Marcos 15
15
Pilatuman Jesústa apayanqan
Mateo 27.1-2, 11-14; Lucas 23.1-5; Juan 18.28-38
1Tsaypita patsa waraykaptinnam mandaq sacerdötikuna, Israel mayor runakuna, ley yachatsikuqkuna y llapan Sanedrín juezkunapis qorikaykur Jesústa wanutsiyänanpä willanakuyarqan. Willanakuskirnam Jesústa wataykur Pilatuman apayarqan. 2Chaykatsiyaptinnam Pilato tapurqan: <<¿Rasunpaku Israel runakunapa mandaqnin rey kanki?>>
Jesúsnam nirqan: <<Rasun kaqtam nirquyki>>.
3Tsaychömi mandaq sacerdötikuna Jesúspa contran imaykata niyarqan. 4Tsaymi Jesústa Pilato yapay tapurqan: <<¿Manaku imatapis ninki imaykata contrayki niyaptin?>>
5Tsaynö niptinpis Jesús manam imatapis parlakurqantsu. Tsaymi Pilato mantsakashqa ima niytapis puëdirqantsu.
Jesústa crucificayänanpä Pilato mandanqan
Mateo 27.15-26; Lucas 23.13-25; Juan 18.39—19.16
6Cada watam Pascuachö runakuna mañakuyanqan prësuta Pilato qarquq. 7Tsay watam Barrabás jutiyuq runa prësu wichqaraykarqan. Paymi autoridäkunapa contran shärinqanpita y runata wanutsinqanpita cumpinchinkunawan carcelchö wichqaraykarqan. 8Tsaymi runakuna Pilatuman aywaykur juk prësuta tsay watapis qarqunanpä mañakuyarqan. 9Pilatunam tapurqan: <<¿Munayankiku Israel runakunapa mandaqnin reyta qarqunäta?>>
10Pilato musyarqanmi Jesústa chikir mandaq sacerdötikuna payman prësu apayanqanta.
11Tsaynö niptinmi mandaq sacerdötikuna tsaychö kaykaq runakunata yachatsiyarqan: <<Barrabásta qarquy>> niyänanpä. 12Barrabásta qarqunanpä niyaptinmi Pilato nirqan: <<Israel runakunapa mandaqnin reyta ¿imatatä rurashä?>>
13Tsaynö niptinmi jinchipa niyarqan: <<¡Crucificay!>>
14Pilatunam tapurqan: <<¿Ima jutsatatä rurashqa?>>
Tsaynö niptinpis runakuna masrä qayararmi niyarqan: <<¡Crucificay!>>
15Tsaynö niyaptinmi runakunapita alli rikashqa kayta munar Barrabásta Pilato qarqurqan. Jesústanam pasaypa asutaskatsir crucificayänanpä soldädukunaman entregarqan.
Jesústa soldädukuna asipäyanqan
Mateo 27.27-31; Juan 19.2-3
16Tsaypitanam soldädukuna Jesústa apayarqan Pilatupa despächunpa patiunman. Llapan tröpa#15.16 Tröpa complëtuqa joqta pachak (600) soldädukunam kayarqan. soldädukuna tsayman qorikaykurmi 17granäti cäpata aqshurkatsir kashapita awashqa corönata umanman jatitsiyarqan. 18Tsaynö jatirkatsirmi asipar niyarqan: <<¡Alabashqa katsun Israel runakunapa mandaqnin rey!>>
19Tsaypitanam carrïzuwan Jesústa umachö wiruyarqan. Toqapurmi adoraq tukurnin puntanman qonqurikuyarqan. 20Tsaynö asiparmi granäti cäpata lloqtiskatsir kikinpa röpantana jatitsiyarqan. Tsaypitanam crucificaq apayarqan.
Jesústa crucificayanqan
Mateo 27.32-44; Lucas 23.26-43; Juan 19.17-27
21Jesústa crucificayänanpä apaykäyaptinmi Simón jutiyuq runa chakrapita kutiykämurqan. Payqa Cirene nacionpitam y Alejandrupa y Rufupa papäninmi karqan.#Rom. 16.13. Paytam Jesús apaykanqan cruzta umrutsiyarqan. 22Tsaypitanam Jesústa chätsiyarqan Gólgota niyanqanman. Gólgota ninanqa Calavëra Sitiu ninanmi. 23Tsaychö mïrrawan takushqa vïnuta uputsiyta munayaptinpis manam upuyta munarqantsu.#15.23 Tsaynö uputsiyta munayarqan alläpa nanayta Jesús mana mayananpämi.
