Marcos 14
14
Jesústa wanutsiyänanpä willanakuyanqan
Mateo 26.1-5; Lucas 22.1-2; Juan 11.45-53
1Jesús tsaynö yachatsirqan Pascua#Éxo. 12.1-27; Deut. 16.1-8. fiesta y Levadüraynaq Tanta Mikuna fiesta qallananpä ishkay junaq faltaykaptinmi. Tsay junaqkunam mandaq sacerdötikuna y ley yachatsikuqkuna willanakuyarqan runakunata mana musyatsiyllapa Jesústa imanöpapis tsariskir wanutsiyänanpä. 2Tsaymi niyarqan: <<Fiestachöqa ama tsarishuntsu. Tsaychö tsarishqaqa contrantsikmi runakuna shäriyanqa>>.
Jesúspa umanman perfümita wiñanqan
Mateo 26.6-13; Juan 12.1-8
3Betania markachö leprösu niyanqan Simónpa wayinchö Jesús kaykaptinmi juk warmi charqan alabastro rumipita rurashqa pömuchö perfümin aptashqa. Tsay perfümi nardupita rurashqa karmi pasaypa chanin karqan. Mësachö Jesús kaykaptinmi tsay warmiqa pömupa shiminta pakiskir Jesúspa umanman wiñarqan.#Luc. 7.37-38. 4Tsayta rikaykurmi wakin tsaychö kaykaqkuna rabyar niyarqan: <<¿Imapätä tsay perfümita perditsishqa? 5Tsaypa rantinqa juk wata arupakur gänanqantsikpita maschömi rantikushwan karqan.#14.5 Griëguchömi nin kimsa pachak (300) denariupita maschö rantikuyänanpä kanqanta. Juk denariuqa juk junaq aruypa preciunmi karqan. Tsay qellaywanmi pobrikunata yanapashwan karqan>>.
Tsaynö nirmi tsay warmita rabyapäyarqan.
6Jesúsnam nirqan: <<Dëjayay. ¿Imanirtä kay warmita manakaqman churayanki? Payqa allitam rurashqa. 7Pobrikunaqa qamkunawanmi imaypis kaykäyanqa.#Deut. 15.11. Peru noqam sïqa qamkunawan kashänatsu. 8Pampashqa kanäpämi payqa perfümita wiñapaykäman. 9Rasunpam nï: Maytsaychöpis willakuynïta willakurmi kay warmi perfümita wiñapämanqanta willakuyanqa>>.
Jesústa rantikunanpä Judas Iscariote conträtuta ruranqan
Mateo 26.14-16; Lucas 22.3-6
10Jesúspa apostolnin Judas Iscariotim mandaq sacerdötikunaman aywaykur Jesústa entregananpä nirqan. 11Tsaymi sacerdötikuna kushikur pägayänanpä awniyarqan. Judasnam yarpachakurqan imay höra Jesústa entregananpäpis.
Pascua mikuyta discïpulunkunawan Jesús mikunqan
Mateo 26.17-25; Lucas 22.7-14, 21-23; Juan 13.21-30
12Levadüraynaq Tanta Mikuna fiesta qallaykunan junaqmi Pascuachö mikuyänanpä carnishta pishtayaq. Tsay junaqmi discïpulunkuna Jesústa tapuyarqan: <<Taytay, Pascua mikuyta mikunantsikpä ¿maychötä alistayämushä?>>
13Tsaynö niyaptinmi Jesús ishkay discïpulunkunata nirqan: <<Jerusalénman aywayay. Tsayman charmi juk runa uylluwan yakuta apaykaqta tariyanki. Tsay runapa qepallanta aywayanki may wayimanpis chanqanyaq. 14Tsaychö wayiyuqta niyanki: <¿Mayqan cuartuchötäshi discïpulunkunawan Pascua mikuyta Jesús mikunqa?> 15Wayiyuqnam altuschö jatun cuartu alistashqata rikatsiyäshunki. Tsaychö mikunantsikpä alistayanki>>.
