Marcos 13

Templuta juchutsiyänanpä kanqanta Jesús willanqan

Mateo 24.1-2; Lucas 21.5-6

1Templupa patiunpita yarquykaptinmi juk discïpulun Jesústa nirqan: <<¡Rabí, rikay! ¡Kuyayllapä jatusaq rumikunawanmi templuta y ñöpanchö kaq cuartukunatapis shäritsiyashqa!>>

2Jesúsnam nirqan: <<Kay llapan rikayanqaykita chipyaqmi juchutsiyanqa. Manam ni juk rumillapis pirqaraykar quëdanqatsu>>.

Manarä kutimuptin imanö kananpä Jesús ninqan

Mateo 24.3-14; Lucas 21.7-19

3Templu tsimpan Olivos jirkanchö kikillankuna jamaykarmi Pedro, Santiago, Juan y Andrés Jesústa tapuyarqan: 4<<Taytay, willaykayämay. ¿Imaytä ninqaykinö kanqa? Tsaynö kananpä ¿ima señaltä kanqa?>>

5Jesúsnam nirqan: <<Cuidädutä pipis engañayäshunkiman. 6Atskaqmi jutïchö shamur niyanqa <noqam Cristo kä>. Tsaynö nirmi atskaq runakunata engañayanqa. 7Guërra kaptinpis y guërra kananpä kanqanta musyarpis ama mantsayaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu. 8Juk nacionmi juk nacionwan guërrata rurayanqa y juk marka runakunam juk marka runakunawan wanutsinakuyanqa. Tsaynöllam maytsaychöpis terremötu kanqa. Mallaqaypis pasaypam kanqa. Tsay ñakaykunaqa qallaykunanllarämi kanqa.

9<<Cuidädu kayanki. Chikiyäshurnikim prësu tsariykur autoridäkunaman apayäshunki. Sinagögakunachöpis castigayäshunkim. Noqa raykurmi gobernadorkunamanpis y reykunamanpis prësu apayäshunki. Tsaynöpam willakuynïta paykunatapis willayanki. 10Manarä kay patsa ushakaptinmi maytsay nacionchöpis noqapä willakuyanqa.

11<<Autoridäkunaman apayäshuptiki ama llakikur niyankitsu <¿imatarä nishä?> Tsay höram imata parlayänaykipäpis Espíritu Santu tantiyatsiyäshunki. Manam kikikikuna yarpäyanqaykitatsu parlayanki, sinöqa Espíritu Santu tantiyatsiyäshunqaykitam.#Mat. 10.17-20; Luc. 12.11-12. 12Noqa raykurmi wawqintapis, tsurintapis y papänintapis wanutsiyänanpä autoridäkunaman entregayanqa. 13Noqa raykurmi pïmaypis chikiyäshunki. Tsaynö chikiyäshuptikipis wanuyanqaykiyaq criyikurqa salvashqam kayanki.#Mat. 10.22.

Ñakaykuna kananpä kanqanta Jesús tantiyatsinqan

Mateo 24.15-28; Lucas 21.20-24

14<<[Profëta Daniel qellqanqannöllam] Tayta Dios mana munanqanta templuchö rikayanki.#Dan. 9.27; 11.31; 12.11. (Kay qellqanqäta liyiqkunaqa shumaq tantiyakuyätsun.)#13.14 Kay qellqanqäta liyiqkunaqa shumaq tantiyakuyätsun ninqanqa manam Jesucristo ninqantsu kaykan, sinöqa kay libruta qellqaq Marcos yapanqanmi. Tsaynö kaykaqta rikar Judea markakunachö täraqkuna jirkakunapa qeshpir aywakuyätsun. 15Wayi jananchö kaykaqkuna#13.15 Tsay witsanmi wayita qatananpa rantin terrädu jananman tsaqllaskir mituwan lashtayaq. Tsay jananchönam awakuyaq, aqakuyaq y trïgutapis akrayaq. imankunatapis mana jipir aywakuyätsun. 16Chakrachö kaykaqkunapis ni punchun jipiqpis ama kutiyätsuntsu.#Luc. 17.31. 17¡Ay imanörä ñakayanqa qeshyaq warmikuna y llullu wamrayuq warmikuna! 18Tayta Diosta mañakuyay qeshpiyanqayki junaq tamya killachö mana kananpä.

