O AMSAL 6
6
O nasihati-nasihati mahomoa
1Ahingohaka, mudukua mamoi iböto ngona nïjaji womatengoika la noma hitagongo ai nagimi. 2Deʼ yakunu idadi anidemo-demo initipuoka deʼ anijaji mahirete iniotaka o huhauku. 3Nako itiai hoko gënanga, ahingohaka, ngona nagaka o nyawa gënanga ai kuaha magoronaka. Mä nënangadoka madodagi ngona yakunu nomahirehene: itaiti noiki o nyawaika gënanga; kokiani duru nogahoko hupaya ünanga wömodeke ngona wonihibebasi. 4Wahiohi noiki nomäidu, deʼ uha nomahibatongo. 5Ani diri nohilapahi o dadagokino gënanga hokä o totaleo ekola o maijanga madiri ilapahi yolimo-limorino.
6O nyawa yototebeturu kokiani yatailako ihidodiai o ngago mawowango madodagi deʼ imädotoko enangika. 7O ngago gënanga koiwa matutuda, koiwa yäkokuaha ekola yatötailako, 8mä madekanino o gugutuku maöraha ënanga imädoomu o bilaono mangale o habirokata maöraha. 9Hiädono muruonoka madebeturu gënanga wömodeke womä idu? Muruonoka ünanga wömodeke womomiki? 10#Ams. 24:33-34 Unanga wogogeruku womalugöino la womahibatongo, deʼ ünanga wotemo, ”Ah, ngohi tomäidu tohijai-jai, ngohi ihikioko.” 11Mä magogiriaka ünanga womäidu, ünanga iwitapal̄u o kuranga deʼ o mihikini iboa hokä yoora-ora de manga daeoka.
12O nyawa madorou deʼ yanakoua o adati yoelu-eluku kiaika honanga. 13Unanga wahilölakobikini deʼ wohinonako mangale wäbudi. 14Ai dibanga itorou iomanga de odatoro madorou de wodiai o ributu kiaika honanga. 15Mata-mata gënanga aha idadi o hababu itodokanino o bodito yatapal̄u ai diri mahirete, deʼ ünanga wowede-wederuku.
16-19Naga o perekara o gahumu tumidi ma Jou wödohata deʼ yakunua wohigumal̄a:
O jago iede-edenge,
o uru ielu-eluku,
o giama yätoma-toma o nyawa manga howono koiwa-iwa,
o dibanga yatätatoro o hali itotorou,
o l̄ou itai-taiti yödumutu o dorou,
o hakihi woelu-eluku,
deʼ o nyawa yododiai o haturu o dodiawo mahidogoronaka.
O hohininga o hudalika
20Ahingohaka, nadiai okianaga ani ama wohipopareta, deʼ uha nawohanga hagala minasihati ngoni ayo. 21Kokiani nohohininga salalu toönanga manga demo-demo deʼ nagogono gënanga anihininga magoronaka. 22Hagala manga dodotoko toönanga aha ngona inituda o dodagi magoronaka, ngona inïgoana o hutu-hutu, deʼ ihihidöaka o hidumutu ngonaika maöraha ngona nomimikino. 23Hagala manga hidumutu anidimo-dimono hokä o hilo itotararono; toönanga manga dodaaere inihidumutu ngonaika o wowango maoa-oa madodagi. 24De hoko gënanga ngona inihitingaka magurutika deo ngongoheka yonaka-nakali, deʼ o nyawa mahomoa manga hekatika manga bobaja ibiha-biha. 25Uha ngona inihibaja de toönanga manga hailoa, uha anihininga ilakete de toönanga manga lako inihi ole-olete. 26O ngoheka manga röehe yahuku-hukunu yakunu yahihewa deo gandum o dodai moi maija, mä yohowono deo nyawa mahomoa manga hekata kokiani ihi fangu de manga jiwa.
27Kaiyakunu o nyawa yatotirino o uku de manga baju youkuua? 28Kaiyakunu o nyawa yadoko o uku mangaboho de manga lou youkuua? 29Genanga mabodito imatero dehädodiawo o nyawa mahomoa manga hekata. O naguna wadiai hoko gënanga aha iwï rehenua o hukumanga. 30Nako o nyawa wotohiki o inomo, ngaroka karana iwihahini, ünanga aha iwihikauku. 31Deʼ nako ünanga iwitagoko kokiani ünanga wofangu wohigilio ilape tumidi; mangale gënanga kokiani ünanga wahihanga toünanga ai arata mata-mata. 32Mä sarakia deo nauru wohöhowo-howono? Unanga wabodito ai diri mahirete! Unanga duru wobodo! 33Unanga aha iwihangihara deʼ iwihohedu. Ai romanga aha idadi ipeseke kahiado-adonika. 34Hababu, de ai manarama gënanga o ngoheka amirokata gënanga idadi ai hininga mahiri, hiädono ai dohata kahägiria. Deʼ nako ünanga womahibalahi, ünanga aha koiwa ai dora de ai hayanga. 35Unanga yakunua iwihibaja deo tiwi; o hewa hokokia ma amoko mayakunua yahihanga ai dohata.
