O BILANGAN 35
35
O Lewi manyawa hagala manga kota
1 #
Yos. 21:1-42
O Moab matonaka irata-rataka, o Yordan ma Ngairi ma datekoka, imahi tigi-tigika o Yerikho makotaika, ma Jou wïtemo o Musaika, 2”Nahi ädono o Israel manyawaika o tonaka o puhakaino naga aha önanga yatarima gënanga makota muruono naga de mamomo matonaka ilua-luasoka mahigilolitino kokiani önanga yahidöaka o Lewi ma nyawaika hupaya önanga yakunu yogogere genangokadau. 3O kota-o kota gënanga idadi tö Lewi manyawa mangale önanga yogogere. O momo o tonaka ilua-luasoka mahigilolitino gënanga mangale manga aiwani o gigini deʼ hagala toönanga manga aiwani. 4O momo o tonaka ilua-luasoka gënanga o kota mabebeno o meheloka de yatuga ma amokika o metere o ratuhu iata de moritoa. 5Hoʼ o Lewi manyawa manga daera madüku ipahagi iata ma ngoata de magurutu ima tero-tero o metere o ratuhu hiwo de ma kota mahi dogoronaka. 6#Yos. 20:1-9; Ul. 19:1-13 O Lewi manyawaika kokiani ngini nia hidöaka o roriwo ma kota o gahumu butanga hokä o dooara mangï mangale hagala o nyawa koyohangajaua de yätomaka o nyawa mahomoa. Mahomoa de gënanga o Lewi manyawaika kokiani nia hidöakö o kota ma homoa o gahumu moruata de hinoto 7de mamomo o tonaka ilua-luasoka. Hoʼ ingodumu naga o kota o gahumu moruata de tufanga mangale o Lewi manyawa. 8O Lewi manyawa manga kota o Israeloka manga hoana moi-moi manga daera magoronaka mangöe ihitantu imoteke mangöe makota deʼ ma amokika o daera gënanga.”
O roriwo makota-kota
(Ul. 19:1-13; Yos. 20:1-9)
9 #
Ul. 19:1-13; Yos. 20:1-9 Ma Jou wïhuloko o Musa 10wohiädono o Israel manyawaika o demo-demo nënanga, ”O Yordan ma Ngairi nia tobongo ipahaino deʼ niwohama o Kanaan mabereraika, 11kokiani ngini nihitantu o roriwo ma kota-kota, hupaya hagala o nyawa koyohangajaua deʼ yatomaka o nyawa mahomoa, yakunu yopiringana genangika dau. 12O nyawa iwi toma-toma ai roriadodoto yomau yabalahi ito-torou, hoʼ o kotaka gënanga o nyawa gënanga aha worïdi. Hababu o nyawa iwi kokalaki o nyawa mahomoa wätoma, yakunu iwitoma nako ai perekara yatailakowahi o juru hakimi ma himangoka. 13Nihitantu o roriwo makota o gahumu butanga, 14hange o Yordan ma Ngairi o wange mahiwaroko deʼ hangeoli o Kanaan matonakoka. 15O kota o gahumu butanga gënanga idadi o roriwo makota mangale ngini, o Israel manyawa, deʼ mangale o nyawa dagi-dagino ekola yogogere yotatapu tingini nia hidogoronaka. Onagona dika yätomaka o nyawa mahomoa de koyohangajaua, yakunu ihi oara manga diri itimoi o kotaika gënanga.
16-18Mä nako womatengo wapake o daë o behi ekola o helewo ekola o gota la wätoma o nyawa mahomoa, o nyawa geünanga gënanga wotoma-toma; ünanga wahowono deʼ kokiani iwi hukumanga iwi hohonenge. 19Ai roriadodoto madutu o nyawa iwi toma-toma gënanga yakunu yadiai o honenge mahukumanga gënanga. Nako ünanga wï make wotoma-toma gënanga, ünanga yakunu wïtoma.
20Nako womatengo wädohata o nyawa mahomoa, de wïtoma wihiboha ünanga ekola wïkaweli de o baranga moi unangika, 21ekola wïtidingi ünanga de ai bokoto, o nyawa geünanga gënanga wotoma-toma; ünanga wahowono deʼ kokiani iwi hukumanga iwihohonenge. Nako ünanga wïmake wotoma-toma gënanga, ünanga yakunu wïtoma.
22Mä yakunoli idadi womatengo kowohangajaua wätoma o nyawa mahomoa wï doha-dohatua, mudukua wihiboha o nyawa geünanga ekola wï hikaweli de okianaga moi unangika. 23Ekola yakunoli idadi womatengo wïmakeua, wïditifa o helewo o gahumu moi, de mabaha o nyawa mahomoa yohonenge koai haturua, deʼ ünanga koai dungutua wihibodito o nyawa geünanga. 24O parakara-parakara marupa hoko gënanga magoronaka o kawaha madoomu kokiani yatailako mahowono ekola madiai o nyawa wotoma-tomaka de o nyawa yomau yabalahi o nyawa iwi toma-toma ai honenge manga hidogoronaka. 25-28O kawaha madoomu kokiani iwï riwo o nyawa wotoma-tomaka mako wohangajaua gënanga iwitö toma-toma ai riadodoto manga gangamoino. O nyawa geünanga kokiani iwi aoli o roriwo makotaika, o ngï ünanga wohi oara ai diri. Unanga kokiani wo gogere genangokadau hiädono o nyawa wodadadi ma imam wo Amo-amoko öraha gënanga wohonengoka, gënanga de ipahaika ünanga yakunu wolio ai kapongo madutuika. Mä nako ünanga wamal̄a o roriwo makota o ngï ünanga wohi oara ai diri, daha iwi make o nyawa iwi toma-toma ai riadodoto deʼ iwi toma, done o balahi ma dodagi gënanga o domaua. 29O datoro-o datoro gënanga ipake mangale ngini deʼ mangale nia ngohaka de nia danongo manga ngohakuku, kiaka dika ngini nigogere.
30 #
Ul. 17:6, 19:15 O doma maperokara magoronaka, o nyawa iwi kokalaki hokä wotoma-toma duga-duga yakunu ihi nyata wahowono deʼ iwi hukumanga iwi hohonenge nako o manarama gënanga yakunu ihi nyata igoungu o hakihi yahinoto ekola yoholoi. O hakihi womatengo ikuatua ma ngale ihi nyata igoungu o galaki gënanga itiai. 31Womatengo wotoma-toma kokiani iwi hukumanga iwi hohonenge. Unanga yakunua watuhuhu o hukumanga gënanga de o tiwi. 32Nako womatengo wohi oara ai diri o roriwo makotaika moi, uha niwihigumal̄a ünanga wohidöaka o tiwi hupaya yakunu wolio ai tauika ihira de ma Imam wo Lamo-amoko wohonenge. 33Nako ngini nia diai hoko gënanga, ngini nia peseke o tonaka ngini naga nio gogogere. O doma yapeseke o berera; hoʼ koiwa naga o ngekomo mahomoa mangale yatebini o berera gënanga mahomoa de iwi hohonenge wotö toma-toma. 34Uha nia peseke o tonaka ngini naga nio gogogere, karana Ngohi ma Jou, deʼ Ngohi togogere o Israel manyawa manga hidogoronaka.”
Currently Selected:
O BILANGAN 35: TLB
Highlight
Share
Compare
Copy
Want to have your highlights saved across all your devices? Sign up or sign in
