O BILANGAN 22
22
O Moab manga Koano wïahoko o Bileam
1O Israel manyawa imajoboli deʼ imä tau o Moab matonaka irata-rataoka, o Yordan ma Ngairi madaera mahonongaka, imahi tigi-tigika o Yerikho makotaika.
2-3Maöraha o Moab manga koano ai romanga o Balak, o Zipor aingohaka, woihene sarakia o Israel manyawa yahidiaioka o Amori manyawa, deʼ o Israel manyawa gënanga kamanga ngöe, ünanga deʼ ai kawaha yongodumu yohaharoka. 4De o Moab manyawa yätemo o Midian manyawa manga tutuda-tutudaika, ”Itedekanokaua o doomu gënanga yaol̄omo hagala moi-moi nanga higilolitino hokä o hapi yaol̄omo o momo o tonaka ilua-luasoka.” De ma Koano Balak 5#2Pet. 2:15-16; Yud. 11 wohidingoto o huhuloko mangale iwi ahoko o Bileam, o Beor aingohaka, wogogere o Petor makotaka imahi tigi-tigika o Efrat ma ngairika o Amau madaeraoka. Onanga wähuloko ihiädono o Bileamika Balak ai behehongo nënanga, ”Nohi öriki, naga o hoana de o berera moi manyawa o Mesir de yaino; manga nyawa ima hikabarihi kiaika honanga deʼ ima hidiaioka yaparangi tongomi mia daera. 6Onanga iholoi yokuata de ngomi. Hoʼ naino! Nälolai önanga mangale ngohi. Mudukua ngomi miakunu mia hohihanga önanga deʼ mia duhu önanga o bereraka nënanga. Hababu ngohi tongaku o nyawa ngona nahi barakati aha yamake o barakati deʼ o nyawa ngona nalolai aha yamake o bodito.”
7De o Moab deʼ o Midian manyawa manga tutuda-tutuda gënanga yoiki de yoao o Bileam ai hewa hupaya ünanga wömodeke o Israel manyawa walolai. Imahi adonika o Bileamoka, önanga ihiädono unangika ma Koano Balak ai behehongo. 8O Bileam wätemo onangika, ”Nimä iduohi nenangoka dau. Yarehe aha ngohi tinï hiabari okia ma Jou waheto-hetongo ngohino.” De o Moab manga tutuda-tutuda gënanga yogogere o Bileam wogogoge roka.
9Daha ma Jou Madutu waika o Bileamika deʼ wïleha, ”Bileam o nagona o nyawa geönanga yogogogere ani ngïoka?”
10O Bileam wohaluhu, ”Onanga ma Koano Balak ai huhuloko o Moabino mangale ihiabari 11o hoana de o berera moi manyawa o Mesir de yaino imahi gerewotoka kiaika honanga. Ma Kaono Balak wahuloko ngohi talolai o nyawa geönanga mangale ünanga, hupaya ünanga wakunu waparangi deʼ wäduhu önanga.”
12Ma Jou Madutu wato o Bileamika, ”Uha noiki de o nyawa geönanga, deʼ uha nalolai o hoana manyawa gënanga, karana önanga Tahi barakatioka.”
13Yarehino mawange o Bileam wätemo o Balak ai huhuloko-huhulokika gënanga, ”Nilio, ma Jou wohihi gumal̄aua ngohi toiki dede ngini.” 14De önanga imakilioro o Balakika deʼ ihi ngahu unangika o Bileam woluku waino dede önanga.
15Daha o Balak wahidingoto iholoi yowöe ai huhuloko iholoi ikokurutil̄e manga pangkati de yohö hira-hira. 16Onanga ihi ngahu o Bileamika o Balak ai behehongo gënanga, ”Ngohi tagoungu togahoko: noböa deʼ uha noluku. 17Ngohi aha tonihi döaka ani hewa duru kahangöe, deʼ nadiai okiadika ngona naheto-hetongo. Noböa, deʼ nalolai o hoana manyawa gënanga mangale ngohi.”
18Mä o Bileam wohaluhu, ”Ngarokä mata-mata o haaka deʼ o gurasi naga ma Koano Balak ai kadato magoronaka wohifangu ngohino, ngohi takunua tatilakuru Ai pareta ma Jou, ma Jou Madutu ngohi tihuba-huba. Ngaroka o hali mai teteke magoronaka ma ngohi takunua talawani. 19Mä kayaoa de nimaidu okahi nenangoka dau, hokä o huloko yohira-hira yadiai. Ngohi toigo tohiöriki boteka kanagahi Ma Jou womau wahetongo ngohino.”
20O Hutu gënanga ma Jou Madutu waino o Bileamino deʼ wïtemo, ”O nyawa geönanga yoböa mangale yogahoko ngona noiki dede önanga. Hoʼ noma hidiai la noiki. Mä nodiai duga-duga okia inihi popareta ngonaika.”
21Yarehino mawange o Bileam wohinoa ai gogogere ai keledaioka, daha wänïki o Moab manga tutuda-tutuda gënanga.
