O BILANGAN 3
3
O Harun aingoha-ngohaka
1Nenanga o Harun deʼ o Musa manga tau madol̄a maöraha ma Jou wï temo-temo o Musaika o Sinai mal̄okuoka. 2#Bil. 26:60 O Harun aingohaka o nauru yaruata: woria-riaka o Nadab, de ipaha o Abihu, o Eleazar deʼ o Itamar. 3O nanga yatabis yodadi o imam de ma upacara o minya yahituagi manga häekuku. 4#Im. 10:1-2; Bil. 26:61 Mä o Nadab deʼ o Abihu yohonenge o Sinai matonaka ikoka-kahaoka, maöraha önanga iwï himanga ma Jou de o uku ihohala-liua. Onanga yahinoto manga ngohaka koiwa. Hoʼ o Harun kawoma ngango ikahi, o Eleazar deʼ o Itamar yomanarama hokä o imam.
O Lewi manyawa yatumutu mangale yäleleani o imam-imam
5Ma Jou witemo o Musaika, 6”Nä huloko o Lewi aihoana yoboa ini himanga, deʼ nätumutu önanga yodadi iwï loleleani o Harun. 7Onanga yomanarama ahi Tauoka deʼ kokiani yaleleani o imam-imam inoli yongodumu o kawaha de toönanga manga manarama Ahi Tauoka gënanga. 8Toönanga manga manarama enagënanga ihi dailako yatatoro o pakakaha Ahi Tauoka gënanga hokä o Israel manyawa manga-dagali. 9O Israel manyawaika, duga-duga o Lewi ai hoana Tahi manarama yodadi yololeleani yototagaliua mangale o Harun deʼ aidifauku. 10Mä o Harun deʼ aingoha-ngohaka kokiani nä goraka mangale ihi dagi o manarama hokä o imam mahomoa de önanga, onagona dika ihitaili yadiai o manarama gënanga kokiani yä hukumu yahohonenge.”
11Ma Jou witemo o Musaika, 12-13#Kel. 13:2 ”O öraha nënanga o Lewi manyawa Ta iriki yodadi Tongohi madutu. Maöraha Ngohi tatoma mata-mata o Mesir ma nyawa manga ngohaka o riaka, Tomä dingakoka mangale Ngohi o Israel manyawa manga ngohaka o nauru mariaka deʼ mata-mata manga aiwani o gigini mangohaka madodi hiraka ma ayo ihi ngohaka. Mata-mata gënanga Tongohi madutu. Hokä o Israeloka manga ngohaka o nauru mariaka madagali, Ngohi tal̄e o Lewi manyawa mangale Ngohi; önanga aha yodadi ka Tongohi. Ngohi ma Jou.”
O Lewi manyawa yä sensus
14O Sinai matonaka ikokakahaoka ma Jou wihuloko o Musa 15wodiai o Lewi manyawa wahi tulihi imoteke manga hoana deʼ manga tau madol̄a moi-moi; o ngohaka o nauru manga umuru o mede moi deʼ ihi kail̄e kokiani ihi tulihi manga romanga. 16De o Musa wadiai ma Jou Ai pareta gënanga. 17-20O Lewi aingohaka yaruange: Gerson, o Kehat deʼ o Merari. Onanga ganga manga hoana manga ete deʼ manga tohora yä hetongo imoteke toönanga manga romanga. O Gerson aingohaka o nauru yahinoto: o Libni deʼ o Simei. O Kehat aingohaka o nauru yaruata: o Amram, o Yishar, o Hebron deʼ o Uziel. O Merari ai ngohaka o nauru yahinoto: o Mahli deʼ o Musi. Onanga gënanga manga tau madol̄a manga ete deʼ manga tohora yä hetongo imamo teke toönanga manga romanga.
21O Gerson aihoana idadi deʼ o Libni ai tau madol̄a deʼ o Simei ai tau madol̄a. 22O Gerson aihoana o nau-nauru manga umuru o mede moi deʼ ihikail̄e ihi tulihi manga ngöe yä 7.500. 23-24O Elyasaf o Lael aingohaka wahi haëke o hoana gënanga. O Israel manga tau madoomu magoronaka, o hoana gënanga imal̄e manga ngï o wange madumuniha idaduoka ma Jou Ai Tau maporetoko. 25Ihi dailako yatatoro ma Jou Ai Tau, önanga imahi tagongo yogoana o Tau deʼ mangorana madadamunu yongoha-ngohama mangöere madadatoko, 26malöa mahidete yakilolitino o Tau deʼ mahuhuba mangï, deʼ malöa gënanga mangöere madadatoko. Onanga imahi tagongo ihi dailako hagala o manarama ima dohanga gënanga.