16Tsaymi Jerusalénman discïpulunkuna aywar Jesús ninqannölla tariyarqan. Tsaychömi Pascua mikuyta alistayarqan.
17Patsa tsakaykaptinnam chunka ishkay discïpulunkunawan tsay wayiman Jesús chäyarqan. 18Mikuykarnam Jesús nirqan: <<Rasunpam nï: Qamkunapita juknikim prësu tsariyämänanpä entregamanqa. Tsaynö entregamanqa noqawan juntu mikuykaqmi>>.#Sal. 41.9.
19Tsaynö niptin llakikurmi juknin juknin Jesústa tapuyarqan: <<¿Noqatsurä kä?>>
20Jesúsnam nirqan: <<Qamkunapita juknikim kaykan. Paymi noqawan juntu tantata plätuchö tullpuykan. 21Rasunpam Runapa Tsurin qellqashqa kanqannölla ñakar wanunqa. Peru payta entregaq runam sïqa pasaypa kuyapaypä kanqa. Tsay runaqa ama yurinmantsu karqan>>.
Mushuq pactupä Jesús yachatsinqan
Mateo 26.26-30; Lucas 22.15-20; 1 Corintios 11.23-25
22Mikuykäyaptinmi tantata aptarkur Tayta Diosta Jesús agradëcikurqan. Tantata pakiskirnam discïpulunkunata makyar nirqan: <<Kay tantata mikuyay. Kayqa cuerpümi>>.
23Tsaynöllam vïnuyuq väsuta aptarkur Tayta Diosta agradëcikurqan. Tsaypitanam discïpulunkunata makyaptin llapankuna upuyarqan. 24Tsaypitanam nirqan: <<Kay vïnuqa Tayta Dios [mushuq] pactuta rurananpä#Jer. 31.31-34. jichanqä yawarnïmi. Atskaq runakuna jutsankunapita perdonashqa kayänanpämi yawarnïta jichar wanushä.#Éxo. 24.8; Zac. 9.11. 25Rasunpam nï: Kananpitaqa vïnuta manam yapay upushänatsu hasta Tayta Diospa mandakuyninchö mushuq vïnuta upunqäyaq>>.
26Tsaynö niskirnam discïpulunkunawan salmukunata cantaskir Olivos jirkanman aywayarqan.
Pedro ñëgananpä kanqanta Jesús ninqan
Mateo 26.31-35; Lucas 22.31-34; Juan 13.36-38
27Tsaypitanam Jesús nirqan: <<[Kanan paqasmi] llapayki dëjaskamar aywakuyanki. Tayta Diospa palabranmi nin: <Üsha mitsiqta wanuskatsiptïmi üshankuna wakpa kaypa mashtakar aywakuyanqa>.#Zac. 13.7. 28Tsaynö kaptinpis wanunqäpita kawaskamurmi qamkunapita mas puntata Galileaman aywashä>>.#Mat. 28.16.
29Pedrunam nirqan: <<Wakin dëjayäshuptikipis noqaqa manam dëjashaykitsu>>.
30Jesúsnam nirqan: <<Rasunpam nï: Kanan paqas ishkay kuti gällu manarä cantaptinmi: kimsa kuti ñëgamanki>>.
31Pedrunam nirqan: <<Ishkantsikta wanutsimänantsik kaptinpis manam ñëgashaykitsu>>.
Tsaynöllam wakin discïpulunkunapis niyarqan.
Getsemaníchö Jesús mañakunqan
Mateo 26.36-46; Lucas 22.39-46
32Getsemaní niyanqanman discïpulunkunawan chaykurmi Jesús nirqan: <<Tayta Diosta mañakamunqäyaq kayllachö jamaykäyay>>.
33Tsaypitam Pedruta, Santiaguta y Juanta washa läduman pusharqan. Tsaychömi pasaypa llakikur 34nirqan: <<Wanuypanörämi llakikuy tsarimashqa. Mana punukällar kaychö shuyaykäyämay>>.
