O AMSAL 5
5
O hohininga o hudalika
1Ahingohaka, nohihigihene ngohi! Natailako nohidodiai ahi barija deʼ o mangarati tonïdoto-dotoko ngonaika, 2hupaya ngona nohiöriki sarakia ngona kokiani nao anidiri deʼ notemo-temo hokä o nyawa de manga ganako. 3O ngoheka monaka-nakali amiuru mamutiti hokä o madu deʼ amidemo-demo yatauru anihininga, 4mä nako mata-mata ipahaka igögogere duga-duga mamali-mali deʼ o huha deʼ o hangihara. 5Ngona monitatauru o nyawa yohone-honenge manga duniauku; o ngekomo manönonu madumutu o honengika. 6Münanga motatapua o ngekomika yödumu-dumutu o ngango; koma nakoua münanga morehenoka o ngekomino gënanga.
7Hababu gënanga, o ngoha-ngohaka, kokiani nihigihene ahidemo-demo deʼ kokiani uha niahaduliua. 8Nomatingaka nomakökurutika deo ngoheka hokogënanga! Maboboloi uha nomahitigi amitauika. 9Nako ngona nododiawo deo ngoheka gënanga, ngona aha anihoromati ihihanga deʼ anijiwa aha yaora o nyawa yanako-nakoua o dora deo hayanga kanoma göikahi. 10Ani kaya aha imata o nyawa mahomoa yaol̄omo, deʼ nomahi kokangelaika mahasili idadi tonyawa mahomoa nänako-nakoua. 11Mabaha ngona aha notaiana, nako aniröehe imata o panyake yaol̄omo. 12De ngona aha notemo, ”Uwee, yadodoaho ngohi todohata o nasihati. Yadodoaho ngohi toluku ihitaaere? 13Ngohi toluku tahigihene ahiguru-guru deʼ toluku tadomoteke önanga. 14Tanako-nakoua ngohi ihiotakoka o kawaha manga lakoka.”
15Hababu gënanga nosetia ngonihekatika mahirete deʼ nomi hidöaka anihayangi munangika dika. 16Koiwa mafaida ngonaika nolingiri o sanangi o nyawaika de kongoni hekatua. 17O sanangi gënanga itingakoka mangale ngona de ngoni hekata, ko deo nyawa mahomoaua. 18Hababu gënanga, kokiani nosanangi de ngoni hekata mahirete; nalingiri o ngongike isosanangi o momolehika nomi kawi-kawingoka – 19o moholehe mohöhailoa deʼ mopalesa hokä o maijanga. Mal̄aikala amiröehe maduku mahöhailoa salalu yadiai nomi hidodogohanga deʼ amidora de amihininga ngona nohidaluku. 20Okia mafaida nänahihu o ngoheka mahomoa, ahi ngohaka? Mangale okia nädodiawo o ngoheka yonaka-nakali? 21Ma Jou wamake hagala moi-moi yadodiai o nyawa. Kiaikadika o nyawa yoiki ma Jou watötailako. 22O nyawa madorou manga baradoha hokä o dadagoko yaliko o nyawa gënanga mahirete. 23Unanga wohonenge karana watarimaua o nasihati. Ai fuma iwi ao ünanga o boditoika.
