O BILANGAN 21
21
Yä utumu o Kanaan manyawa
1 #
Bil. 33:40
O Arad gënanga moi o kota o Kanaan maberera mahidokuoka koreharail̄e idaduoka. O kota gënanga ma koano maöraha wo ihene o Israel manyawa yakaino yatilakuru o Atarim mangekomo, ünanga woiki wä parangi önanga deʼ wätagoko yamuruona naga toönanga manga hidogoronaka. 2De o Israel manyawa yojaji ma Jouika hoko nënanga, ”Nako Ngona nomihi döaka o utumu biaha ipatutu ngomino o nyawa geonangika, önanga deʼ hagala manga kota aha ngomi mia binaha hiädono imata.” 3Ma Jou watarima o Israel manyawa manga gogahoko deʼ wä riwo önanga wähihanga o Kanaan manyawa. Done o Israel manyawa yäbinaha o Kanaan manyawa gënanga de inoli toönanga manga kota, de o ngï gënanga önanga ihi romanga o Horma.
O dodiha o tabaga
4 #
Ul. 2:1
De ipaha o Israel manyawa yamal̄a o Hor mal̄oku, deʼ yal̄ë o ngekomo yodumutu o Akaba ma Jikoika, mangale yogiloliti o Edom madaera. Mä o ngekomo mahoanoka, o kawaha gënanga imataka manga sabari, 5#1Kor. 10:9 deʼ yongamo ma Jou Madutuika deʼ o Musaika. ”Yadodoa, ho ngona nomï ao ngomi o Mesir mabereraka de mihupu? Boteka mangale imï toma ngomi o tonaka ikokakahaka nënanga? Nenangoka koiwa o inomo, deʼ o akere makoiwa. Ngomi mio gihounu dede o inomo ma ake-akere nënanga!” 6Ho ma Jou wädotagao o dodiha ibiha-biha o kawaha gënanga manga hidogoronaka. O Israel manyawa manga ngoë yohonenge yätuduku o dodiha-dodiha gënanga. 7De o kawaha gënanga yaino iwï himanga o Musa deʼ yotemo, ”Ngomi mibaradoha karana minï ngamo ma Jouika deʼ ngonaika. Nomä niata ma Jouika hupaya o dodiha-dodiha gënanga ikurutika dede ngomi.” Done o Musa waniata o kowaha gënanga. 8De ma Jou wihuloko o Musa wodiai o dodiha tabaga o gahumu moi, deʼ wakelengauku moi o liate mal̄okuoka. Moi-moi o nyawa yätudu-tudukoka o dodiha, aha yotogumu nako yölega o dodiha o tabaga gënanga. 9#2Kok. 18:4; Yoh. 3:14 Done o Musa wodiai o dodiha tabaga deʼ wakelengauku o liate mal̄okuoka. Moi-moi o nyawa yätudu-tuduku o dodiha, yakunu yotogumu nako yapulono o dodiha tabagaika gënanga.
O Hor mal̄okuoka de o Moab ma Waika
10O Israel manyawa imä joboli, deʼ imä tau o Obot ma kotaka. 11O ngï gënanga yamal̄a de ibötoönanga imä tau o Abarim maberera magiliangoka o tonaka ikokakahaka o Moab madaera o wange mahiwaroka idaduoka. 12De ipaha önanga imä tau o Zered ma Waioka. 13Gengoka de önanga imajoboli deʼ imä tau o Arnon ma Ngairi mahonongaka, o tonaka ikokakahaka imahoheika o Amori manyawa manga daeraika. O Arnon ma ngairi gënanga marupa o batingi o Moab manyawa manga daera de o Amori manyawa manga daera. 14Mahababu gënanga ’Ma Jou Ai Parangi ma Bukuoka’ ya tulihi: ”.... O Waheb makapongo, o Sufa madaeraoka de mawai-wai, o Arnon ma Ngairi 15deʼ mawai-wai magelehoro imahoheika hiädono o Ar makapongika deʼ yödumutu o Moab manyawa manga daera ma batingika.”
16Genangoka de önanga yoiki o ngï yahö heto-hetongika o Beer, mamangarati hagala o humu. Genangoka ma Jou wïtemoka o Musaika, ”Nä huloko o kawaha imatoomu; Ngohi aha tahidöka o akere onangika.” 17O öraha gënanga o Israel manyawa ihi nyanyi o nyanyi nënanga,
”Hei, o humu-o humu, nihibuaele nia akere,
ngomi aha mia tarima de o nyanyi.