O Bileam de ai keledai
22Mä maöraha o Bileam woiki, ma Jou Madutu wongamo. Magogiriaka o Bileam wöbarene ai keledai, yahinoto iwï lö leleani iwi tomoteke, ma Jou Ai malaekat imaokoino o ngekomo mahi dogoronaka la witä tatoko ünanga. 23Yamake o malaekat ima okoino genangokadau de ma oworo ya rahukil̄e o keledai gënanga yörehene o ngekomo deʼ ima loliti o dumuleika. O Bileam wagohara o keledai gënanga deʼ wao wohi gilio o ngekomika. 24De ipaha ma Jou Ai malaikat ima okoino o ngekomo madodehe hotoka, hinoto o anggur madumule de o bebeno o mehele ari hohononga mahidogorona. 25Maöraha o keledai gënanga yamake ma Jou Ai malaikat, ënanga imahi ditoko o ngekomo madatekika hiädono o Bileam ai l̄ou ihi dobilatu o mehelika. O Bileam wagoharoli o keledai gënanga. 26De ma Jou Ai malaikat imatagali, deʼ ima okoino o ngï iholoi itehehotoli hiädono koiwa naga o ngekomo mangale ya kaika mahigilika ekola manirakika. 27Ya make ma Jou Ai malaikat, o keledai gënanga ima ruba. O Bileam wongamo deʼ wagohara o keledai gënanga de ai diki-diki. 28De ma Jou wadiai o keledai gënanga yakunu itemo-temo. O aiwani gënanga o Bileamika yato, ”Okia ngohi todiai ngonaika Tuanga hiädono Tuanga nohi gohara hiädono nohigali mahange?”
29O Bileam wohaluhu, ”Ngona nomahigogule ngohi! O demo ade naga de ahi diaoka, maraioka ngohi toni toma!”
30O keledai gënanga ihaluhu, ”Koigoungua ngohi nënanga Tuanga ani keledai madekanoka Tuanga nohi bare-barene? Mamoi iböto ngohi tonilawani ngonaika Tuanga?”
”Kowali,” o Bileam wohaluhu.
31Daha ma Jou wadiai o Bileam yakunu wamake ma Jou Ai malaikat-malaikat ima okoino genangokadau de maoworo imä rahukil̄e. De ma japatioka o Bileam womahi tudukuku o tonakuku deʼ wohuba. 32Ma Jou Ai malaikat wïleha, ”Yadodoa ho ngona nagohara ani keledai hiädono nohigali mahange? Ngohi toböa mangale toni tatatoko ngona, hababu imoteke ahi damake itorou ngona noiki. 33Maöraha ani keledai ihimake ngohi, enanga imahiditoko o o ngekomo madatekika hiädono ihigali mahange. Nako kowali, marai ngona tonitomaka, mä ani keledai gënanga tohihalamati.”
34O Bileam wohaluhu, ”Ngohi tobaradohaka. Ngohi kotohi orikua Tuanga noma okoino o ngekomo mahi dogoronaka mangale no hi tatatoko ngohi. Mä o öraha nënanga, nako imoteke ani damake Tuanga itorou ngohi tohigila-gila o dodagi nënanga, ngohi aha tolio.”
35Mä ma Jou Ai malaikat yato, ”Nonïki dika de o nyawa geönanga. Ma ngona duga-duga yakunu nahetongo okia toni hulo-huloko nahetongo.” Done o Bileam wohi gila-gila ai dodagi de o Balak ai huhuloko-huhuloko gënanga.
O Balak wï buhuku o Bileam
36Maöraha o Balak woihene o Bileam aha woböa, ünanga woiki wïbuhuku o Bileam o Moab ma kotaika, magogere o Arnon ma Ngairi madatekoka, o Moab madaera mabatingoka. 37O Balak wato unangika, ”Yadodoa ho ngona noböaua maöraha toniähoko madodihiraka? Boteka nato ngohi takunua tofangu ani hewa?”
38O Bileam wohaluhu, ”Aa, öraha nënanga ngohi toböaka. Mä ngohi koiwa ahi haku tahetongo okianaga sowaliua ma Jou Madutu wohi hulo-huloko ngohi tahetongo.” 39Done o Bileam woiki de o Balak o Huzot makotaika. 40Genangokadau o Balak wohihuba o hapi o dutu muruono naga deʼ o duba. O aiwani ma akeme gënanga o hidoku moi wihi döaka o Bileamika deʼ o tutuda-tutuda ima kokomoteke dede ünanga.
O Bileam wohi dodemo ai nubuat madodihiraka
41Yarehino mawange o Balak wïao o Bileam yadöa o Bamot Baal madoporonil̄e. Genangoka o Bileam wakunu wä make o Israel manyawa o hidoku moi.
Currently Selected:
O BILANGAN 22: TLB
Highlight
Share
Compare
Copy
Want to have your highlights saved across all your devices? Sign up or sign in
