Marcos 12

Chakra arrendaq runakunaman iwalatsiypa Jesús yachatsinqan

Mateo 21.33-46; Lucas 20.9-19

1Tsaypitanam iwalatsiypa yachatsir Jesús nirqan: <<Juk runash chakranman üvata plantaykatsir#Isa. 5.1-2. entëru kuchunpa pirqatsinä. Üvata jaruyänanpäshi pözuta ruratsinä. Chakranta täpananpäshi törritapis shäritsinä. Llapanta ruraskatsirnash chakranta arrendakuskir juklä markapa aywakunä.

2<<Cosëcha qallaykuptinnash juk sirviqninta mandanä üva chakra arriendunpita cobrakamunanpä. 3Tsay sirviq chaykuptinshi pasaypa maqaskir jinayllata qarquskiyänä. 4Tsayshi chakrayuq runa juk sirviqninta yapay mandanä. Tsaytapis ashllirninshi [saqmar] umantapis pakiskiyänä. 5Tsaypitash juk sirviqnintana mandaptin wanutsiyänä. Tsaynöllash atskaqta mandaptinpis wakinta maqayänä y wakintana wanutsiyänä.

6<<Sirviqninkuna manana kaptinnash kuyay tsurintana mandanä. Tsay tsurinta mandarshi ninä: <Tsurïtaqa respitayanqam>. 7Tsayshi tsurin aywaykaqta rikaykur chakra arrendaqkuna willanakur niyänä: <Taqaymi kay chakrawan quëdanqa. Noqantsik chakranwan quëdanantsikpä wanuratsishun>. 8Chaykuptinnash willanakuyanqannölla wanuskatsir üva chakrapita jukläman jitariyänä>>.

9Tsaynö willakuskirnam Jesús nirqan: <<Tsay üva chakrayuq ¡imatarä tsay runakunata ruranqa! ¿Manatsurä llapanta wanutsinqa? Tsaypitam chakrantapis juktana arrendakunqa. 10¿Manaku liyiyarquyki Tayta Diospa palabran ninqanta? Tsaychömi nin:

<< <Wayi shäritsiqkuna <<kay rumiqa manam allitsu>> nir jitariyanqanmi maestra rumiman tikrashqa kaykan.

11Tsaynö kananpä Tayta Diosmi permitishqa.

Tsaypitam pasaypa espantashqa kaykantsik> >>.#12.11 Tsay rumimanmi Jesucristo iwalatsikurqan. Tsaynö nirmi tantiyatsirqan chikiyaptinpis llapanpitapis mas poderyuq kananpä Tayta Dios churanqanta.#Sal. 118.22-23.

12Jesús tsaynö niptinmi tantiyayarqan paykunapa contran parlaykanqanta.#12.12 Chakrayuqqa Tayta Diosmi. Chakrayuq mandanqan sirviqninkunanam Tayta Diospa profëtankuna. Chakrayuqpa tsurinnam Jesucristo. Chakra arrendaq mana alli runakunanam Jesucristupa contrankuna. Tsaymi prësu tsaritsiyta munarpis runakunata mantsar aywakuyarqan.

Impuestuta pägayänanpä tapuyanqan

Mateo 22.15-22; Lucas 20.20-26

13Tsaypitanam fariseukunata y Herodespa favornin shäriq runakunata Jesús kaqman mandayarqan llutanta parlatsiyänanpä. 14Chaykurnam niyarqan: <<Rabí, noqakuna musyayämi rasun kaqllata yachatsinqaykita. Manam runakuna alabayäshunaykita munartsu yachatsinki, sinöqa Tayta Dios munanqannöllam. Romachö mandaq Césarpä ¿impuestuta pägashwanku o manaku?>>#12.14 Israel runakuna yarpäyarqan Romapä impuestuta pägar Tayta Diospa contran kayanqantam. Tsaymi: <<Impuestuta pägashun>> Jesús niptinqa Diospa contran parlanqanta niyanman karqan. <<Ama pägashuntsu>> niptinqa Roma autoridäkunam rabyanäyanman karqan.

