O BILANGAN 7
7
Ihi huba-huba o tutuda
1Maöraha o Musa wabötoka wohigoko ma Jou Ai Tau, o Tau gënanga deʼ hagala mapakakaha yatabis deʼ yal̄auhu mata-mata deʼ o upacara maminya. Hoko genangö wadiai mahuhuba mangï ika deʼ hagala mapakakaha. 2De o Israeloka manga balu-baluhu enagënanga o hoana manga hae-haeke imahitö tago-tagongo yadiai o sensus, 3ihi huba ma Jou Ai himangoka o goroba o gahumu butanga deʼ o hapi o dutu ngimoi deʼ hinoto: o balu-baluhu yahinoto ihi batumu o goroba o gahumu moi, deʼ mahapi o dutu moi. Onanga ihi huba deʼ ipaha, 4ma Jou witemo o Musaika, 5”Natarima o ngongike-ngongike gënanga mangale yagoraka Ahi Tau; nahidöaka mata-mata gënanga o Lewi manyawaika ima moteke deʼ toönanga manga manarama.” 6De o goroba-goroba deʼ o hagala o hapi gënanga o Musa wohi döaka o Lewi manyawaika. 7O goroba hinoto deʼ o hapi o dutu iata nahidöaka o Gerson ma nyawaika, 8o goroba iata deʼ o hapi o dutu tufange o Merari manyawaika, ima moteke deʼ o manarama önanga yadodiai o Itamar, ma imam Harun aingohaka ai tutuda matimiuku. 9Mä o Kehat manyawa yatarimaua o goroba ekola o hapi o Musaino, hababu o bara-baranga itö tebi-tebini önanga imahitö tago-tagongo, kokiani önanga yamoku manga beleka mal̄okuoka.
10Manga balu-baluhu yao ihihö huba-huba mangale ihi mulia o huhuba mangï matabisan ma upacara. Maöraha ima sadiaka mangale yao toönanga manga ngongike mahuhuba mangï mahimangoka. 11Ma Jou wïtemo o Musaika, ”Nahetongo onangika o wange ihi getongo o wange ngimoi deʼ hinotoino womatengo o tutuda manga hidogoronaka gënanga kokiani ihi huba manga huhuba mangale o huhuba mangï matabisan ma upacara.”
12-83Moi-moi yoao manga huhuba imoteke o datoro nënanga.
| O wange | Ai hoana | Manga tutuda |
|---|---|---|
| Madodihiraka | o Yehuda | o Nahason o Abinadab aingohaka |
| Mahinotoka | o Isakhar | o Netaneel o Zuar aingohaka |
| Mahangeoka | o Zebulon | o Eliab o Helon aingohaka |
| Maiatoka | o Ruben | o Elizur o Syedeur aingohaka |
| Mamotoaka | o Simeon | o Selumiel o Zurisyadai aingohaka |
| Mabutangaka | o Gad | o Elyasaf o Rehuel aingohaka |
| Matumidoka | o Efraim | o Elisama o Amihud aingohaka |
| Matufangeoka | o Manasye | o Gamaliel o Pedazur aingohaka |
| Mahiwoka | o Benyamin | o Abidan o Gideoni aingohaka |
| Mangimoioka | o Dan | o Ahiezer o Amisyadai aingohaka |
| MaNgimoi de moioka | o Asyer | o Pagiel o Okhran aingohaka |
| Mangimoi de mahinoto | o Naftali | o Ahira o Enam aingohaka |
Toönanga moi-moi ihiho huba-huba ganga kai maketero: o dodai o haaka o gahumu moi madubuho o kilo moi de mahononga deʼ o bokolo o haaka madubuho o kilo mahononga iholoi, imoteke ma Jou ai Tau-maduduga. O ngï hinoto gënanga yonoa ya oma-omangil̄e de o gopuno ihi ganuino de o minya mangale ihi hoʼ huba-huba yadodiaiuku. Mahomoa de gënanga o dodai o gurasi o gahumu moi ma dubuho o ons moi iholoi yonoauku o dupa o hapi manauru ma gö o dutu moi, o duba manauru o dutu moi, deʼ o duba manauru mangohaka ma umuru o taongo moi mangale o huhuba yatö tuhu-tuhuku, inoli o kabingi manauru o dutu moi mangale o baradoha ma apongo mahuhuba; o hapi o dutu hinoto, o duba manauru motoa, o kabingi manauru o dutu motoa, deʼ o duba ma umuru o taongo moi dutu motoa mangale o dame mahuhuba.
84-88Ihihö huba-huba yao-ao o tutuda yangimoi de yahinoto mangale o huhuba mangï gënanga yatabis ingodumu mangöe:
– o dodai o haaka ngimoi de hinoto deʼ o bokolo o haaka ngimoi de hinoto madubuho mata-mata o kilo monaoko de tumidi de o ons butanga
– o dodai o gurasi ngimoi de hinoto madubuho mata-mata o kilo moi de o ons moruange de hinoto madola o dupa i oma-omanga
– o hapi manauru o dutu ngimoi de hinoto, o duba manauru o dutu ngimoi de hinoto, deʼ o duba mangohaka o dutu ngimoi de hinoto ma umuru o taongo moi, kamamoi de o huhuba ihi dodiaiuku hokä madatoö mangale o huhuba yatö tuhu-tuhuku
– o kabingi o dutu ngimoi de hinoto mangale o baradoha ma apongo mahuhuba, o hapi manauru o dutu monaoko de iata, o duba manauru o dutu mori butanga, o kabingi o dutu mori butanga, deʼ o duba ma ngohaka o dutu mori butanga ma umuru o taongo moi mangale o dame mahuhuba.
89O Musa wohi geto-getongo wowohama ma Jou Ai Tau magoronaika mangale ima ade-ade de ma Jou, ünanga woihene ma Jou Ai ilingi wï temo-temo unangika o Jaji ma Peti madadamunoka de yauku o dodadi dema gogahuhuoka madulada hinoto mahidogoronaka.
Currently Selected:
O BILANGAN 7: TLB
Highlight
Share
Compare
Copy
Want to have your highlights saved across all your devices? Sign up or sign in
