O BILANGAN 16
16
O Korah, o Datan deʼ o Abiram manga lolawani
1-2 #
Yud. 11
O Korah o Yishar aingohaka o Kehat ai ahaluku, o Lewi ai hoana, womalawani o Musaika. Unanga iwihi böa yaruange o Ruben aihoanino, enagënanga o Datan deʼ o Abiram o Eliab aingoha-ngohaka, deʼ o On o Pelet aingoha-ngohaka, deʼ yaratuhu hinoto de yamoritoa o tutuda yaheto-hetongo o kawaha yairi-irikika. 3Onanga kamamoi yoiki yahimanga o Musa deʼ o Harun deʼ yotemo, ”Yaoaka gënanga, Musa! Ingodumu o Israel manyawa yatingakoka mangale ma Jou, deʼ ma Jou naga ngone mata-mata nanga hidogoronaka. Mä yadodoa hoʼ ngona nomamao ani diri iholoi ikurutil̄e de ma Jou Ai umati?”
4Woihene gënanga, o Musa womahi tudukuku o tonakuku deʼ woma niata ma Jouika. 5Daha ünanga witemo Korahika deʼ iwinö ninïki. ”Yarehe o ngorumino ma Jou aha wohidumutu ngoneino o nagona Tounanga, deʼ o nagona yatingakoka mangale Unanga. O nyawa Wäiri-iriki aha wahi gumal̄a imahi tigi Unangika. 6-7Yarehe o ngorumino ngona de ininö ninïki kokiani yal̄ë o uku mangï, yonoauku o uku mangaboho deʼ o dupa, deʼ nao o huhuba mangï ika. Kayaoa de ngone aha hamake tongone nanga hido goronaka o nagona wairikoka ma Jou. Yaoaka gënanga, hei Lewi manyawa!”
8De ikali o Musa wïtemo o Korahika, ”Ni ihene, hei o Lewi manyawa! 9Boteka ngini nia pikiri nënanga o hali mahohumujuru o Israeloka manga Jou Madutu winï iriki ngini o Israel manyawa manga hidogoronaka hupaya ngini yakunu nimahi tigi Unangika, deʼ nimanarama Ai Tauoka, inoli nikarajanga mangale o Israel ma nyawa deʼ nïa leleani önanga? 10Ngona, Korah deʼ mata-mata o Lewi manyawa nia makeoka o horomati gënanga ma Jouino, deʼ o öraha nënanga ngini nigahoko mangale nidadioli o imam! 11Nako ngona de ininö ninïki nitaiana o Harunika, igou-goungu ngini niwi lawani ma Jou!”
12De o Musa wähuloko yäahoko o Datan deʼ o Abiram, mä önanga yotemo, ”Ngomi mioluku miaika! 13Yawedonowahi ngona nomïao ngomi o Mesir matonaka burereoka gënanga de nomihi hupu la nomï toma ngomi o tonaka ikokakahaoka nënanga? Kokiani ngona nomï pareta ngomiö? 14Igoungu ngona nomi aoua ngomi o tonaka iboburereika, ekola nomihidöaka o tonaka mimadodumule deʼ o angguru madumule idadi tongomi mia puhaka madutu! Oraha nënanga naga ngona nomau nomï tipu ngomi! Kowali mioluku miaika!”
15O Musa duru iwi tohata deʼ wotemo ma Jouika, ”Jou uha natarima toönanga manga huba. Onangoka kawomatengo ma’ komaiwa tahidadi rugi; maboboloioli o keledai o dutu moi ma komaiwa ngohi tal̄ë onangoka.” 16-17Daha o Musa witemo o Korahika, ”Yerehe naika ma Jou Ai Tauika kamamoi de 250 ininö ninïki. O Harunö aha naga dokengoka. Ngini kokiani niao moi-moi nia uku mangï. Niö noauku o dupa, daha nihihuba ma Jouika.” 18De o nyawa moi-moi imä l̄ë o uku mangï, yonoa o uku ma ngaboho deʼ o dupa, de imaokoino ma Jou Ai Tau mangoranoka ima komoteke de o Musa deʼ o Harun. 19De ipaha o Korah watoomu o kawaha mata-mata, deʼ önanga imaokoino imateke rorihimanga de o Musa deʼ o Harun ma Jou Ai Tau mangoranoka. Itodokanino o kawaha mata-mata yamake ma Jou Ai cahaya maletongo. 20Deʼ ma Jou wätemo o Musa deʼ o Harunika, 21”Nimadohuku de hagala o nyawa gënanga; Ngohi tomau tä binaha önanga öraha nënanga dika.”
22Mä o Musa deʼ o Harun imahi tudukuku iwihuba deʼ yotemo, ”Ya Jou Madutu Ngona nohidö döa-döaka o wowango hagala iwö wango-wangoika. Nako duga-duga womatengo dika wobaradoha, boteka Ngona nangamo yongodumu o kawaha?”
Ma Jou wïtemo o Musaika, 23-24”Nä huloko hagala o nyawa imahi rehene de o Korah, o Datan deʼ o Abiram manga tau.”
