O BILANGAN 15
15
O datoro mangale o huhuba
1Ma Jou wohidöaka o Musaika 2o datoro-o datoro nënanga kokiani o Israel manyawa ya diai o bereraka aha ma Jou wahidöaka onangika. 3Mangale o huhuba yatö tuhu-tuhuku ekola o huhuba ifangu manga jaji ekola o huhuba hininga mahuka ekola o huhuba o wange ma amoko biaha, ngini yakunu nihihuba ma Jouika: o hapi manauru, o duba manauru, o duba ekola o kabingi. O huhuba-huhuba gënanga mabounu yasanangi ma Jou Ai hininga. 4-5O nagona honanga ihihuba o duba ekola o kabingi mangale o huhuba yatö tuhu-tuhuku ma Jouika, önanga kokiani yoaoli ihi domoteke de o aiwani o gigini gënanga o dutu moi-moi, o gopuno o kilo moi ihi ganu de o zaitun maminya o litere moi mangale o huhuba ihi dodiaiuku, deʼ o litere moioli o angguru, 6Nako ihihö huba-huba gënanga o duba manauru o dutu moi, kokiani ihi hubaö o kilo hinoto o gopuno ihiganu de o zaitun maminya o litere moi de mahononga mangale o huhuba ihi dodiaiuku, 7deʼ o angguru o litere moi de mahononga. O huhuba gënanga mabounu yasanangi ma Jou Ai hininga. 8Nako ihihö huba-huba gënanga o hapi manauru o dutu moi mangale o huhuba yatö tuhu-tuhuku ekola o huhuba o jaji ma bobangu ekola o dame mahuhuba, 9kokiani ihihubaö o gopuno o kilo hange ihi ganu de o zaitun maminya o litere hinoto mangale o huhuba ihi dodiaiuku, deʼ o angguru o litere hinoto. 10O huhuba gënanga mabounu yasanango ma Jou Ai hininga.
11Genanga doka kokiani ihihuba ihi domoteke de o hapi manauru o dutu amo moi, o duba manauru, o duba ekola o kabingi. 12Nako ihihö huba-huba gënanga iholoi de o dutu moi o aiwani o gigini, done o gopuno ihi huba-huba, o minya de o angguru gënanga makokiani yodogo ima kokadaene. 13O hali gënanga kokiani moi-moi o Israel manyawa yadiai maöraha önanga ihihuba. O huhuba gënanga mabounu yasanangi ma Jou Ai hininga. 14O nyawa maporetino womatengo wogö gogere tingini nia hidogoronaka kayaoa wohijai-jai ekola wohigila-gila, kokiani wamoteke mata-mata o datoro gënanga maöraha ünanga wohihuba o huhuba o inomo mabounu yasanangi ma Jou Ai hininga. 15-16#Im. 24:22 Mata-mata o tita deʼ o datoro gënanga kai maketero mangale ngini deʼ o nyawa maporetino yogogogere tingini ni hidogoronaka, hababu ngini deʼ önanga gënanga kani maketero ma Jou Ai lolega magoronaka. Deʼ o hali gënanga imadadi kahi ado-adonika.
17Ma Jou wohi döaka o Musaika 18o dato-datoro nënanga o Israel manyawa kokiani yadiai o bereraka aha ma Jou wahi döaka onangika. 19Nako ngini nimulaengoka nia ol̄omo okia ihihö hasi-hasili o berera gënanga ngini kokiani nia tingaka o hidoku moi mangale ihihö huba-huba yatinga-tingakika mangale ma Jou. 20Nako ngini niharongo o roti o gandum madodi hirakaino nia utuku, o roti gënanga kokiani ihihuba hokä o huhuba yatinga-tingakoka ma Jouika. Nihihuba madodagi imatero de madodagi nihi huba o gandum madodihiraka nia tutuku. 21Moi-moi o roti o gandum madodi hirakaino nia utuku gënanga kokiani kahi ado-adonika ngini nihi döaka hokä o huhuba yatinga-tingakoka ma Jouika.