35Tsaypita washaläninkunaman aywaykurmi patsaman lätaykur Tayta Diosta mañakurqan wanuypita salvananpä. 36Mañakurmi nirqan: <<Abba, Papä, qampäqa imapis manam ajatsu. Cöpachö wiñaraykaq castïguykita ama upuykatsillämaytsu.#Sal. 75.8; Isa. 51.17; Jer. 25.15-29; Hab. 2.16. Peru noqa munanqänöqa ama katsuntsu, sinöqa qam munanqaykinö kaykullätsun>>.
37Tsaypita discïpulunkuna kaqman kutirmi punukashqata tarirqan. Tsaymi Pedruta nirqan: <<Simón, ¿imanirtä punukashqa kaykanki? ¿Manaku juk hörallapis rikchayta puëdinki? 38Rikchayay. Tayta Diosta mañakuyay Satanás mana tentayäshunaykipä. Cäsumayta munarpis kikillaykikunapitaqa manam puëdiyankitsu>>.
39Tsaynö niskirmi yapay aywarnin puntata mañakunqannölla Tayta Diosta mañakurqan. 40Tsaypita yapay kutirmi discïpulunkuna punuykaqta tarirqan. Alläpa punuy vinciptinmi punukashqa kaykäyarqan. Tsaynö kaykaqta tariykuptinmi ima niytapis puëdiyarqantsu. 41Kimsa kuti Diosta mañakunqanpita kutirnam nirqan: <<¿Jinallaku punuykäyanki? ¡Rikchayay! Höra chämushqanam Runapa Tsurinta jutsasapa runakunaman entregananpä. 42¡Shäriyay, aywashunna! Entregamaq runa shamuykannam>>.
Jesústa prësu tsariyanqan
Mateo 26.47-56; Lucas 22.47-53; Juan 18.3-12
43Jesús tsaynö parlaykaptinmi espädankunawan y qerunkunawan atskaq runakunata pushashqa apostolnin Judas Iscariote charqan. Tsay runakunataqa mandaq sacerdötikuna, ley yachatsikuqkuna y Israel mayor runakunam mandayarqan. 44Manarä charmi pushanqan runakunata yätsir Judas nirqan: <<Mayqantapis mutsar saludanqä kaqmi Jesús kanqa. Payta prësu tsariyanki>>.
45Chaykurnam <<¡rabí!>> nir Jesústa mutsaskirqan. 46Tsaynö mutsaykuptinmi Jesústa prësu tsariyarqan. 47Tsariyaptinmi juk discïpulun espädanta jipiskir mas mandaq sacerdötipa sirviqninpa rinrinta roquskirqan.
48Runakunatanam Jesús nirqan: <<¿Imanirtä suwamannö espädaykikunawan y qeruykikunawan shayämurquyki? 49Qoyay qoyay templupa patiunchö qamkunawan kaykaptï#Luc. 19.47; 21.37. ¿imanirtä tsaychö prësu tsariyämarqaykitsu? Peru Tayta Diospa palabran ninqannöllam llapanpis cumpliykan>>.
50Jesústa prësu tsariskiyaptinnam discïpulunkuna dëjaskir qeshpir aywakuyarqan. 51Juk jövinllam säbanasnin aqshushqa qepanta aywarqan. Tsay jövinnam prësu tsariyta munayaptin 52aqshuranqan säbanasta dëjaskir qallapächulla qeshpir aywakurqan.
Jesústa mas mandaq sacerdöti tapunqan
Mateo 26.57-68; Lucas 22.54-55, 63-71; Juan 18.13-14, 19-24
53Tsaypitanam mas mandaq sacerdötiman Jesústa apayarqan. Tsaymanmi mandaq sacerdötikuna, Israel mayor runakuna y ley yachatsikuqkuna qorikäyarqan. 54Karu qepallanta aywarmi ruri patiuyaq Pedro yaykurqan. Yaykuskirmi templu cuidaq wardiakunawan ninachö mashakur jamaraykarqan.