25Daha o Musa de iwi nïkino o Israeloka manga tutuda-tutuda, yoiki o Datan deʼ o Abiram manga ngï ika. 26O Musa wätemo o Israel manyawaika, ”Nimahi rehene o nyawa madorou manga tauoka nënanga deʼ toönanga manga kia nagaö mauha nia tigi. Nako ngini nihimotekua ngini aha nibinaha kamamoiuku dede önanga karana toönanga manga baradoha.” 27Daha o Israel manyawa gënanga imahi rehene o Korah, o Datan deʼ o Abiram manga tau-tauoka. O Datan deʼ o Abiram yo hupuoka deʼ magogiriaka imaokoino moi-moi toönanga manga tau mangoranoka, deʼ toönanga manga ngohaka de manga hekata. 28De o Musa wätemo, ”De nënanga ngini aha nihi öriki ma Jou wohi hulokoka ngohi mangale tadiai mata-mata nënanga deʼ gënanga tongohiua ahi mau mahirete. 29Nako o nyawa geönanga yohonenge de biaha madodagi, mahukumanga okia-kiaua ma Jou Madutuino, gënanga manonako ma Jou Wohi huloko ngohi. 30Mä nako ma Jou wodiai okianaga moi komaiwahi ni ihene ma dekana nënanga, deʼ nako o tonaka ibelaka mangale yälahiri önanga, hiädono önanga kamanga ngango yowohama o nyawa yo hone-honenge manga duniauku, ngini nihiöriki o nyawa geönanga iwilawani ma Jou.”
31O Musa wotemo-temo iböto de ipahaino de majapati; o tonaka toönanga manga l̄ou matimiuku ibelaka, 32deʼ yalahiri önanga de toönanga manga roriadodoto inoli mata-mata iwinö ninïki o Korah, deʼ hagala toönanga manga arata. 33Done önanga yotifa kamanga ngango o nyawa yohone-honenge manga dunia magoronauku de hagala toönanga manga kia honanga. O tonaka ibö bela-belaka gënanga itamunoli deʼ önanga yohihanga koyaiwaka o dunia yälahiri. 34O Israel manyawa mata-mata naga genangokadau manga diri ihioara, maöraha önanga yoihene yopöaka, ”Hopiringana! Done ngone inä lahiri o dunia.”
35De ma Jou wadotagao o uku yätuhu-tuhuku yaratuhu hinoto de yamoritoa ihihö huba-huba o dupa gënanga.
O uku mangï
36De ma Jou wïtemo o Musaika, 37-38”Nihuloko o Eleazar ma Imam Harun aingohaka wagoraka o uku mangï gënanga o nguku mahou-hou gënanga deʼ wohibarihi ma kuru makafo o ngï mahomoaika, hababu o uku mangï gënanga ganga itebini. O bara-baranga gënanga ganga manga huba hagala o nyawa yä huku-hukunoka yahohönenge karana manga baradoha. O bara-baranga gënanga itebini karana ihihubaka ma Jou Ai himangoka, hababu gënanga kokiani yatutuku idadi ibal̄äna mangina-ngina mangale o huhuba mangï malape maporetino. O hali gënanga aha marupa o hohininga o Israel manyawaika.” 39De ma Imam Eleazar wal̄ë o uku mangï gënanga deʼ wähuloko o nyawa yatutuku idadi ibal̄äna mangina-ngina mangale o huhuba mangï malape maporetino. 40Genanga marupa o hohininga o Israel manyawaika mahomoa deʼ o Harun aidifauku, kao nyawa moiö mayakunua yoböa o huhuba mangï ika mangale yotuhuku o dupa mangale ma Jou. O nyawa yatotilakuru o datoro gënanga aha yabinaha hokä o Korah deʼ iwinö ninïki. Mata-mata gënanga idiai hokä ma Jou wohi popareta o Eleazarika de itilakuru o Musa.
O Harun wahi halamati o Israel manyawa
41Yarehino mawange o Israeloka yongodumu kayä ngamo-ngamo o Musa deʼ o Harunika. Onanga yotemo, ”Ngini nia tomaka ma Jou ai umati.” 42Magogiriaka önanga imatoomu yälawani o Musa deʼ o Harun, önanga imä lega manga poretoko ma Jou Ai Tauika, deʼ yamake o lobi yatamunu o Tau gënanga, de yamake ma Jou Ai himanga madararono. 43O Musa deʼ o Harun yoiki ma Jou Ai Tau mahimangika, 44de ma Jou wïtemo o Musaika, 45”Nimadohuku de hagala o nyawa gënanga. Ngohi aha tä binaha önanga mangï genangoka dika!”
Onanga yahinotö imahi tudukuku yohuba, 46de o Musa wïtemo o Harunika, ”Na l̄ë ani uku mangï o huhuba mangïoka de mal̄okuoka nogelengauku o dupa. Tai-taiti nao ma Jou Ai umatika deʼ nodiai o baradoha ma apongo ma upacara mangale önanga. Tai-taiti! Ma Jou Ai dohata iramaka deʼ o panyake o bobaku imulaengoka.” 47O Harun wadiai okia o Musa waheto-hetongo. Unanga woma popäta o kawaha manga hidogoronaika magogiriaka ima toomu, deʼ o panyake o bobaku imulaenge yakorona. Done o Harun wo gelenga o dupa o uku mangaboho mal̄okuoka, de wadiai o baradoha ma apongo ma upacara mangale o kawaha. 48O panyake ihö hora-hora gënanga ima togumu, deʼ o Harun naga hagala o nyawa kayo wango-wango deʼ yohone-honengoka manga hidogoronaka. 49O öraha gënanga yohonenge naga ya 14.700 yaetongua önanga yohö hone-honenge o Korah ai lolawani magoronaka. 50O panyake o bobaku gënanga imatogumu ipahaino, o Harun woma kilioro o Musaika ma Jou Ai Tau mangoranoka.
Currently Selected:
O BILANGAN 16: TLB
Highlight
Share
Compare
Copy
Want to have your highlights saved across all your devices? Sign up or sign in
