O BILANGAN 36
36
O ngongoheka yokawi-kawingi manga puhaka
1O tau madol̄a mabalu-baluhu o Gilead ai ahaluku, o Mikhir aingohaka, enagënanga o Manasye ai danongo, o Yusuf aingohaka, yoiki iwï himanga o Musa deʼ o tutuda-tutuda mahomoahi. 2#Bil. 27:7 Ona yato, ”Ma Jou winïhuloko ngini nihikodoku o tonaka gënanga o Israel manyawaika de mangekomo o undi, gënanga de ipaha dahaö önanga yolio manga kapongo madutuika. Unangö winïhuloko ngini nia hidöaka o tonaka o puhaka tongomi dodoto o Zelafehad aingoha-ngohaka o ngohekaika. 3Mä iparalu nimahininga nako önanga gënanga yokawingi deʼ o nauru o hoana mahomoa, toönanga manga tonaka itifa o hoana gënanga manga giama mahoatika. De hoko gënanga o tonaka nihitö tantuoka hokä tongomi mia daera aha ikuranga. 4O Higilio ma Taongo magoronaka, maöraha ingodumu manga pareta yahuku-hukunoka ihigilio madutu yohira-hiraika, o Zelafehad aingoha-ngohaka o ngoheka manga tonaka gënanga aha kahirahi madutu toönanga manga roka-rokata, hiädono tongomi mia hoana manga tonaka gënanga ihihanga.”
5Daha o Musa wohiädono o Israel ma nyawaika o pareta nënanga ma Jouino, ”Okia yahö heto-hetongo o Yusuf aidifauku gënanga itiai, 6deʼ karana gënanga ma Jou wotemo o Zelafehad aingoha-ngohaka o ngoheka yobebasi yokawingi de o ngoheka dika önanga yäigo, iti yakunu kao hoana moi dede önanga. 7Moi-moi o Israel manyawa manga tonaka o puhaka aha kahirahi ilikoika de manga hoanika. 8Moi-moi o ngoheka yapopuhaka o tonaka o puhaka o Israeloka moi manga hoana magoronaka, kokiani yokawingi de o hoana gënanga dika. De hoko gënanga moi-moi o Israel manyawa aha ya puhaka manga ete de manga tohora manga tonaka o puhaka, 9hiädono o tonaka o puhaka gënanga itotururua o hoana moi oka deʼ o hoana mahomoaika. Moi-moi o Israeloka manga hoana aha kahirahi toönanga madutu manga tonaka puhaka mahirete.”
10-11Hoʼ imadaene de ma Jou Ai pareta o Musaika, o Zelafehad aingoha-ngohaka o ngoheka yamotoa gënanga, enagënanga, o ngo Mahla, o ngo Tirza, o ngo Hogla, o ngo Milka deʼ o ngo Noa yokawingi de kao oriadodotohi manga amaino. 12Onanga yokawingi de o Manasye o Yusuf aingohaka ai hoana manga ahalino. De hoko gënanga toönanga manga tonaka o puhaka kahirahi idadi madutu toönanga manga ama ai hoanino.
13Genanga doka o datoro-o datoro deʼ o putuhu-o putuhu ma Jou wohi döa-döaka o Israel ma nyawaika de madodagi o Musa, maöraha o Israel manyawa naga o Moab matonaka irata-rataoka o Yordan ma Ngairi madatekoka, imahi tigi-tigika o Yerikho makotaika.
Currently Selected:
O BILANGAN 36: TLB
Highlight
Share
Compare
Copy
Want to have your highlights saved across all your devices? Sign up or sign in
