O BILANGAN 4
4
O Lewi manyawa o Kehat ai ahalino manga manarama
1Ma Jou wähuloko o Musa deʼ o Harun 2yä sensus o Lewi manyawa o Kehat ai hoanino imoteke moi-moi manga tau madol̄a. 3Deʼ yahitulihi mata-mata o nau-nauru manga umuru o taongo moruange hiädono o taongo moritoa, yaku-akunu yadiai o manarama yahi patu-patutoka ma Jou Ai Tauoka. 4Toönanga manga manarama ganga ihi dailako yatatoro o bara-baranga duru itö tebi-tebini.
5Ma Jou wohi döaka o Musaika o datoro nënanga: Nako ma orahoka o tau madoomu yakilianga o Harun deʼ aingoha-ngohaka kokiani yowohama ma Jou Ai Tauika, ihi guti o guba mangöere o Jaji ma Peti mahimangoka, deʼ ihi tamunu o Peti de o ngöere gënanga. 6De iböto, önanga kokiani ihi tamunoli de o aiwani makai ma aluhu, deʼ ihi hoheika o ngöere mabihi-bihi o dobiki moi mal̄okuino, deʼ ihi noa o Peti gënanga ma dodowiti magota.
7Onanga kokiani ihi hoheika o ngöere mabihi-bihi o dobiki moi o meja o roti ihi dodiaiuku mangale ma Jou mangï mal̄okuoka deʼ o meja gënanga mal̄okuoka kokiani önanga yakelengauku o dodai ma amo-amoko, o baki o dupa mangï, o baki ihihö huba-huba mangï, deʼ o kendi mangale o angguru ma akere ihihö huba-huba. O roti ihi dodiaiuku kokiani salalu naga o mejaka gënanga. 8Onanga kokiani yatamunu mata-mata gënanga deʼ o ngöere ma doka-dokara o dobiki moi, daha ihi hoheika mal̄okuino o aiwani makai ma aluhu, deʼ ihi noaika madodowiti magota.
9Onanga kokiani yal̄e o ngöere mabihi-bihi o dobiki moi deʼ ihitamunu o hilo mal̄ou inoli mata-mata mahilo, mapakakaha mangale yatebini mahilo mahubu deʼ madudumungu, deʼ mata-mata o zaitun maminya mangï. 10O hilo mal̄ou deʼ ingodumu mapakakaha kokiani önanga yahawo deʼ o aiwani makai ma aluhu o dobiki moi deʼ yakelengauku madodowiti mal̄okuoka.
11Genanga deʼ ibötoönanga kokiani ihi hohe o ngöere ma bihi-bihi o dobiki moi o huhuba mangï o gurasi gënanga mal̄okuoka, deʼ ihi tamunuku deʼ o aiwani makai ma aluhu o dobiki moi, deʼ ihi noaoko o huhuba mangï gënanga madodowiti magota. 12Hagala o pakakaha yapö pake-pake o Ngï i Tebi-tebini magoronaka kokiani önanga yal̄e deʼ yahawo deʼ o ngöere ma bihi-bihi o dobiki moi. Daha önanga kokiani ihi tamunu deʼ o aiwani makai ma aluhu o dobiki moi, deʼ yakelengauku o dodowiti mal̄okuoka. 13Onanga kokiani yatebini makafo o huhuba mangï gënanga, daha ihi hoheika mal̄okuoka o ngöere ma ungu-ungu o dobiki moi. 14Deʼ mal̄ouoka gënanga kokiani önanga yakelengauku mata-mata o pakakaha yapö pake-pake o pupuji magoronaka o huhuba mangïoka gënanga: o uku mangï, o garupu, o huhugara, deʼ o mangko. Daha önanga kokiani ihi tamunuku mata-mata gënanga o aiwani makai ma aluhu deʼ ihi noaoko madodowiti magota.