15Llutanta parlatsiyänan raykur tapuyanqanta tantiyarmi Jesús nirqan: <<¿Imanirtä llutanta parlatsimayta munayanki? Mä qellayta rikatsiyämay>>.

16Tsaynö niptinmi qellayta entregayarqan. Tsayta rikaykurmi Jesús tapurqan: <<Kay qellaychö ¿pipa reträtuntä kaykan? Tsaynölla ¿pipa jutintä qellqashqa kaykan?>>

Paykunanam niyarqan: <<Mandaq Césarpam>>.

17Tsaymi Jesús nirqan: <<Césarpa kaqtaqa Césarta entregayay. Tayta Diospa kaqtaqa Tayta Diosta entregayay>>.#12.17 Tayta Diospa kaqqa vïdantsikmi kaykan.

Tsaynö niptinmi tsay runakuna ima niytapis puëdiyarqantsu.

Wanushqakuna kawayämunanpä kanqanta tapuyanqan

Mateo 22.23-33; Lucas 20.27-40

18Tsaypitanam saduceukunapis Jesústa tapuq aywayarqan. Paykunaqa manam criyiyantsu wanuqkuna kawayämunanpä kanqanta.#Hech. 23.8. Tsaymi Jesústa tapuyarqan: 19<<Rabí, Moisés qellqanqanchömi nin: <Warmiyuq runa tsuriynaq wanuptin wawqinmi llumtsuynin viüdawan täranqa. Tsaynöpam wamrankuna kaptin tsay wanuq wawqinpa tsurinkunanö kayanqa>.#Deut. 25.5. 20Kanan niyäshayki. Juk kutish qanchis wawqikuna kayänä. Mayor kaqshi juk warmiwan casarar manarä tsurin kaptin wanunä. 21Tsayshi qepan kaq wawqinna tsay viüdawan casaranä. Paypis tsurin manarä kaptinshi wanunä. Tsaypita mas qepan kaqnash tsay viüdawan casaranä. Paypis tsurin manarä kaptinshi wanunä. 22Tsaynöllash llapan wawqinkuna tsay viüdallawan casarayänä. Tsurinkuna manarä kaptinshi llapanpis wanuskiyänä. Tsaypitanash tsay viüdapis wanuskinä. 23Wanushqakuna kawayämunan junaqqa ¿mayqanpa warminrä kanqa, qanchis wawqiwan casarashqa kaykaptinqa?>>

24Jesúsnam nirqan: <<Qamkunaqa llutantam yarpäyanki. Manam Tayta Diospa palabranta ni Tayta Dios poderyuq kanqantapis tantiyayankitsu. 25Kawaskamurqa mananam pipis casaranqanatsu, sinöqa ciëluchö angelkunanöllanam kayanqa. 26Wanushqakuna kawayämunanpä kanqanta ¿manaku Moisés qellqanqanta liyiyarquyki? Rupaykaq shirakapitam Moisésta Tayta Dios nirqan: <Noqaqa Abrahampa, Isaacpa y Jacobpa Diosninmi kä>.#Éxo. 3.6. 27Tayta Diosqa manam wanushqakunapa Diosnintsu, sinöqa kawaqkunapa Diosninmi. Tsayta mana tantiyarmi qamkuna llutanta yarpäyanki>>.

