O BILANGAN 6
6
O datoro mangale o nazir manyawa
1-2Ma Jou wihuloko o Musa, wohi döaka o datoro-o datoro nënanga o Israel manyawaika. Moi-moi o nauru ekola o ngoheka yojaji mangale yowango imatingaka ma Jouika hokä o nazir ma nyawa moi, 3-4#Luk. 1:15 yakunua yokere o angguru mahohoko ekola o hohoko mahomoa. Onanga yakunua yol̄omo o angguru mahohoko ma hungi-hungiohi ekola madodo olenge, ekola okia dika ma ahali o angguru ma utu ino; mamui ekola madubo ma yakunua önanga yaol̄omo.
5Hokokia madekana manga jaji ma orahoka ünanga yakunua ai tadauru watobiki ekola wakori. Hokokia madekana o öraha gënanga ai tadauru de ai parahi kokiani wamal̄aika iwango i kurutu. Unanga ai jaji iwi likoika hiädono ai diri watingaka mangale ma Jou ipaha. 6-7Ai tadauru gënanga marupa ai nonako ünanga iwi tingakoka mangale ma Jou Madutu. Hokokia madekana ai jaji kawohi dagiohi ünanga yakunua wapeseke ai diri; ünanga yakunua womahi tigi o o maiyetika, ngaroka o maiyeti gënanga ai ama, ngoi ayo ekola ai dodoto. 8Hokokia madekana ünanga o nazir manyawa, ünanga ganga o nyawa yatinga-tingakoka mangale ma Jou.
9Nako womatengo o nazir manyawa iwi tinga-tingakoka mangale ma Jou Ai tadauru ipeseke karana ünanga womahi tigi-tigi ika deʼ o nyawa itidokanino deʼ yohonenge, done ünanga kokiani wotamä o wange tumidi madekana: gënanga deʼ iböto ünanga kokiani wakori ai tadauru ai parahi, daha ünanga idadi wotebini. 10O wange matufangeoka ünanga kokiani woao o namodara o dutu hinoto ekola o pombo furu ma imamika ma Jou Ai Tau ma goronaka. 11Ma totaleo o dutu moi kokiani ma imam wohihuba mangale o baradoha ma apongo mahuhuba deʼ o dutu moioli mangale o huhuba itö tuhu-tuhuku mangale yahohihanga o peseke. O wange gënangö ünanga kokiani wohi tingakoli ai tadauru ma Jouika 12deʼ wahungioli womahi döaka ai diri hokä o nazir manyawa. O öraha ipaha-pahaika yaetongokaua ünanga idadioka wopeseke. Hokä o rugi madagali mahuhuba ünanga kokiani wohihuba o duba mangohaka o dutu moi ma umuru o taongo moi.
13 #
Kis. 21:23-24
Nako womatengo o nazir manyawa ai jaji maöraha ipahaka, kokiani idiai o upacara nënanga. O nyawa gënanga kokiani iwi ngotaka ma Jou Ai Tau mangoranika 14Deʼ yoao ma Jouika o gigini manabo koiwa-iwa o dutu hange, o dutu moi o duba mangohaka manauru manabo koiwa-iwa ma umuru o taongo moi mangale o huhuba itö tuhu-tuhuku, o dutu moi o duba mangohaka mabeka ma umuru o taongo moi mangale o baradoha ma apongo mahuhuba, deʼ o dutu moi o duba manauru mangale o dame mahuhuba. 15Unanga kokiani wohihubaö o roti iragi-ragiua o karaja moi enagënanga o roti mahohululunu yadiai deʼ o gopuno ihi ganu deʼ o zaitun maminya, deʼ o kukisi mangina-ngina ihi eheika deo zaitun maminya. Mahomoa deʼ gënangö ünanga kokiani wohihubaö o huhuba ihi dodiaiuku deʼ o huhuba yaoke-okere.
16Ma imam kokiani wao mata-mata gënanga ma Jou Ai himangoka, daha ihi huba o baradoha ma apongo mahuhuba deʼ o huhuba yatö tuhu-tuhuku. 17Kamamoi deʼ o roti o karaja moi gënanga, ünanga kokiani wohi huba o duba manauru gënanga ma Jouika hokä o dame mahuhuba. Inoli o huhuba ihi dodiaiuku deʼ o huhuba yaoke-okere gënanga kokiani ihi huba ma Jouika.
18O nazir manyawa gënanga kokiani wakori ai tadauru ma Jou ai Tau mangoranoka, deʼ wohi kaweli o uku magoronaika o dame ma huhuba mangï gënanga magogiriaka yatuhuku.
19Genanga deʼ iböto, nako o duba manauru gënanga magaono mahimangoka yahakaioka, ma imam kokiani wal̄e deʼ wogelengauku kamamoi deʼ o roti mahohululunu o gahumu moi deʼ o kukisi mangina-ngina o gahumu moi o karajaka gënanga o nazir manyawa gënanga ai giama mahoatuku. 20Daha ma imam kokiani wohi dumutu o inomo gënanga hokä o ngongike yahi tinga-tingakoka ma Jouika; gënanga ganga o hiduku itebi-tebini idadi o imam manga hidoku, mahomoa deʼ ma alu mangu-nungu deʼ o duba manauru magaono imoteke o datoro idadi o imam manga hidoku. Genanga deʼ iböto o nazir manyawa gënanga yakunu o angguru waokere.
21Genanga doka o datoro mangale o nazir manyawa, mä nako o nazir manyawa womatengo wojaji ai huhuba iholoi deʼ ai jaji madodagi, ünanga kokiani wohi ganapu deʼ madiai okia wojä jajioka gënanga.
Ma imam wahi barakati mabetongo
Ma Jou wihuloko o Musa 22-23wohiädono o Harun deʼ aingoha-ngohakika önanga kokiani yahetongo o demo-demo nënanga maöraha önanga yahibarakati o Israel manyawa:
24Tanu ma Jou winihi barakati deʼ winï paliara ngini.
25Tanu ma Jou Ai hininga yaoa deʼ Ai hininga imura nginika.
26Tanu ma Jou winï dora ngini deʼ winihi döaka o dame.
27De ma Jou wato, ”Nako önanga yahetongo Ahi romanga hokä o barakati, o Israel manyawaika Ngohi aha tahi barakati önanga.”
Currently Selected:
O BILANGAN 6: TLB
Highlight
Share
Compare
Copy
Want to have your highlights saved across all your devices? Sign up or sign in
