vathu. 21Nungungulu a na hi vbulugise guhambana ni nayo ni sileletelo saye. 22Ethu gima kha hi na nga dzumela gu yingisa guruma ga mufumeli, gambe kha hi na nga hambana ni tumbunugo nya wukhodwa wathu, kha hi na ndreyela nyamudye mwendro nya nyambade.”
23Na ngari gu vbedza gu ganela esi, moyo nya Mujudha a di hidzimela gasi guta ningela phaso vbagiluvelotunu ga Modhini, khu guruma ga mufumeli. 24Matatiya na mu wone, a di vila monyoni gwaye khu gu garadzega khu wuvi, ni mahembe ma di vhiluga ndrani gwaye, na garadzegide khu wuvi nya gudwanele Nayo, a di mu wugela aya mu songa kamwe vbagiluvelotunu. 25Khu gumogo a di songa gambe ni girumwa gya mufumeli gi nga bani na gi gu gurumedza vathu gu dusa miphaso, a vbedza, a khungumulela giluvelo. 26Khu magirelo yoyo, a di yeyedza lihaladzo laye khu gu khathalela nayo, kha nga idzo a nga girago Fineya, khu kotani ya Zimiri, mwamana wa Salu.#2:26 Gukhugela gindrimana 18 kala 26 nya gipimo 2, gu ganedwa khu gutumbega ga Matatiya. Matatiya a di lingwa gutumbegani gwaye ga Pfhumu Nungungulu. Vale va nga rumedwago guta gurumedza va na Israyeli gu diga wukhodwa wawe, va dita ga Matatiya vata mu linga khu gitumbiso nya gikhongolo ngudzu. Aholu Matatiya a di tala khu gukhathalela gidzumeledzwano gya Pfhumu ni guvegisa nayo nya Sabhadho, a di bomba gupwa situmbiso sile nya gilingo.
27Khavbo avbo, Matatiya a di khusa lito a gu laledza dhoropani gwatshavbo, khuye: “Muthu watshavbo a garadzegago khu gu khathalela Nayo, a vbwetago gu simama gu tumbega avbo nya gidzumeledzwano, a nate, a nyi landrela.” 28Uye ni sanana saye, va di diga lidhoropa gumogo ni dzithomba dzawe dzatshavbo, va thavela sigomoni.
Matatiya mugiwulani
29Khavbo avbo, vatshavbo va nga bani va gu vbweta gululama ni lisine, va di hongola navo giwulani va thavela umo, 30gumogo ni sanana ni vagadzi vawe, ni mitshambi yawe, kholu va di landreledwa khu tshivba ni tshivba. 31Gu di tiviswa dzindruna dza mufumeli ni masotshwa ma nga bani na mari Jerusalema, Lidhoropa la Dhavhidhe, gupwani Vajudha vale va nga yeyisago nayo wa mufumeli va relede mugiwulani gasi guya sihala umo, va landredwe khu vathu nya vangi. 32Vaasiriya va di va landra vaya va mana, va dzi dongisela gu va dwanisa khu litshigu nya Sabhadho. 33Aholu va si gu giri gilo, va di va embela, khavo: “Basi! Singi iso mu giridego kala olu. Dugani muya landrisa nayo wa mufumeli, gasi mu na vbanya.” 34Aholu avo va di va hakha, khavo: “Ethu gima kha hi na duga, gambe kha hi na yingisa nayo wa mufumeli, hi nyenyezisa litshigu nya Sabhadho.” 35Khavbo avbo, Vaasiriya va di dzegela gu va dhumela; 36aholu avo kha va nga phodza, gambe kha va va rinyela giwindri ambari gusega malimba nya wuthavelo wawe. 37Avo va di ganela, khavo: “Hatshavbo hi nafe nyambana nandru, ndzadzini ni mafuni gu na khale dzifakazi nya gupwani mwa gu hi songani mahala.” 38Khidzo kharati valala va nga va dhumelago khu litshigu nya Sabhadho giwulani, va gu va sasela, gufa vama, vanyamayi, sanana ni mitshambi yawe, khu tengo nya likhumi mazana vathu (1.000).
39Avbo Matatiya ni dzipari dzaye va pwidego mahungu yaya, va di vbisega ngudzu. 40Va ganela khu gyawe, khavo: “Hatshavbo ha gu gira kha nga vandriyathu, hi si dwani ni va nya mayigo, gasi guvbanyisa womi wathu ni gu vbulugisa milayo yathu, va na hi fuvisa mafuni khu guvbiredza.”
41Khu litshigu lile kamwe, va di hunga gikungo gegi, khavo: “Uye a na hi dhumelago khu litshigu nya Sabhadho, hi na dwanisana naye, gambe kha hi na mu diga a hi songa hatshavbothu nga idzo va giridego vandriyathu, va nga va songetela umo va nga bani va sihade umo.”