18O humu yahö hai-haiti yobö balu-baluhu
deʼ mia hoana de mia berera matutuda
yohaiti de manga tutuda madiki-diki
dede toönanga manga kuaha manonako madiki-diki.”
O tonaka ikokakahaka de önanga ima tururu o Matanaika, 19deʼ genangoka de o Nahalielika daha o Bamotika, 20de ipaha o Moab manyawa manga daeraika o Pisga mal̄oku matubu matimiuku yöhima-himanga o tonaka ikokakahaika.
Ma koano Sihon deʼ ma Koano Og yä utumu
(Ul. 2:26–3:11)
21Daha o Israel manyawa ihi dingoto o huhuloko-huhuloko o Sihonika, o Amori manga koano, mangale ihiädono o behehongo nënanga, 22”Nomi higumal̄a ngomi mia tilakuru ani berera Tuanga. Ngomi de tongomi mia aiwani o gigini aha komiö rehenua o ngekomo deʼ aha komiwohamua o dumule-dumuleika ekola o angguru madumule ekola o akere o humuoka. Ngomi aha komiö rehenua o ngekomo ma amoko hiädono ngomi mihupu de ani daeraka Tuanga.” 23Mä ma Koano Sihon wahigumal̄aua o Israel manyawa ya tilakuru ai berera. Unanga wätoomu ai duduono de yoiki o Yahas ika o tonaka ikokakahaka deʼ yaparangi o Israel manyawa genangoka. 24Mä o parangi magoronaka gënanga manga ngöe o Amori manga tentara yohonenge o Israel manyawa yätoma. Daha o Israel manyawa yogogere toönanga manga daera o Arnon ma Ngairino hiädono o Yabok ma ngairika, enagënanga o Amon manyawa manga daera mabatingi, hababu o batingi gënanga duru kahä kuata magogoana. 25De hoko gënanga o Israel manyawa yaora o Amori manyawa manga kota mata-mata, ihidetongo o Hesybon deʼ mata-mata o kota maiteteke magilolitino, de önanga yogogere genangoka. 26O Hesybon gënanga ma Koano Sihon ai kota ma amoko. Unanga ma moi iböto woparangi wïlawani o Moab ma koano deʼ waora ai daera magurutika hiädono o Arnon ma ngairi. 27Mahababu gënanga o dola bololo yotuli-tilihi yodol̄a bololo hoko nënanga,
”Niädono o Hesybonika,
ma Koano Sihon ai kotaika.
Ngomi miö igo miö lega o kota nënanga
ihigoko deʼ ihidiai okali.
28 #
Yer. 48:45-46
Mamoiuku o kotaino nënanga
o Sihon manga duduono yotagi manga himangika hokä o uku. Yawö wede-wedere o Ar makota o Moab ma tonakoka,
deʼ yakuaha o doporono-doporono imoteke magurutika o Arnon.
29Ei o Moab manyawa, ngona nobodito!
Na huba-huba o Kamos, ngona nobinaha!
Ngona ani gikiri ini mal̄aika
nodadi o dagi-dagino,
ani ngongoheka yodadi
o Amori ma koano ai dagokino.
30Mä öraha nënanga toönanga
manga difauku yobinaha
o ngekomo magurutu
o Hesybonoka de o Dibonika,
o Nasyimoka de o Nofahika
o Medeba madatekoka.”
31De hoko gënanga o Israel manyawa yögogere o Amori manyawa manga daeraoka. 32De ipaha o Musa wähuloko hagala o nyawa yoiki yo lingiri ngekomo duru maoa-oa mangale yaparangi o Yaezer ma kota. Daha o Israel manyawa yaora o kota gënanga inoli hagala o kota maiteteke magilolitino deʼ yäduhu o Amori manyawa yo gogere dokengoka.
33Genanga de iböto o Israel manyawa yorehene deʼ yal̄ë o ngekomo yodumutu o Basanika. Ma koano Og o Basanino wo tagi ai himangika de ai duduono mangale yaparangi o Israel manyawa o Edrei makotaka. 34Ma Jou wïtemo o Musaika, ”Uha nimodongo. Ngohi aha Tonihi döaka o utumu ngonaika. Ngona aha nihohihanga ünanga hokä ni hidiaioka ma Koano Sihon wopopareta o Hesybon mabereraka.” 35Done o Israel manyawa yahohihanga deʼ iwi toma ma Koano Og, ai ngoha-ngohaka deʼ yongodumu ai kawaha: koiwa naga yogogere. De ipaha önanga y ögogere o berera gënanga.
Currently Selected:
O BILANGAN 21: TLB
Highlight
Share
Compare
Copy
Want to have your highlights saved across all your devices? Sign up or sign in
