O BILANGAN 23
23
1O Bileam wato o Balakika, ”Nohigoko o ngïoka nënanga o huhuba mangï o gahumu tumidi mangale ngohi, deʼ nasadiauku nenangoka dau o hapi manauru o dutu tumidi deʼ o duba manauru o dutu tumidi.”
2O Balak wadiai hokä o Bileam waheto-hetongo unangika. Huhuba mangï mal̄okuoka yogetongo gënanga önanga ihihuba o hapi manauru o dutu moi deʼ o duba manauru o dutu moi. 3Daha o Bileam wïtemo o Balakika, ”Noma okoil̄e ani huhuba itö tuhu-tuhuku Tuanga madatekoka. Magogiriaka gënanga ngohi toiki tïlega ma Jou boteka womau mimamake dede ngohi ekola kowali. Dahaö ngohi tohi ngahu hagala moi-moi ma Jou wahö heto-hetongo ngohino.” De o Bileam woiki woma tengo moi o doporono matubuil̄e, 4deʼ genangokadau ma Jou Madutu woböa unangika. O Bileam wato ma Jou Madutuika, ”Ngohi tohi gokoil̄eoka o huhuba mangï o gahumu tumidi deʼ tohihuba o hapi manauru o dutu moi deʼ o duba ma nauru o dutu moi o huhuba mangï moi-moi mal̄okuoka gënanga.”
5De ma Jou wohingahu o Bileamika okia kokiani wahetongo, deʼ wïhuloko ünanga womakilioro o Balakika mangale wohiädono ma Jou Ai behehongo unangika. 6O Bileam womakilioro deʼ wïmakeika o Balak kawoma okoinohi ai huhuba itö tuhu-tuhuku madatekoka, kamamoi de o Moab manga tutuda mata-mata.
7De o Bileam wohidodemo o nubuat nënanga,
”O Aramino, l̄oku mabuturungu doka o wange mahiwaroka,
o Balak, o Moab ma koano ngohi wohiahoko de wato,
’Naino, mangale ngohi notemo-temo,
Nalolai o Israel manyawa gënanga!ʼ
8Kayakunu ngohi talolai,
nako ma Jou Madutu walolai ua?
Kayakunu ngohi tahukumu,
nako ma Jou wahukumua?
9Ol̄oku-l̄oku matubuoka tä make-make önanga;
o doporono-doporonino katä pulono önanga.
Nia make moi o hoana de o berera ima tengo-tengoka yahi detongua o hoana de o berera mahomoa madoomu.
10O Yakub aidifauku hokä o tonaka makafo hakunua häetongo;
o Israel manyawa o goguleua manga ngöe.
Tanu ngohi tohonenge hokä o nyawa manga hininga iriko-rikoto tanu ahi ajali hokä o nyawa geönanga manga ajali.”
11De o Balak wïtemo o Bileamika, ”Okia ngona nodiai ngohino? Ngohi toniao nengino mangale nalolai ahi haturu-haturu. Mä ngona iholoi nahibarakati önanga.”
12O Bileam wohaluhu, ”Ngohi takunu tahetongo duga-duga okia ma Jou wohihö hulo-huloko tahetongo.”
O nubuat mahinoto
13Daha o Balak wïtemo o Bileamika, ”Naino ngone hoiki homa tuono o ngï mahomoaika; genangokadau ngona yakunu namake duga-duga o hidoku moi o Israel manyawa. Nalolai önanga nenangoka dau.” 14Done o Balak wïao o Bileam o Zofim matonaka ilua-luasika, o Pisga mal̄oku matubuil̄e. Genangokadau ma ünanga wo higoko o huhuba mangï o gahumu tumidi deʼ wohihuba o hapi manauru o dutu moi deʼ o duba manauru o dutu moi o huhuba mangï moi-moi ol̄okuoka gënanga.
15O Bileam wato o Balakika, ”Nogogogere nenangoka dau, ani huhuba itö tuhu-tuhuku ahi Tuanga madatekoka, tohi jai-jai ngohi toiki mimamake de ma Jou genangokadau.”
16Ma Jou ima make de o Bileam deʼ wihingahu unangika okia kokiani wahetongo, de wïhuloko ünanga womakilioro o Balakika mangale wohiädono ma Jou Ai behehongo gënanga. 17Done o Bileam womakilioro deʼ wïmakeika o Balak kawoma okoinohi ai huhuba itö tuhu-tuhuku madatekoka, kamamoi deʼ o Moab manga tutuda-tutuda. O Balak woleha okia ma Jou waheto-hetongoka, 18de o Bileam wahetongo o nubuat nënanga,
”Hei, Balak, o Zipor aingohaka, naino,
noihene okianaga tomau tahetongo.
19Ma Jou Madutu hokä o nyawaua
igapanga ima toduba deʼ yöigo yoeluku.
Nako ma Jou Madutu wojaji,
maraioka ünanga waganapu!
Nako ünanga wotemo,
marai aha idadi!
20Ngohi wohihuloko tohibarakati;
deʼ nako ma Jou Madutu wohibarakati,
takunua tatauru tohigilio.
21O Yakuboka koiwa hamake o dorou;
o Israeloka koiwa marupa o huha.
Ma Jou toönanga manga Jou Madutu, naga dede önanga.
Onanga youlili: Unanga o Koano!
22Ma Jou Madutu wä ao önanga o Mesiroka deyohupu;
hokä o banteng ihuhuhuku Unanga woparangi mangale önanga.
23Koiwa naga o matara iwil̄abo o Yakubika
koiwa naga o maihi yadukuata o Israelokaika.
Mangale o hoana de o berera gënanga o nyawa aha yotemo,
’Nia make ihö hera-heranga wadodiai ma Jou Madutu!ʼ
24O hoana de o berera gënanga yomomiki hokä o singa mabeka,
deʼ ima oko yototiail̄e hokä o singa manauru.
Enanga koima idu owahi ihira demainomo yaol̄omo
deʼ yaokere o honenge ma awunu yagö goli-goli.”
25De o Balak wïtemo o Bileamika, ”Iböto, nako ngona noluku nalolai o Israel manyawa; mä uha hakali-kali nahi barakati önanga!”
26O Bileam wohaluhu, ”Koigoungua ngohi tahetongoka ngonaika ahi Tuanga ngohi aha tadiai hagala ma Jou wohi popareta!”
O nubuat mahangeoka
27O Balak wätemo, ”Nia ino ngone hoiki o ngï mahomoaika. Hohi orikikaua ma Jou Madutu woni higumal̄a ngona nalolai o Israeloka mangale ngohi o ngïoka gënanga.” 28De wiao o Bileam o Peor mal̄oku matubuil̄e yohimangika o tonaka ikokakaha. 29O Bileam wïtemo o Balakika, ”Nohigoko o huhuba mangï o gahumu tumidi nenangoka deʼ nasadia uku nenangoka o hapi manauru o dutu tumidi deʼ o duba manauru o dutu moi.” 30O Balak wadiai hokä o Bileam wahö heto-hetongo. Unanga wohihuba o hapi manauru o dutu moi deʼ o duba manauru o dutu moi o huba mangï moi-moi mal̄okuoka gënanga.
Currently Selected:
O BILANGAN 23: TLB
Highlight
Share
Compare
Copy
Want to have your highlights saved across all your devices? Sign up or sign in