42Khavbo avbo, tsawa nya Vahasidhi, va na Israyeli nya dzingwazi, va dita patana navo, vatshavbo na va tade khu tshivba nya gukhathalele nayo. 43Ni vatshavbo vale va nga bani va gu zama gu vbuluga gu songwa, va diya patana navo va engedzela gu dandrisa tshivba yawe. 44Va di gira libutho nya nyimbi, na va tade khu likhulo, va di sasela vatshunganisi ni hambanisi nya Nayo. Vambe va di vbweta wuthavelo vbakari ga va nya mayigo.
45Matatiya ni vangana vaye, va di bela madhoropani va gu khungumulela siluvelo, 46va gu hanisa wugwera sanana satshavbo nya sikhwathana si nga bani si si gu beli ngoma, tigoni gwatshavbo ga Israyeli. 47Va di tutumisa sindragamilayo, thumo wawe watshavbo wu di va dugela gwadi. 48Va di hwandra Nayo mandzani ga va nya mayigo ni ga vafumeli, gambe kha va dzumedzisa gukhavo guvivba gu simame.
Sileletelo sa Matatiya
49Avbo Matatiya a nga wonago nya gukhuye matshigu yaye nya guvbanye ma ngu vboha mahegiso, a di embela sanana saye, khuye: “Egi gi fumago olu, matshandza, livengo, pfilupfilu ni likhulo.” 50Khu guralo, vanavangu, khalani vavhikeli nya Nayo, mu ningela ni womi wanu khu kotani nya gidzumeledzwano gya vababe vathu. 51Alakanyani sigiro sa vakhongolo vathu matshiguni gwawe, mu na mana wuzundzo ni lina nya ndruma kala gupindruga. 52Ina Abrahama khandri a di wonwa nari muthu a tumbegidego kholu a nga lingwa, gani? Ina khandriso si nga mu gira a manega na lulamide, gani? 53Gutshanisekani gwaye, Josefa a di landrisa sirumo nya Nayo, a gu ningwa gu khala mune nya litigo la Egipito. 54Khu kotani nya khathalelo nya yikhongolo a nga bani ari nayo, kokwe wathu Fineya hakhide gitumbiso nya wuphasi nya mhamba kala gupindruga. 55Josuwa khu gu landrisa magana ya Nungungulu, a di khala mulamuli tigoni ga Israyeli. 56Kalebi a di ninga wufakazi vbakari nya vathu, a gu ningwa litigo kha nga thomba yaye. 57Dhavhidhe khu kotani nya wuhindzi waye, a di mana gikhalo nya wufumu kala gupindruga. 58Khu gu khathalela ngudzu nayo, Eliya a di khusedzedwa ndzadzini, 59Ananiya, Azariya ni Misayeli, va di vbulugiswa gufa khu malavbelavbe nya nilo khu kotani nya gukhodwe gwawe. 60Dhaniyeli, khu gululama gwaye, a di vbulugiswa kanani nya dzinghala. 61Khu magirelo yoyo, alakanyani, khu mimela ni mimelana, gukhenu vatshavbo vale va tumbago Nungungulu, kha va mbembi. 62Mu nga thusedzedwi khu magana nya muthu nya gighohi, kholu mahegiso nya wuzundzo waye ndzilo ni siwungu basi. 63Muhuno a gu khusedzwa, mindru a mwalalega, kholu a na bwelela a gu khala kudzudzwane ni makungo yaye ma na phalalegiswa.
64Gasi enu, vanavangu, khalani vama nya gutiye, mu khathalela gu landrisa Nayo, kholu wu na mi vbohisani wuzundzoni. 65Kha mu mu woni oyu ndriyanu Simoni, nyi ngu dziti gukheni uye mwama a tadego khu guti, mu yingiseni, a na khala uye babe wanu. 66Judha Makabhewu, mwama nya tshivba ni lisima gukhugela wudzahani waye, a na khala muthangeli nya masotshwa, a na thangela nyimbi nya gudwane ni va nya mayigo. 67Ranani vata patana nanu vatshavbo vale va landrisago Nayo, gasi gu dzi phodzelani khu guvivba gwatshavbo gu giridwego ga vathu vanu. 68“Bweledzelani va nya mayigo guvivba va hi giredego, khalani valandrisi nya sileletelo nya Nayo.”
69Khu hwane nya ugo, a di va kategisa, aya dzi tshanganisa gumogo ni vavelegi vaye. 70Fude khu mwaga nya lizana ni magumana na livbandre na moyo (146). Sanana saye si diya mu dzinga thowoni ga vavelegi vaye, tigoni ga Modhini, va na Israyeli vatshavbo, va di mu lila khu wuvi wawe watshavbo.
Currently Selected:
1 Makabhewu 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.