O BILANGAN 8
8
Madodadi o hilo ihi gogere
1-2 #
Kel. 25:31-40, 37:17-24 Ma Jou witemo o Musaika, ”Nahetongo o Harunika maöraha ünanga wohidiai mahilo tumidi mahilo gënanga mal̄okuoka, ünanga kokiani wohidiai hoko gënanga marupa hiädono yatararono mahilo gënanga mal̄ou mahimangoka.” 3O Harun wadiai okia ma Jou wohi popareta. Unanga wohidiai o hilo-o hilo gënanga yohimangika o hilo mal̄ou mahimangoka. 4O hilo mangï gënanga, hiädono mal̄okuino deʼ mabunga-bunga maporomu ihidiai de o gurasi yatutukoka, imoteke ma conto ma Jou wohi mato-matoko o Musaika.
O Lewi manyawa yägoraka
5Ma Jou wïtemo o Musaika, 6”Nahitingaka o Lewi manyawa de o Israel manyawa mahomoa deʼ nadiai o debini ma upacara ma-ngale önanga de madodagi nënanga 7nadohurero önanga de o akere mangale o debini ma upacara deʼ nähuloko yakori manga röehe mata-mataika deʼ yafoka toönanga manga pakeanga. De hoko gënanga önanga yotebini. 8Daha nä huloko önanga yal̄e o hapi manauru magö o dutu moi de o huhuba ihi dodiaiuku de o gopuno ihi ganu o minya. Daha ngona kokiani nal̄e o hapi manauru mahomoa o dutu moi mangale o baradoha ma apongo mahuhuba. 9De ipaha nätoomu yongodumu o Israel manyawa deʼ nä huloko o Lewi manyawa ima okoino Ahi Tau mahimangoka. 10O kawaha kokiani yogelenga toönanga manga giama o Lewi manyawa manga mumukuku, 11deʼ o Harun kokiani wahi huba o Lewi manyawa gënanga hokä o huhuba yatinga-tingakoka Ngohino, o Israel manyawaika, hupaya önanga yakunu yadiai Ahi pupuji. 12Daha o Lewi manyawa kokiani yogelenga toönanga manga giama o hapi manauru o dutu hinotö gënanga mahäekuku; o dutu moi kokiani ihihuba mangale o baradoha ma apongo mahuhuba, deʼ o dutu moioli mangale o huhuba yatö tuhu-tuhuku de o upacara gënanga o Lewi manyawa yahitebini.
13Nä tingaka o Lewi manyawa mangale Ngohi deʼ nähuloko önanga yä leleani o Harun deʼ aingoha-ngohaka. 14De o upacara gënanga ngini nia hitingaka o Lewi manyawa de o Israel manyawa mahomoa hupaya yodadi Tongohi. 15Ngona nadiai o upacara o Lewi manyawa gënanga imahi döaka de ibötoönanga manga haku mangale yomanarama ahi Tau magoronaka. 16Ngohi tahidadioka önanga mata-mata o Israeloka manga ngohaka o Nauru mariaka manga dagali; hoʼ önanga ganga itingakika mangale Ngohi. 17#Kel. 13:2 Maöraha Ngohi tä toma mata-mata o ngohaka o nauru o riaka o Mesir maberera, o ngohaka o nauru o riaka o Israeloka manga tau madol̄a yogetongo deʼ moi-moi o aiwani ma ayo madodi hiraka ingohaka idadioka Tongohi tomä dinga-dingakoka. 18O öraha nënanga hokä mata-mata o Israeloka manga ngohaka o riaka manga dagali, Täl̄ë o Lewi manyawa, 19deʼ o Lewi manyawa gënanga Tahi döakoka o Harun de aingoha-ngohakika, hupaya yakunu yomanarama mangale o Israel ma nyawa Ahi Tau magoronaka. Inoli hupaya önanga yogahoko Ahi apongo mangale o Israel manyawa hupaya o Israel manyawa gënanga ya tapal̄ua o bodito nako önanga yoboa itigika holi o ngï itebi-tebinika gënanga.”
20Mangale karana gënanga o Musa, o Harun deʼ o Israel manyawa yongodumu yahihuba o Lewi manyawa ma Jouika, hokä ma Jou wohipareta o Musaika. 21O Lewi manyawa gënanga yadiai manga diri madebini ma upacara deʼ yafoka toönanga manga pakeanga, de o Harun wahi huba önanga hokä o ngongike itinga-tingakoka ma Jouika. Unanga wadiaiö o debini ma upacara mangale önanga. 22O Israel manyawa yadiai hagala wohi popareta ma Jou o Musaika yakorona o Lewi manyawa. De hoko gënanga o Lewi manyawa yamake o haku mangale yomanarama ma Jou Ai Tau magoronaka o Harun de aingoha-ngohaka manga tutuda matimiuku.
23Ma Jou wïtemo o Musaika, 24”Moi-moi o Lewi manyawa manga umuru o taongo monaoko de motoa de ihika il̄e, kokiani yadiai o manarama Ahi Tau ma goronaka, 25deʼ manga umuru o taongo moritoa önanga yahibebasi manga manaramoka. 26Genanga de ibötoönanga yakunu yäriwo o Lewi manyawa mahomoa yomomanarama Ahi Tau magoronaka, mä önanga yakunokaua de manga manarama itatapu. Hoko gënanga madodagi itatoro o Lewi manyawa manga manarama.”
Currently Selected:
O BILANGAN 8: TLB
Highlight
Share
Compare
Copy
Want to have your highlights saved across all your devices? Sign up or sign in