22-24Nako ngini nihangajaua nialipa moiani o datoro ma Jou wohi döa-döaka o Musaika, imulaenge mawange ma Jou wo hidöaka o datoro gënanga deʼ igila-gila o ngohaka de o danongo, deʼ o howono gënanga yadiai karana o umati ihiörikua o datoro gënanga, done o umati yongodumu kokiani ihihuba o hapi manauru o dutu moi mangale o huhuba yatö tuhu-tuhuku. Ihidomoteke de gënanga kokiani ihihuba o huhuba ihi dodiaiuku deʼ o angguru hokä ihitö tantuoka. O huhuba gënanga mabounu yasanangi ma Jou Ai hininga. Mahomoa de gënanga kokiani ihihuba o duba manauru o dutu moi mangale o baradoha ma apongo mahuhuba. 25De ma imam kokiani wodiai o baradoha ma apongo ma upacara mangale o umati. Done önanga aha yä apongo karana önanga yodiai o howono gënanga koyohangajaua, deʼ karana önanga yoaoka o bara doha ma apongo mahuhuba de inoli o huhuba yatö tuhu-tuhuku ma Jouika. 26Yongodumu o Israel manyawa deʼ o nyawa maporetino yogo gogere toönanga manga hidogoronaka aha tahi apongo, karana mata-mata koyohangajaua yö ngohamoka o howonika gënanga.
27 #
Im. 4:27-31
Nako womatengo dika wohangajaua wobaradoha, done ünanga kokiani wohihuba o kabingi mabeka o dutu moi maumuru o taongo moi mangale o baradoha ma apongo mahuhuba. 28Ma imam kokiani wadiai o baradoha ma apongo ma upacara ma Jou Ai himangoka, hupaya o nyawa geünanga ai baradoha iapongo. 29O datoro gënanga idadioli mangale o nagona dika yohangaja ua yodiai o baradoha, kayaoa ünanga gënanga o Israel manyawa ekola o nyawa maporetino yogogogere toönanga manga hidogoronaka.
30Mä nako o Israeloka womatengo ekola o nyawa maporetino wo hangaja wodiai o baradoha ünanga wihikauku ma Jou. O nyawa geünanga kokiani iwi hukumu iwi hohonenge, 31karana ünanga wilawani ma Jou deʼ wohangaja watilakuru ma Jou Ai tita. O nyawa geünanga wohonenge karana ai howono mahirete.
O nyawa yatotilakuru o Sabat mawange madatoro
32Maöraha o Israel manyawa naga o tonaka ikokakahaka, o nauru womatengo iwimake magogiriaka wotoomu o gota homahi dofo-dofo o Sabat mawangeoka. 33O nyawa geünanga iwiao wähimanga o Musa, o Harun deʼ yongodumu o umati, 34de iwï tumungu karana yanako itiai owahi ünanga kokiani iwï sarakia. 35Ma Jou witemo o Musaika, ”O nyawa geünanga kokiani iwi hukumu iwi hohonenge. Unanga kokiani iwi hihupu de o tau madoomu deʼ dokengoka yongodumu o umati kokiani iwi kaweli de helewo hiädono wohonenge.” 36De yongodumu o umati iwiao iwihi duono o tau madoomu maporetika de iwi kaweli ünanga de o helewo hiädono wohonenge, hokä ma Jou wohi popareta.
O datoro mangale o pakeanga marami-ramini
37Ma Jou wïhuloko o Musa 38#Ul. 22:12 wahetongo o Israel manyawaika, ”Nia pakeanga mabarenika barenika nia diai o rami-ramini deʼ maramini yogetongo nihiliko o lawe mabihi-bihi. Genanga kokiani nia diai hiädono nia ngohaka de nia danonguku. 39O rami-ramini gënanga mangale o hohininga. Ngini nia make magetongo, ngini niohininga hagala Ahi pareta deʼ nihi ngounu. Deʼ karana gënanga ngini aha konihi wohangua Ngohi mangale nia moteke nia nahihu deʼ nia hininga mahuka mahirete. 40O rami-ramini gënanga aha inihidöaka o hohininga mangale mata-mata Ahi pareta, hiädono ngini igou-goungu nidadi Tongohi madutu. 41Ngohi ma Jou nia Jou Madutu; Ngohi tinïao ngini nihupu o Mesirino hupaya Ngohi todadi nia Jou Madutu. Ngohi nia Jou.”
Currently Selected:
O BILANGAN 15: TLB
Highlight
Share
Compare
Copy
Want to have your highlights saved across all your devices? Sign up or sign in
