O MATIUS 28
28
O Yesus womomiki
(Mark. 16:1-10; Luk. 24:1-12; Yoh. 20:1-10)
1Maöraha o Yahudioka manga Puji mawange yatioka, o Minggu mawangeoka duru o ngoru-ngorumino, o ngo Maria Magdalena, deʼ o ngo Maria mahomoahi gënanga yoiki yölega o lungunu gënanga. 2Itodokanino o ohu duru kahägiria. Ma Jou aimalaekat womatëngo, o horogaka de wouti, deʼ walulu mahelewo o lungunu mabebeno gënanga, deʼ wogogeruku mahelewo mal̄okuoka. 3O malaekat gënanga aibiono hokä o leletongo, deʼ ai pakeanga duru kahamagarehe. 4O tentara yogöa-göana genangoka, duru yohawana hiädono önanga yohahara, deʼ ima dadi hokä o nyawa yohonengoka.
5O malaekat gënanga wätemo o ngongohekaika gënanga, ”Uha nihawana! Ngohi tohiöriki ngini niwilingiri o Yesus iwi sosaliboka gënanga. 6Unanga koiwiwa nenangoka. Unanga womomikoka hokä mahira winihi ngahuoka. Nia ino niolega Ai ngï Unanga iwi kelenga. 7Orahanënanga, nioiki nima tai-taiti, nihingahu iwinöninïkika, ’Unanga womomikoka de nënanga naga Unanga woiki wohiraka o Galileaika ngini niwihiduru. Dokengoka ngini aha niwimäke Unanga!ʼ Nio hininga okia winihi ngahuoka nginika.”
8O ngongoheka gënanga imatai-taiti yamal̄a o lungunu gënanga. De yamäo yohawana imaganu yomörene, önanga imapopäta la ihi ngahu o hali gënanga o Yesus iwinöninïkika.
9I todokanino o Yesus waino imakamäke de ongongoheka gënanga, deʼ wätemo, ”Tabea!” Deʼ onanga yaino imahi tigi Unangika, ipaha Ai l̄ou yakololo deʼ iwihuba Unanga. 10”Uha nihawana,” o Yesus wätemo onangika, ”nioiki niahingahu ahiroriadodotika hupaya önanga yoiki o Galileaika; dokengoka önanga aha ihi mäke Ngohi.”
O tentara yogöa-göana i hi ngahu
11O ngongoheka gënanga yosoboka, yamuruono naga matentara yogöa-göana o lungunu gënanga imakilioro o kotaika deʼ ihi ngahu o imam-imam manga häekika mata-mata okianaga i dädadioka. 12O imam-imam manga häeke gënanga imakatatoro ihidailako de o Yahudioka manga tutuda, deʼ yahidöaka o tiwikahä amoko o tentara yogöa-göanika gënanga, 13deʼ yätemo yato, ”Ngini kokiani niahëtongo, ngomi imï kiokoka deʼ o Yesus iwinö ninïki yaino o hutu-hutu deʼ ya tohiki o Yesus ai mayeti. 14Deʼ nako magubernur woihene o hali gënanga, ngomi aha miwi baja ünanga hupaya ngini ma o huha okia-kiaua nia mäke.”
15Deʼ o tentara yogöa-göana gënanga yal̄ë o tiwi gënanga, deʼ yadiai hokä okia yahibehehongo onangika. Mangale karana gënanga o ade-ade gënanga kahi ade-adeohi o Yahudi manyawa manga hidogoronaka hi ädono o wange nënanga.
O Yesus womahi matoko Ai diri iwinö ninïkika
(Mark. 16:14-18; Luk. 24:36-49; Yoh. 20:19-23; Kis. 1:6-8)
16 #
Mat. 26:32; Mark. 14:28 Yangimoi de moi iwinö ninïki o Yesus gënanga yoiki o Galilea madoporonika imamoteke de o Yesus wahi paretaka onangika. 17Maöraha önanga iwi mäke o Yesus dokengoka, önanga ima ruku iwi huba Unanga. Mä naga manga hidogoronaka yongaku i kiria owahi. 18O Yesus womahi tigi onangika deʼ wätemo, ”Ingodumu o kuaha o horogaka deʼ o duniaka ihi döakoka Ngohino. 19#Kis. 1:8 Hababu gënanga nioiki hagala o hoana de o berera o dunia mata-mataika, niahidadi önanga ihinöninïki. Niä ohiki önanga de niahëtongo ma Ama ai romanga, deʼ ma Ngohaka, deʼ ma Jou Madutu ai Womaha. 20Nia dotoko önanga yamoteke mata-mata tinihi poparetaka nginika. Deʼ niohininga Ngohi aha salalu tinïtomoteke ngini hiädono o wange mabaha.”
Currently Selected:
O MATIUS 28: TLB
Highlight
Share
Compare
Copy
Want to have your highlights saved across all your devices? Sign up or sign in