Mas cäsunantsikpä kaq mandamientu

Mateo 22.34-40; Lucas 10.25-28

28Jesús alli contestanqanta wiyarmi ley yachatsikuq runapis tapurqan: <<¿Mayqan mandamientutatä mas cäsushwan?>>

29Jesúsnam nirqan: <<Mas cäsukunantsikpä kaq mandamientum nin: <Israel runakuna, shumaq wiyakuyay. Tayta Diosnintsikqa jukllayllam. 30Tayta Diosta kuyayanki llapan shonquykikunawan, llapan voluntänikikunawan, llapan yarpaynikikunawan y llapan kallpaykikunawan>. [Tsayqa mas cäsunantsikpä kaq mandamientum.]#Deut. 6.4-5. 31Tsaynöllam jukaq mandamientupis nin: <Kikiki kuyakunqaykinö runa mayikita kuyanki>.#Lev. 19.18. Tsay ishkan mandamientukunata mas cumplinantsiktam Tayta Dios munan>>.

32Tsaymi ley yachatsikuq runa nirqan: <<Rabí, rasun kaqtam nirquyki. Rasunpapis jukllayllam Tayta Diosqa. Paypita mas juk diosqa manam kantsu.#Deut. 4.35. 33Tsay ishkay mandamientukunata cumplinqantsikqa llapan sacrificiupitapis mas allim kaykan>>.#Ose. 6.6.

34Shumaq yarpachakuykur niptinmi Jesús nirqan: <<Qamqa Diospa mandakuyninman yaykunaykipänam kaykanki>>.

Alli contestaptinmi pipis tapuyta valurarqannatsu.

Davidpitapis Cristo mas mandaq kanqan

Mateo 22.41-46; Lucas 20.41-44

35Templupa patiunchö yachaykätsirmi runakunata Jesús nirqan: <<¿Imanirtä ley yachatsikuqkuna niyan Davidpa Tsurin Cristo kanqanta? 36Espíritu Santu tantiyatsiptinmi kikin Davidpis nirqan: <Mandamaqnïtam Tayta Dios nirqan: Derëcha kaq lädüman jamakamuy llapan chikishuqnikikunata podernikiman churamunqäyaq>.#Sal. 110.1.

37<<Tsaynö nikaptinqa ¿imanöpatä Cristuqa Davidpa Tsurin kanman kikin Davidpis mandaqnin kanqanta nikaptinqa?#12.37 Cristuqa manam David casta kanqantatsu ñëgarqan, sinöqa Davidpita mas poderyuq kanqantam nirqan.>>

Jesús tsaynö yachatsiptinmi runakuna kushikuyarqan.

Ley yachatsiqkunawan fariseukuna mana alli ruraq kayanqanta Jesús ninqan

Mateo 23.1-12; Lucas 20.45-47

38Tsaypitanam Jesús nirqan: <<Cuidädutä ley yachatsikuqkunanö kayankiman. Paykunaqa runa tukurmi chaki puntanyaq röpan jatishqa puriyan. Pläzakunachöpis saludar respitayänantam munayan. 39Sinagögakunachöpis punta bancakunamanrämi jamaskiyan. Mikuyänanpä qayatsiyaptinpis mësamanrämi jamakuyan. 40Viüdakunapa imantapis qechuyan. Tsaynöllam santu tukurnin unayyaq Tayta Diosta mañakuyan. Tsaynö kayanqanpitam Tayta Dios mana kuyapaypa masrä castiganqa>>.

Pobri viüda ofrendata churanqan

Lucas 21.1-4

41Tsaypitanam templuchö ofrenda wiñakuyänan cäja frentinchö Jesús jamaykar rikarqan runakuna ofrendata wiñaqta. Tsaynöllam rikarqan rïcu runakuna atska qellayta wiñaykaqta. 42Tsayman chaykurmi juk pobri viüdapis ishkay centävullata wiñarqan. 43Tsayta rikaykurmi discïpulunkunata qayaykur Jesús nirqan: <<Rasunpam nï: Kay pobri viüdaqa llapanpitapis mas atskatam wiñashqa. 44Wakinkunaqa sobraq kaqllantam wiñayashqa. Peru kay viüdam sïqa tsaylla rantipakunanpä kaykaptinpis llapanta wiñashqa>>.

Currently Selected:

Marcos 12: qxo

Highlight

Copy

Compare