55Tsaychömi mandaq sacerdötikuna y llapan Sanedrín juezkuna Jesústa wanutsiyta munar testïgukunata ashiyarqan llullakur Jesúspa contran parlayänanpä. Peru mayjina ashirpis wanutsishqa kananpänöqa manam ima jutsantapis tariyarqantsu. 56Manakaqkunata parlar contran atskaq shärirpis kikinkunapuram contranakuyarqan. 57Tsaypitanam wakin runakuna manakaqta parlar Jesúspa contran shärir niyarqan: 58<<Noqakunam kay runa parlanqanta wiyayarqü: <Noqaqa templuta juchuskatsirmi kimsa junaqllachö juk templutana shäritsishä. Tsay templutaqa manam runakunatsu shäritsiyanqa> >>.#Juan 2.19.
59Jesúspa contran tsaynö niyaptinpis manam wakin testïgukuna niyanqannötsu karqan.
60Tsaymi mas mandaq sacerdöti sharkur Jesústa tapurqan: <<Tsaynö niyäshuptiki ¿manaku imatapis ninki? ¿Rasun kaqtaku niyan o manaku?>>
61Tsaynö tapuptinpis Jesúsqa manam imatapis nirqantsu. Tsaymi mas mandaq sacerdöti yapay tapurqan: <<¿Qamku Diospa Tsurin Cristo kanki?>>
62Jesúsnam nirqan: <<Noqam Kä.#14.62 Noqam Kä nirqa Jesucristo tantiyatsirqan kikin Dios kanqantam. Tsaypita masta musyanaykipä liyinki Éxo. 3.14; Juan 10.30-33. Kananpitam Runapa Tsurinta rikayanki poderyuq Diospa derëcha kaq lädunchö jamaraykaqta y pukutay jananchö ciëlupita shamuykaqta>>.#Dan. 7.13.
63Tsaynö niptinmi mas mandaq sacerdöti pasaypa rabyarnin sotänantapis rachir nirqan: <<¿Imapänatä mas testïgutapis munantsik? 64Wiyayarquykinam Tayta Diospa contran parlanqanta. Kanan ¿imatatä niyanki?>>
Tsaynö niptinmi Jesústa wanutsiyänanpä llapan niyarqan.#Lev. 24.16. 65Tsaymi wakinkuna toqapur ñawinta vendarkur kutar niyarqan: <<¡Mä niyämay pï kutashunqaykitapis!>> Tsaynöllam templu täpaq wardiakunapis maqayarqan.
Jesústa Pedro ñëganqan
Mateo 26.69-75; Lucas 22.56-62; Juan 18.15-18, 25-27
66Ruri patiuchö Pedro kaykaptinmi mas mandaq sacerdötipa sirviqnin warmi charqan. 67Ninachö mashakuykaqta rikaykurmi Pedruta nirqan: <<Qampis Nazaretpita Jesúswanmi purirquyki>>.
68Pedrunam ñëgar nirqan: <<Noqaqa manam payta reqïtsu. Imatarä parlakunkipis>>.
Tsaynö niskirmi patiu yaykunaman witikurqan. Tsay höram gällu cantaskirqan. 69Tsaychöpis tsay sirviq warmi yapay Pedruta rikaykurmi tsaychö kaykaq runakunata nirqan: <<¡Kay runaqa Jesúswanmi purishqa!>>
70Tsaynö niptinmi Pedro yapay ñëgarqan. Tsaypita rätullantanam tsaychö kaykaq runakuna Pedruta yapay niyarqan: <<Qamqa rasunpam paywan puriq kanki. Galilea runam kanki. [Galilea runakunanömi parlankipis]>>.
71Pedrunam jurarnin nirqan: <<¡Tsay runataqa manam reqïtsu!>>
72Tsay höram gällu yapay cantaskirqan. Tsaymi Pedro yarpaskirqan Jesús ninqanta: <<Gällu manarä ishkay kuti cantaptinmi kimsa kuti ñëgamanki>>.
Tsayta yarpaskirmi pasaypa pësakurnin waqarqan.
Currently Selected:
Marcos 14: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.