O BILANGAN 24
24
1O öraha nënanga o Bileam wanakoka ma Jou Madutu womau ünanga wahibarakati o Israel manyawa. Hababu gënanga ünanga woikua wolingiri o nonako-o nonako hokä ihira wadodiai. O Bileam wapulono o tonaka ikokakahaika, 2deʼ wämake o Israel manyawa magogiriaka imä tau o doomu-o doomu magoronaka imoteke de manga hoana-manga hoana. Daha ma Jou Madutu Ai womaha iwi kuaha o Bileam, 3deʼ ünanga wahetongo o nubuat nënanga,
”Nënanga ai behehongo o Bileam, o Beor aingohaka,
womatengo wototailako ai demo-demo.
4Wo ihe-ihenoka ma Jou Madutu Ai demo-demo deʼ wamake o himatoko Duru wo Kokuahaino womahi ruba-ruba, mä ai lako ihohelenga.
5Hokokia mahailoa hagala ani tau hei Yakub,
deʼ hagala o ngï ani gogere hei Israel!
6Hokä o wai ilua-luasi ima hoheika,
ekola o dumule o ngairi madatekoka;
hokä o gaharu magota ma Jou wadö dato-datomo,
ekola o aras magota o ngairi madatekino.
7Onanga yamake o awana ma akere de maboboloi,
manga gihihi yamake o akere mangöe.
Manga koano woutumu, woma hiholoi de o Agag,
deʼ ai popareta aha ihi amo-amoko.
8Ma Jou Madutu wä ao-ao önanga o Mesiroka deʼ yohupu,
hokä o banteng ihö huhuhuku woparangi mangale önanga.
Manga haturu hagala o hoana de o berera aha yalahiri yamata,
toönanga manga kobo-kobongo aha yawede-wederuku,
deʼ toönanga manga toimi watobi-tobikoka.
9 #
Kej. 12:3, 49:9 O hoana de o berera gënanga hokä o singa manauru deʼ o singa mabeka,
ima motumuku deʼ ima luluiha.
O nagona yobarani yatumomiki enanga?
Tanu o nyawa inihi bobarakati ngona yahibarakati,
deʼ o nyawa inilololai ngona yahilolai.”
10O Balak de ai dohata womä bokotino deʼ wïtemo o Bileamika, ”Ngohi toni ahoko la nalolai ahi haturu-haturu, mä önanga iholoi nahi barakati hiädono nohigali mahange. 11Oraha nënanga ngona yakunu noiki, nolio ani tauika! Ngohi tonihi jaji o hewa ngonaika, mä ma Jou woni higumal̄aua natarima o hewa gënanga.”
12O Bileam wohaluhu, ”Koigoungua ngohi tahetongoka ani huloko-hu huloko ahi Tuanga 13ngarokä ahi Tuanga nohihidöaka mata-mata o haaka deʼ o gurasi naga ani kadatoka ahi Tuanga, ngohi takunua tatilakuru ma Jou Ai pareta deʼ todiai okianaga moi tongohi ahi hininga mahuka? Ngohi duga-duga takunu tahetongo okianaga ma Jou wohihuloko ngohi tahetongo.”
O nubuat-nubuat mabobaha
14O Bileam wato o Balakika, ”Oraha nënanga ngohi tomau to lio tongohi ahi hoanaa de ahi bereraika. Mä kotoikowahi, kayaoa de ngohi tohingahu ngonaika ahi Tuanga mangale okianaga aha yodiai ani hoana de ani bereraika ahi Tuanga o wange maduruino.” 15De o Bileam wahetongo o nubuat nënanga,
”Nënanga ai behehongo o Bileam o Beor aingohaka;
womatengo wototailako ai demo-demo
16wo ihe-ihenoka ma Jou Madutu Ai demo-demo,
deʼ yakunu winako Duru woko Kurutil̄e;
wimake womahi matoko Duru woko Kuahaino
ikali womahi ruba-ruba mä ai lako ihohelenga.
17Timake ünanga, mä o öraha nënangua;
tipulono ünanga, mä kamago gurutikahi.
Womatengo o koano ai ahali o Israelino,
aha woböa hokä o murumu itotararono.
O Moab manga tutuda-tutuda aha wawede-wederuku
o Set ai hoana de ai berera aha wawedere.
18O Edom matonaka manga haturu aha yogogere mä o Israel yodiai o manarama ipoputurungu.
19O Yakubino aha woböa womatengo wokokuaha,
wabinaha hagala ai haturu.”
20Ipaha o himatoko magoronaka gënanga o Bileam wämake hagala o Amalek manyawa. Done ünanga wähetongo o nubuat nënanga,
”Hagala o hoana de o berera o duniaka,
o Amalekoka duru yokuaha. Mä mabobahaka o hoana de o berera gënanga,
aha koyaiwaka kahi ado-adonika.”
21O himatoko magoronaka o Bileam wämake o Kain aidifauku daha wähetongo o nubuat nënanga,
”Ani ngï nogogogere igoungu ikekete,
hokä o igutu o doporono o helewo mal̄okuoka.
22Mä ngini o Keni manyawa, aha inï binaha,
itedekanoka uali o Asyur inigoraka ngini hokä o dagokino.”
23De ipaha o Bileam wahetongo o nubuat nenangoli,
”Nibodito! O nagona niwango-wango,
nako ma Jou Madutu wodiai o hali gënanga?
24Mä o Siprusino aha iböa o kapa o doomu moi,
önanga aha yahohihanga o Asyur deʼ o Heber,
de ipaha o kapa madoomu gënanga ma aha ibinaha.”
25Daha o Bileam womahidiai womau wolio ai ngï wogogogere, deʼ o Balakö mawoiki.
Currently Selected:
O BILANGAN 24: TLB
Highlight
Share
Compare
Copy
Want to have your highlights saved across all your devices? Sign up or sign in