15-20Ma Jou wätemo o Musa deʼ o Harunika, ”Maöraha ngini nia kilianga o tau madoomu, o Harun deʼ aingoha-ngohaka ko kiani yowohama Ahi Tau magoronaika deʼ yatamunu mata-mata o baranga deʼ o pakakaha naga genangokadau. Genanga deʼ iböto, o Kehat manyawa yakunu yoboa la yamoku. Mä önanga yakunua, imahi tigika yolega ekola yapake o bara-baranga gënanga, ka-rana yatingakoka mangale Ngohi. Nako önanga kayadiai, önanga aha yohonenge. Hoʼ hupaya o Kehat manyawa uha yaehe o Lewi ai hoanoka, o Harun deʼ aingoha-ngohaka kokiani moi-moi nia himana rama toönanga manga hidogoronaka okia kokiani önanga yao. Genanga doka o Kehat manyawa manga manarama maöraha Ahi Tau nia tagali mangï. O Eleazar o Harun aingohaka womahi tagongo ingodumu Ahi Tau, o hilo maminya, o dupa, o huhuba o gandum mangale okianaga ihi dodiai ukuoka, o upacara maminya, deʼ mata-mata naga Ahi Tau magoronaka gënanga.”
O Lewi manyawa o Gerson ai ahalino
21-22Ma Jou wihuloko o Musa wä sensus o Lewi manyawa o Gerson ai ahalino imoteke moi-moi manga tau madol̄a. 23O Musa kokiani wohi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-akunu yadiai o manarama yahi patu-patutoka ma Jou ai Tauoka. 24Onanga yahimanarama yagoraka o bara-baranga gënanga: 25O tau gënanga matenda mangöere de madadamunu madol̄aino de maporetino deʼ o aiwani makai ma aluhu, o Tau mangorana ma-dadatoko mangöere, 26mahidete deʼ magumi-gumini mangale malöa o Tau deʼ o huhuba mangï magilolitino, malöa mangorana ma amoko ma dadatoko mangöere, mata-mata mapakakaha yapö pake-pake mangale ihi pake mata-mata o baranga gënanga. Onanga imahi tagongo mata-mata o manarama ima dohanga de o bara-baranga gënanga. 27O Musa deʼ o Harun kokiani yogoana hupaya o manarama o Harun deʼ aingoha-ngohaka ihi döa-döaka o Gerson manyawaika genanga yadiai, deʼ mata-mata o baranga kokiani itoraka hupaya yatoraka. 28Genanga doka o Gerson manyawa manga manarama o Tau magoronaka; o manarama-manarama gënanga kokiani idiai o Itamar ma Imam o Harun aingohaka, ai tutuda matimioka.
O Lewi manyawa o Merari ai ahaluku manga manarama
29Ma Jou wihuloko o Musa wä sensus o Lewi manyawa o Merari ai ahalino imoteke moi-moi manga tau madol̄a. 30O Musa kokiani wohi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-yakunu yadiai o manarama yahi patu-patutoka ma Jou ai Tau oka. 31Onanga yahi manarama mangale yagoraka o Tau gënanga ma litoraka, mabala-balaki, maliate deʼ mahohol̄e. 32O Tau gënanga magilolitino malöa maliate de inoli ma hohol̄e, mabebeloho deʼ magumi-gumini deʼ hagala mapakakaha ipö paralu mangale ihi goko. O nyawa moi-o nyawa moi yahi manarama yao o bara-baranga ihitö tantantu. 33Genanga doka o Merari ai ahaluku manga manarama; mata-mata toönanga manga manarama ma Jou Ai Tauoka kokiani yadiai o Itamar ma Imam Harun aingohaka, ai tutuda matimiuku.
O Lewi manyawa yä sensus
34-48Ima moteke de ma Jou Ai pareta, o Musa, deʼ o kawaha manga tutuda yodiai o sensus o ahali hangeino o Lewi ai hoana magoronaka, enagënanga o Kehat, o Gerson deʼ o Merari. Onanga yodiai o sensus gënanga manga tau madol̄a yatengo-tengo. Onanga yahi tulihi manga romanga mata-mata o nau-nauru manga umuru o taongo moruange hiädono o taongo moritoa yaku-akunu ya diai o manarama yahi patu-patutoka ma Jou Ai Tauoka. Nenanga doka mahasili:
| Ai ahali | Manga ngöe |
|---|---|
| O Kehat | 2.750 |
| O Gerson | 2.630 |
| o Merari | 3.200 |
| Mata-mata manga ngöe: | 8.580 |
49De ma Jou Ai pareta o Musaika, o nyawa moi-nyawa moi yahi tulihi deʼ yahi tagongo moi-moi okia kokiani yaleleani ekola okia kokiani yamoku.
Currently Selected:
O BILANGAN 4: TLB
Highlight
Share
Compare
Copy
Want to have your highlights saved across all your devices? Sign up or sign in