27O Kehat ai hoana deʼ manga tau madol̄a o Amram, o Yiskar, o Hebron deʼ o Uziel. 28O nau-nauru manga umuru o mede moi deʼ ihi kail̄e o hoanino gënanga manga ngöe o nyawa ya 8.600. Onanga manga manarama ihi dailako yatatoro o bara-baranga ma Jou Ai Tauoka. 29-30O Elisafan o Uziel aingohaka wahi haëke o hoana gënanga. Manga tau madoomu magoronaka, o hoana gënanga imal̄e manga ngï ma Jou Ai Tau o koreharail̄e idaduoka. 31Onanga imahi tagongo yögoana o Jaji ma Peti, o meja, o hilo mal̄ou, o huhuba mangï, hagala o pakakaha yapö pake-pake o imam-imam manga Ngï i Tebi-tebinoka, deʼ o guba ihi tinga-tingaka o Ngï i Tebi-tebini. Onanga imahi tagongo yö goana hagala o manarama ima dohanga deʼ o bara-baranga gënanga.
32O Lewi aihoana manga häeke ganga o Eleazar, o Harun aingohaka. Unanga wagoana hagala o nyawa yomomanarama o Kamari iTebi-tebini.
33O Merari aihoana deʼ manga tau madol̄a o Mahli deʼ o Musi. 34O nau-nauru manga umuru o mede moi deʼ ihikail̄e o hoanino gënanga mata-mata manga ngöe o nyawa yä 6.200. 35O Zuriel o Abihail aingohaka wahi haëke o hoana gënanga. Manga tau madoomu magoronaka, o hoana gënanga imal̄e manga ngï ma Jou Ai Tau o koremieuku idaduoka. 36Onanga imahi tagongo yögoana o Tau gënanga malitoraka, mabala-balaki, maliate, mahohol̄e, deʼ mata-mata mapakakaha inoli hagala o manarama ima dohanga deʼ o bara-baranga gënanga. 37Ikali malöa maporetino maliate, mahohol̄e deʼ ma gumi-gumini.
38O tau madoomu magoronaka, o Musa deʼ o Harun manga ngoha-ngohaka kokiani imal̄e manga ngï ma Jou Ai Tau mahimangoka, o wange mahiwaroko idaduoka. Onanga imahi tagongo o puji ma upacara mangale o Israel manyawa o Ngï i Tebi-tebinoka. Mahomoa deʼ önanga, onagona dika yataili yadiai o manarama gënanga kokiani yähukumu yahohonenge. 39Mata-mata nau-nauru o Lewi ai hoanino manga umuru o mede moi de ihikail̄e o Musa wahitö tuli-tulihi imoteke manga hoana moi-moi deʼ ma Jou Ai pareta, yongodumu manga ngöe onyawa yä 22.000.
O Lewi manyawa yodadi o Israeloka manga ngohaka o nauru ma riaka madururu
40-41Ma Jou witemo o Musaika, ”Mata-mata o Israeloka manga ngohaka o nauru mariaka ganga Tongohi. Nohitulihi toönanga manga roma-romanga manga umuru o mede moi deʼ ihikail̄e. Mä hokä toönanga manga dagali, Ngohi tohi nyata o Lewi manyawa mata-mata yodadi Tongohi madutu. Ngohi ma Jou! Deʼ o Lewi manyawa manga giginimahi dogoronaka madodihiraka ma ayo ingohaka.”
42O Musa wadiai okia wihi popareta ma Jou: ünanga wahi tulihi mata-mata o ngohaka o nauru o riaka 43manga umuru o mede moi deʼ ihikail̄e. Mata-mata önanga manga ngöe o nyawa yä 22.273.
44Daha ma Jou witemo o Musaika, 45”Nä tingaka o Lewi manyawa mangale Ngohi hokä manga dagali mata-mata o Israeloka manga ngohaka o nauru o riaka; o Lewi manyawa manga gigini hokä o Israeloka manga gigini ma dagali. 46Karana o Israeloka manga ngoha-ngohaka o nauru o riaka yä 273 iholoi yowöe deʼ o Lewi manyawa, ho, maboloi gënanga kokiani ngini nia tuhuhu. 47Mangale o ngohaka ima tengo, ngini kokiani nifangu o tiwi haaka motoa imoteke maija yapake-pake Ahi Tauoka; 48o tiwi gënanga ihi döaka o Harunika deʼ ai ngoha-ngohakika.” 49O Musa wadiai ma Jou Ai pareta gënanga. 50Unanga wa l̄e o tiwi o haaka o 1.365, 51deʼ wohi döaka o Harunika deʼ ai ngoha-ngohakika.
Currently Selected:
O BILANGAN 3: TLB
Highlight
Share
Compare
Copy
Want to have your highlights saved across all your devices? Sign up or sign in
