O BILANGAN 5
5
O datoro mangale o nyawa yopeseke
1Ma Jou wïtemo o Musaika, 2”Nohi döaka o pareta nënanga o Israel manyawaika: Mata-mata o nyawa yä pado-pado ekola o ngoheka mapanyake yadaene, ekola yapekeoka o maiyeti, kokiani yahihupu o Israel manyawa manga tau madoomuoka. 3Onanga kokiani yähuloko yoiki, hupaya uha yapeseke o tau madoomu, kiaka Ngohi togogere kamamoi de Ahi umati.” 4O Israel manyawa yadiai o pareta gënanga deʼ yahihupu mata-mata o nyawa hoko gënanga o tau madoomuino.
O rugi yatagali madodagi
5-6 #
Im. 6:1-7
Ma Jou wohi döaka o Musaika o datoro-o datoro nënanga mangale o Israel manyawa: Nako imatengo ani yosetiaua ma Jouika de yodiai o howono o nyawa mahomoaika, 7o nyawa gënanga kokiani woma ngaku ai baradoha deʼ yo fangu manga duduhuhu itö totomo, o nyawa yahi rugu-rugika deʼ yödogo o tiwi haaka monaoko nako o duduhuhu gënanga o tiwi haaka o ratuhu moi. 8Mä nako o nyawa yahi rugi-rugioka gënanga yohonengoka deʼ manga riadodoto yotigi-tigino moiua, done o duduhuhu gënanga kokiani ihi döaka ma Jouika, deʼ idadi o imam manga hidoku. O duduhuhu gënanga ietongua o duba manauru mangale o baradoha ma apongo o nyawa yahowo-howonoka gënanga ma upacara. 9Okia dika o Israel manyawa ihihö huba-huba ma Jouika manga huhuba yö dinga-dingakoka idadi ma imam ai hidoku watotarima ihi hö huba-huba gënanga. 10Okia ihihö huba-huba ima tengo ani ma Jouika, idadi o nyawa gënanga mahirete ai hidoku. Duga-duga okia ihi döa-döaka ma imamika womatengo, idadi ma imam gënanga ai hidoku.
O atoranga mangale o rokata womihi omu ngoi hekata
11Ma Jou wihuloko o Musa 12-14wohi döaka o datoro-datoro nënanga o Israel manyawaika. Nako o nauru womatengo womihi omu ngoi hekata. Unanga womi tae ngoi hekata gënanga mosetiaua unangika deʼ ma pesekoka ami diri karana ima röehe moi de o nauru mahomoa. Mä ami rokata gënanga wohi öriki itiaiua, karana o hali gënanga ngoi hekata madiai kamoma ngiu-ngiunu; koiwa ai hakihi, deʼ ünanga wahi datagokua. Ekola, nako o rokata womatengo womihi omu ngoi hekata, ena hioko ngoi hekata gënanga mohowonua. 15O hali hinoto gënanga magoronaka o rokata gënanga ko kiani womi ao ma imamika. Unangö kokiani woao ihihö huba-huba ipoparalu, enagënanga o gopuno o kilo moi. O gopuno gënanga yakunua ihi tuagi de o zaitun maminya ekola yadupauku, karana marupa ihihö huba-huba imaka ngakua deʼ madungutu mangale ihi nonako naga o gia hekata imaka ngakua.
16Ma imam kokiani womi huloko o ngoheka gënanga o huhuba mangï mahimangika deʼ moma okoino mihimanga ma Jou. 17De aha ma imam kokiani wal̄ë o mangko o tonaka o gahumu moi deʼ woguheuku, o akere itebi-tebini mahuhutulu. Genanga de iböto ünanga kokiani wal̄ë mahuhutulu o kafo ma Jou Ai Tau malanteoka deʼ wonoa o akeruku gënanga. 18De ipaha kokiani ünanga wahohe o ngoheka gënanga ami tada uru, deʼ wogelenga ami giamuku o gopuno imaka ngakua mahuhuba, ena hioko ma imam mahirete wasö o akere ma mali-mali yao-ao o lolai. 19Genanga de iböto ma imam kokiani wohetongo o koboto deʼ wo gahoko o ngoheka gënanga mohi goungu. ”Nako ngona nohowonua, ngona ini koronaua o lolai iao-ao o akere nënanga. 20Mä nako ngona nohowono, 21tanu ma Jou wadiai ani romanga idadi o koboto malolai ani hoana deʼ ani berera mahi dogoronaka. Tanu Unanga wadiai ani gaono magoa ikororomo deʼ ani mamata ideke. 22O akere iao-ao o lolai nënanga aha iwohama ani mamata uku deʼ yadiai ideke deʼ ani gaono magoa ikororomo.”
O ngoheka gënanga koakiani mobaluhu, ”Ngohi tohi goungu; tanu ma Jou wadiai hoko gënanga.”
23De ma imam kokiani watulihi o lolai gënanga o karatahi i lululuinoika de waehe mamali-mali gënanga. 24Ma imam womi huloko o ngoheka gënanga maokere o akere ma mali-mali iao-ao o lolai. Nako ma okere, o akere gënanga idadi o hababu mamao o hiri. 25Ma imam kokiani wal̄e o gopuno ihihö huba-huba gënanga, deʼ wohidumutu ma Jou Ai himangoka, daha wao o huhuba mangï ika. 26De ünanga kokiani wal̄e o gopuno o bokoto moi hokä manonako o gopuno gënanga mata-mata ihi hubaka, deʼ yatuhuku o huhuba mangï mal̄okuoka. De mabaha o akere gënanga womihi okere o ngoheka gënanga. 27O demo ma ade o ngoheka gënanga mahowonoka, o akere gënanga idadi o hababu münanga mamao duru kahä hiri; ami mamata ideke deʼ ami gaono magoa ikororomo. Ami romanga aha idadi o koboto deʼ o lolai ami hoana mahi dogoronaka. 28Mä o demo ma ade muna mahowonua, munanga imi koronaua o lolai deʼ kamakunohi o ngohaka mamake.
29Hoko gënanga madatoro nako o rokata womatengo wo omu deʼ womihi omu ngoi hekata modiaioka ihowo-howono deʼ mapeseke ami diri. 30O nauru genanga nakiani womiao ngoihekata genanga Ma Jouika de o imam nakiani wadiai o datoro genanga munangika. 31O nauru gënanga wahowonua, mä ngoihekata, nako inyata mahowono, kokiani matagongo mabahaika.
Currently Selected:
O BILANGAN 5: TLB
Highlight
Share
Compare
Copy
Want to have your highlights saved across all your devices? Sign up or sign in