24Jesústa crucificaskirnam röpanta mayqanpis apananpä suertiyayarqan.#Sal. 22.18. 25Crucificayanqan höram wäray las nuëvinö karqan. 26Imapita wanutsiyanqantapis runakuna musyayänanpämi letrëruchö qellqashqa karqan: <<Kay runam Israel runakunapa mandaqnin rey>>.
27Jesús crucificaraykanqan lädunmanmi ishkay ladronkunatapis crucificayarqan, jukninta derëcha kaq lädunman y juknin kaqtana itsuq kaq lädunman. 28[Tsay ladronkunatawan crucificarmi Tayta Diospa palabranchö ninqanta cumpliyarqan. Tsaychömi nin: <<Jutsasapa runatanömi rikayarqan>>.]#Isa. 53.12.
29Jesús crucificaraykaqta rikarmi tsaypa päsaq runakuna asipäyarqan. Umankunata awirmi#Sal. 22.7; 109.25. niyarqan: <<¡Väya! Templutapis juchuskatsir kimsa junaqllata shäritsinaykipä nikarqa#Mar. 14.58; Juan 2.19. 30mä salvakur cruzpita yarpamuy>>.
31Tsaynöllam mandaq sacerdötikuna y ley yachatsikuqkunapis Jesústa asipar kikinpura niyarqan: <<Wakinta salvarpis kikinqa manam salvakuyta puëdintsu. 32Israel runakunapa mandaqnin rey Cristo karqa mä cruzpita yarpamutsun. Yarpamuptinqa criyishunmi>>.
Tsaynöllam Jesúspa lädunchö crucificashqa kaykaq runakunapis burlakuyarqan.
Jesús wanunqan
Mateo 27.45-56; Lucas 23.44-49; Juan 19.28-30
33Pullan junaqpita hasta las tresyaqmi patsa tsakaskirqan. 34Tsay höram jinchipa Jesús nirqan: <<Eloi, Eloi, ¿lama sabactani?>>
Tsay ninanqa <<Tayta Dios, Tayta Dios, ¿imanirtä dëjamanki?>> ninanmi.#Sal. 22.1.
35Tsaynö ninqanta wiyarmi tsaychö kaykaq wakin runakuna niyarqan: <<Profëta Elíastam qayaykan>>.
36Tsaynö niyaptinmi juk runa ras aywar pochquq vïnuman esponjata ushmaskatsir carrïzupa puntanman watarqan. Tsayta Jesúspa shiminman shoqunanpä churarmi#Sal. 69.21. nirqan: <<Mä rikashun cruzpita jipinanpä Elías shamunäkush>>.
37Tsaypitanam jinchipa qayaraskir Jesús wanuskirqan. 38Tsay höram templu rurinchö tsaparaq cortïna#Éxo. 26.31-33; 2Crón. 3.14. janapita urayaq rachiskirqan. 39Jesúspa puntanchö kaykaq capitanpis Jesús [qayaranqanta wiyar y] wanunqanta rikarmi nirqan: <<¡Rasunpam kay runaqa Diospa Tsurin kashqa!>>
40Tsaychömi warmikunapis karullapita rikaraykäyarqan. Paykunawanmi kayarqan María Magdalena, Santiagupa y Josépa maman María y Salomépis. 41Tsay warmikunam Galileachö Jesús puriptin yanapar qatiräyarqan.#Luc. 8.2-3. Tsaynöllam tsaychö kaykäyarqan Jesúswan Jerusalénman aywaq atskaq warmikunapis.
Jesústa pampayanqan
Mateo 27.57-61; Lucas 23.50-56; Juan 19.38-42
42Jamay junaqpä alistakuyänan junaq tardina kaptinmi#15.42 Jamay junaqpä alistakuyänan junaqqa viernismi karqan. Israel runakunapäqa jamay junaq qallaykun viernes las seis de la tardim. 43Arimateapita José Pilatuman aywarnin mana mantsariypa rugakur nirqan: <<Jesúspa ayanta pampanäpä dëjapaykamay>>.
Joséqa Israel runakunapa autoridäninmi karqan. Paypis Tayta Diospa mandakuynintam shuyaraykarqan.
44Tsaynö rugaptinmi Pilato yarpachakur nirqan: <<¿Wanushqanatsurä kanman?>> Tsaymi wanunqanta musyananpä capitanta qayatsirqan. 45Wanushqana kanqanta willaptinmi Jesúspa ayanta pampananpä Joséta awnirqan.
46Tsaymi lïnupita rurashqa säbanasta rantiskir Jesúspa ayanta cruzpita jipiskir piturqan. Tsaypitanam qaqachö uchkushqa sepultüraman churaykur jatunkaray rumiwan punkuta tsaparqan. 47María Magdalena y Josépa maman Maríam mayman pampayanqantapis rikayarqan.
Currently Selected:
Marcos 15: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.