19<<Tsay witsanqa runakuna pasaypam ñakayanqa. Tayta Dios kay patsata kamanqanpita manam imaypis tsaynöqa ñakayashqatsu. Tsaynöllam yapayqa manana imaypis tsaynö ñakayanqanatsu.#Dan. 12.1; Apoc. 7.14. 20Akranqan runakunata kuyaparmi Tayta Dios tsay ñakay junaqkunata päsatsinqa. Mana päsatsiptinqa llapanpis wanurmi ushakäyanqa.

21<< <Tayta Dios mandamunqan Cristo kaychömi kaykan> niyäshuptikipis ama criyiyankitsu. <Washachömi kaykan> niyäshuptikipis ama cäsuyankitsu. 22Tsay witsanmi Cristo tukuqkuna y llulla profëtakunapis yuriyämunqa. Runakunata criyitsiyänan raykurmi espantaypä milagrukunatapis rurayanqa. Tsaynö rurarmi Tayta Dios akranqan runakunatapis engañayta munayanqa. 23Paykunata mana criyiyänaykipä shumaq tantiyakuyay. Manarä tsaynö kaptinmi musyayänaykipä willaykä>>.

Jesús kay patsaman kutimunanpä kanqan

Mateo 24.29-44; Lucas 21.25-33

24<<Pasaypa ñakaykuna päsaskiptinnam rupaypis tsakaskinqa, killapis atsikyanqanatsu, 25qoyllurkunapis shushuyämunqa y ciëlupis siksikyanqa.#Isa. 13.10; Joel 2.10, 31; 3.15; Apoc. 6.12-13. 26Tsaypitanam runakuna rikayanqa Runapa Tsurin pukutay jananchö chipipiykar pasaypa poderyuq shamuykaqta.#Dan. 7.13; Apoc. 1.7. 27Tsaypitam angelninkunata mandamunqa akranqan kaqkunata maytsaypitapis qoriyämunanpä.

28<<Hïgus plantata rikar tantiyayay. Raprankuna tseqllimuptinmi usya tiempu qallananpäna kanqanta musyayanki. 29Tsaynöllam ninqänö päsanqanta rikar musyayanki Runapa Tsurin kutimunanpäna kanqanta. 30Rasunpam nï: Kanan tiempu runakuna manarä ushakaptinmi llapan ninqäkuna cumplinqa. 31Ciëlu y kay patsa ushakaptinpis noqa ninqäkunaqa manam ushakanqatsu.

32<<Runapa Tsurin imay junaq imay höra kutimunanpä kanqanta manam ciëluchö kaykaq angelkunapis ni Diospa Tsurinpis ni pï runapis musyayantsu.#Mat. 24.36. Tsaytaqa Papänillämi musyan. 33¡Maya mayalla kaykäyay! [Tayta Diosta mañakuyay.] Manam musyayankitsu imay kutimunanpä kanqanta>>.

34<<Shumaq tantiyakuyay. Juk runash wayinta cuidayänanpä sirviqninkunata dëjapaykur karupa aywakunä. Punku kichapaqnintanash yätsinä maya mayalla kaykänanpä.#Luc. 12.36-38. 35Tsaymi alistakushqallana kayänayki. Wayiyuq#13.35 Wayiyuqpä parlarqa kikinpämi Jesucristo parlarqan. imay kutimunanpä kanqantapis manam musyayankitsu. Patsa tsakänan höra, pullan paqas höra, gällu cantay höra o patsa wäraytsurä chämunqa. 36Mana yarpashqata chämurtä punukashqa kaykaqta tariyäshunkiman. 37Manam qamkunallatatsu nï, sinöqa llapan runakunatam. Tsaynö willaykaptïqa maya mayalla kaykäyay>>.

Currently Selected:

Marcos 13: qxo

Highlight

Copy

Compare