Marcos 11

Jerusalénman Jesús yaykunqan

Mateo 21.1-11; Lucas 19.28-40; Juan 12.12-19

1Jerusalénman Jesús aywarmi Olivos jirkanchö Betfagé y Betania markakunaman chäyarqan. Tsaypitam ishkay discïpulunkunata mandar 2nirqan: <<Taqay markaman aywayay. Chaykurmi pipis manarä muntanqan malta ashnu wataraykaqta tariyanki. Tsay ashnuta paskaskir apayämuy. 3Tsaychö pipis <¿imanirtä ashnuta paskaykäyanki?> niyäshuptikiqa <Señor Jesúsmi nisitan. Rasllam kutiratsiyämushä> niyanki>>.

4Discïpulunkuna aywarmi tariyarqan wayi punkuchö malta ashnu wataraykaqta. Tsay wayiqa näni kuchunchömi karqan. Paskayaptinmi 5tsaychö kaykaq runakuna tapuyarqan: <<¿Imanirtä ashnuta paskaykäyanki?>>

6Discïpulukuna Jesús yachatsinqannölla niyaptinmi <<tsayöraqa apayay ari>> niyarqan.

7Ashnuta chaykatsir punchunkunata karunarkuyaptinmi Jesús muntarqan. 8Muntashqa aywaptinmi atskaq runakuna punchunkunata jakunkunata näniman mashtar Jesústa kushishqa chaskiyarqan. Wakinnam palmakunapa rämankunata pakiskir näniman mashtayarqan. 9Tsaymi puntanta y qepanta aywaqkuna kushikur niyarqan: <<¡Hosana!#11.9 Israel runakuna Hosana niyarqan Tayta Diosta alabarmi. ¡Tayta Diospa jutinchö shamuq runa alabashqa kaykullätsun! 10¡Paymi unay castantsik Davidnö mandamaqnintsik rey kananpä shamuykan! ¡Ciëluchöpis alabashqa kaykullätsun!>>

11Jerusalénman yaykurnam templupa patiunman Jesús aywarqan. Tsaychö rikapakuskirmi tardina kaptin chunka ishkay discïpulunkunawan Betania markaman kutiyarqan.

Hïgus plantata Jesús tsakitsinqan

Mateo 21.18-19

12Waraynin junaq Betaniapita Jerusalénman Jesús kutiykarmi mallaqaskirqan. 13Tsaymi hïgus plantata raprayuqtana karupita rikaykur wayuyninta ashiq aywarqan. Ashirpis wayunanpä tiempun manarä kaptinmi raprallanta tarirqan. 14Tsaymi nirqan: <<¡Kananpitaqa manam imaypis wayunkinatsu!>>

Tsaynö ninqantam discïpulunkuna wiyayarqan.

Templuchö rantikuqkunata Jesús qarqunqan

Mateo 21.12-17; Lucas 19.45-48; Juan 2.13-22

15Jerusalénman chaykurnam templupa patiunman yaykuskir rantikuqkunata y rantipakuqkunatapis Jesús qarqurqan. Tsaynöllam qellay trocatsiqkunapa mësankunatapis#11.15 Jesús kawanqan witsanmi Roma runakunapa qellayninta Israel runakuna manijayaq imatapis rantipakuyänanpä. Peru Tayta Diospä ofrendata apayänanpämi sïqa templuman apananpä kaq qellaytarä trocatsiyaq. y paluma rantikuqkunapa cajonninkunatapis wikapar usharqan. 16Tsaynöllam runakunata micharqan templupa patiunpa imatapis mana päsatsiyänanpä. 17Tsaypitanam nirqan: <<¿Manaku qellqashqa kaykan: <Wayïqa maytsay nación runakuna mañakayämänanpämi kanqa>?#Isa. 56.7. Tsaynö nikaptinpis qamkunaqa suwakunapa machayninmanmi tikratsiyarquyki>>.#Jer. 7.11.

18Tsaynö ninqanta wiyarmi mandaq sacerdötikuna y ley yachatsikuqkuna willanakuyarqan imanöpapis Jesústa wanutsiyänanpä. Peru Jesús yachatsinqanta runakuna kushishqa chaskiyaptinmi paykunata mantsar prësu tsariyarqantsu. 19Tsakaykaptinnam Jerusalénpita yarquskir Jesús aywakurqan.

Hïgus plantata tsakishqatana tariyanqan

Mateo 21.20-22

20Waraynin wäray Jerusalénman discïpulunkunawan Jesús kutirmi hïgus planta pasaypa tsakishqana kaykaqta rikayarqan. 21Jesús ninqanta yarpaskirmi Pedro nirqan: <<Rabí, <manam wayunkinatsu> ninqayki hïgus plantata rikay. Pasaypa tsakishqanam kaykan>>.

22Jesúsnam nirqan: <<Tayta Diosman yärakuyay. 23Rasunpam nï: Pipis llapan shonqunwan Tayta Diosman yärakur y ninqannö kananpä kanqanta criyirqa taqay jirkata <kaypita lamarman ayway> niptinpis aywanqam.#Mat. 17.20; 1Cor. 13.2. 24Tayta Diosta mañakurqa chaskiyänaykipä kanqanta criyiyanki. Tsaynö criyir mañakuyanqaykitam chaskiyanki.

25<<Tsaynölla Tayta Diosta mañakuyanqayki höra rabyatsishuqnikita manarä perdonashqa karqa juklla perdonayay. Tsaynö perdonayaptikiqa qamkunatapis ciëluchö kaykaq Papäniki perdonayäshunkim.#Mat. 6.14-15. 26[Runa mayikita mana perdonayaptikiqa qamkunatapis jutsa rurayanqaykita manam perdonayäshunkitsu]>>.

Jesústa sacerdötikuna tapuyanqan

Mateo 21.23-27; Lucas 20.1-8

27Tsaypitanam discïpulunkunawan Jerusalénman Jesús chäyarqan. Templupa patiunchö Jesús puriykaptinmi mandaq sacerdötikuna, ley yachatsikuqkuna y Israel mayor runakunapis 28tapuyarqan: <<Qamqa ¿pipa poderninwantä rantikuqkunata qarqurquyki? ¿Pitä tsaynö qarqunaykipä nishurquyki?>>

29Jesúsnam nirqan: <<Qamkunatapis mä tapushayki. Tapunqäta niyämaptikiqa noqapis willayäshaykim pipa poderninwan qarqunqäta. 30¿Pitä Juanta mandamushqa bautizananpä? ¿Tayta Diosku o runakunallaku? Mä niyämay>>.

31Tsaynö tapuptinmi kikinkunapura niyarqan: <<Tayta Dios mandamunqanta nishqaqa: <¿Imanirtä criyiyarquykitsu?> nimäshunmi. 32Tsaynöllam runakuna mandayämunqanta nishwantsu>>.

Juan profëta kanqanta llapan runakuna yarpäyaptinmi runakunapita mantsapakur tsaynö niyarqan.

33Tsaymi Jesústa niyarqan: <<Manam musyayätsu pï mandamunqantapis>>.

Jesúsnam nirqan: <<Noqapis manam willashaykitsu pipa poderninwan rantikuqkunata qarqunqäta>>.

Currently Selected:

Marcos 11: qxo

Highlight

Copy

Compare