O BILANGAN 9
9
O Paskah marameanga mahinotoka
1 #
Kel. 12:1-13
O mede moioka o taongo mahinotoka magoronaka ipahaika o Israel manyawa yamal̄a o Mesir, ma Jou wïtemo o Musaika o Sinai matonaka ikokakahaka. Ma Jou wato, 2-3”O mede nënanga o wange ngimoi de aitoka, imulaenge maöraha o wange itumunu, o Israel manyawa kokiani ihi mulia o Paskah imoteke o datoro ihi totatapuoka.” 4O Musa wähuloko o Israel manyawa ihi mulia o Paskah. 5Onanga ihi mulia o Sinai matonaka ikokakahaka o bobimaoa o mede moioka o wange ngimoi de iatoka. Mata-mata önanga yadiai ima daene hokä ma Jou wohi popareta o Musaika.
6Mä toönanga manga hidogoronaka naga yamuruono naga yo peseke karana yapekeoka o mayeti, hiädono yakunua ihi mulia o Paskah o wange gënanga. Onanga gënanga yoiki yähimanga o Musa deʼ o Harun 7deʼ yotemo, ”Ngomi nënanga mipeseke karana mia tigioka o mayeti. Mä yadodoa ho, kokiani ngomi imï fara hiädono yakunua mihihuba o huhuba ma Jouika kamamoi de tongomi mia riadodoto?” 8O Musa wohaluhu, ”Wahiohi hiädono ngohi tatarima o hidumutu ma Jouino.”
9Ma Jou wïhuloko o Musa 10wa hetongo o Israel manyawaika, ”Nako ngini nia hidogoronaka ekola nia difauku naga yopeseke karana yapekeoka o mayeti ekola ma gogiriaka manga dodagi yödagi magurutika, unangö kokiani ihi mulia o Paskah mangale ma Jou. 11Mä ihi mulia gënanga kokiani yadiai ipahaika o mede moi, enagënanga o mede mahinotoka o wange ngimoi de iatoka mahutuku. Ihi mulia o wange gënanga de yaol̄omo o Paskah maduba de o roti maragi koiwa-iwa deʼ o gauku mamali-mali. 12#Kel. 12:46; Yoh. 19:36 Uha yamal̄aika o inomo gënanga makia naga ani hiädono yarehino o ngorumino, deʼ uha yatobiki moiani o aiwani ma kobongo ihi huba-huba Ngohino Ihi mulia o Paskah gënanga imoteke de hagala to enanga madatoro.
13Iidulu yaino o nyawa yopesekua deʼ o dodagi magoronakaua, mä yoalipa ihi mulia o Paskah, Tä etongua Ahi umati, karana önanga ihi hubaua o huhuba Ngohino maöraha itö tantuoka. O nyawa gënanga kokiani yatagongo mabaradoha.
14Nako ngini nia hidogoronaka naga o nyawa maporetino yomau ihi mulia o Paskah, önanga kokiani ihi mulia imamoteke deʼ o datoro mata-mata deʼ okianaga yaputu-putuhoka. O tita gënanga yakunu yapake mangale o nyawa moi-nyawa moi, kayaoa o Israel manyawa kayaoa o nyawa maporetino.”
O lobi itotararono
15-16Mawange ma Jou Ai tau ihi goko, o lobi iböa deʼ ya tamunu o Tau gënanga. Maöraha yohutu hiädono o ngorumino o lobi gënanga yölega-lega hokä o uku. 17O lobi gënanga idöa mahi getongo, o Israel manyawa ya kilianga toönanga manga tau-tau madoomu, daha imä jobo. Deʼ kiaka o lobi gënanga iuti, mangï genangoka önanga imä tauoli. 18De ma Jou Ai pareta o Israel manyawa gënanga yakilianga manga tau deʼ dema Jou Ai pareta önanga yadiaioli. Hoko kia madekana o lobi gënanga naga ma Jou Ai Tau mal̄okuoka, önanga kahirahi yogogere o ngïoka gënanga. 19Nako o lobi gënanga itedekana ma Jou Ai Tau mal̄okuoka gënanga, onanga ihi ngoumu ma Jou Ai datorika de imä joboua ongioka gënanga. 20Mä mamoi-mamoi duga-duga o wange muruono naga dika o lobi gënanga naga ma Jou Ai Tau mal̄okuil̄e gënanga. Sarakia nagaö dika, ma Jou dika Aipareta ihi tantu önanga yo gogere o ngï moioka ekola ima goraka. 21Mamoi-mamoi o lobi gënanga duga-duga igogogere o bimaoauku hiädono o ngorumino, deʼ maöraha o lobi gënanga idöa o ngoru mino, onangö ma, imagoraka. O öraha okia dika o lobi gënanga idöa, kayaoa o wange-wange ekola o hutu-hutu, önanga ima goraka. 22Hokokia madekana o lobi gënanga naga ma Jou Ai Tau mal̄okuoka, madekana o wange hinoto, o mede moi, o taongo moi ekola iholoi, hoko genangoli madekana önanga yogogogere o ngïoka gënanga. Nako o lobi gënanga idöa, dahaö önanga imagoraka. 23Onanga yogogere o ngï moioka deʼ imagoraka o ngï mahomoaika imamoteke de ma Jou Ai pareta ma Jou wohi döa-döaka o Musaika.
Currently Selected:
O BILANGAN 9: TLB
Highlight
Share
Compare
Copy
Want to have your highlights saved across all your devices? Sign up or sign in
