O MATIUS 27
27
O Yesus o Pilatus aihimangoka
(Mark. 15:1; Luk. 23:1-2; Yoh. 18:28-32)
1Duru o ngoru-ngorumino, mata-mata o imam manga häeke deʼ o Yahudioka manga tutuda yaputuhu la o Yesus iwitoma. 2Onanga aigiama yaliko de o rante, deʼ iwiao, deʼ iwihilapahi o Pilatusika, magubernur o Roma manga popareta.
O Yudas wohonenge
(Kis. 1:18-19)
3 #
Kis. 1:18-19
Maöraha o Yudas wososetia okaua gënanga wamäke o Yesus ai hukumanga yaputuhoka, ünanga womatoduba. Deʼ unanga wohigilio o tiwi haäka moruange gënanga o imam-imam manga häekika deʼ o Yahudioka manga tutudaika. 4Unanga wotemo, ”Ngohi tobaradohaka tihininga dorouoka o nyawa Ai howono koiwa-iwaika, hiädono Unanga aihukumanga iwihohonenge!”
Mä onanga iwï baluhu, ”Mihaduli okia ngomi? Gënanga anihidailako ngona!”
5O Yudas wohikaweli o tiwi gënanga ma Jou ai Tau magoronaika, deʼ woiki de womaliko howohonengoka.
6O imam-imam manga häeke watoomu o tiwigënanga deʼ wotemo, ”O tiwi nënanga o awunu matiwi. I moteke o agama matita, o tiwi nënanga yakunua ihingohama o huhuba mangïuku ma Jou Madutu ai Tauoka.” 7Ho mata-mata imateke fakatioka, önanga yapäke o tiwi gënanga ihi ija o tonaka ihiromanga o Bohoko yo Dodiai manga Tonaka. O tonaka gënanga yapäke o nyawa maporetino manga jere. 8Gënanga doka mahababu hiädono o wange nënanga o tonaka gënanga ihiromanga ”O Awunu ma Tonaka”.
9 #
Za. 11:12-13
De gënanga, idadi hokä okia ma Nabi Yermia wotemoka, enagënanga, ”Onanga yatarima o tiwi haäka moruange, enagënanga o ija o Israel manyawa yafofakatioka, hokä o bobangu unangika. 10Deʼ o tiwi gënanga önanga yapäke la hiija o bohoko yododiai manga tonaka, hokä ma Jou wohi paretaka ngohino.”
O Pilatus watailako o Yesus aiparakara
(Mark. 15:2-5; Luk. 23:3-5; Yoh. 18:33-38)
11Maöraha o Yesus wïhimanga o Pilatus, o berera gënanga magubernur, o Pilatus wïleha, ”Boteka Ngona o Yahudi manyawa manga koano?”
”Hoko gënanga hokä ani demoka,” o Yesus wohaluhu. 12Mä maöraha o imam-imam manga häeke deʼ o Yahudioka manga tutuda, ihidöaka o galaki mangöe o Yesusika, Unanga kowohaluhua.
13Hababu gënanga o Pilatus wïtemo Unangika, ”Boteka Ngona noihenua mata-mata, kiaka önanga inikalaki gënanga?”
14Mä o Yesus kamahuhutulö de wohaluhua, hiädono magubernur gënanga duru wohëranga.
O Yesus aihukumanga yaputuhu iwihohonenge
(Mark. 15:6-15; Luk. 23:13-25; Yoh. 18:39–19:16)
15O Paskah ma Rameanga magëtongo, mabiaha magubernur wälapahi imatëngo o bui manyawa imoteke o nyawa yowöe-wöe manga ngongiriki. 16O öraha gënanga naga womatëngo o hukumanga manyawa iwiheto-hetongo. Ai romanga o Yesus Barabas. 17Hoʼ, de o nyawa manga ngöe ima toomuino, o Pilatus wäleha onangika, ”O nagona ngini niamau ngohi tälapahi mangale ngini? O Yesus Barabas ekola o Yesus iwi hetongo o Kristus?” 18O Pilatus wotemo hokogënanga hababu ünanga wanäko, o Yahudioka yokokuaha iwihilapahi o Yesus unangika karana önanga manga hininga iwï dohata.
19Maöraha o Pilatus wogogerukuohi o adili matauoka, ngoi hekata mohidingoto o behehongo nënanga unangika, ”Uha ngona ganu o nyawa Ai howono koiwa-iwa gënanga aiparakara, hababu mangale karana Unanga, o wange nënanga ngohi tonänere, ahi nänere gënanga hoborohono.” 20Mä o imam-imam manga häeke deʼ o Yahudioka manga tutuda kahoko genangika yahi ngohama o demo itotorou o nyawa yowöe-wöeika gënanga la yogahoko o Pilatusika hupaya o Barabas iwilapahi deʼ o Yesus ai hukumanga iwi hohonenge. 21Deʼ magubernur gënanga wälehaoli önanga, ”Yahinoto o nyawa ne önanga, o naguna ngini nimau ngohi tï lapahi mangale ngini?”
”Barabas,” önanga yohaluhu.
22”Nako hoko gënanga, okia kokiani ngohi todiai de o Yesus iwi heto-hetongo o Kristus?” o Pilatus woleha onangika.
”Unanga niwi salib!” mata-mata önanga yohaluhu.
23”Mä okia Ai dorou?” o Pilatus woleha.
Deʼ onanga yopöaka iholoi ikuatil̄eoli, ”Unanga niwi salib!”
24 #
Ul. 21:6-9
Ma baha o Pilatus woma näko, ünanga wakunokaua okia naga wodiai, deʼ o nyawa manga ngöe gënanga yakunu aha yongamo. Hoʼ unanga wal̄ë o akere, deʼ o nyawa yowöe-wöe manga himangoka gënanga ünanga aigiama waihoro deʼ wotemo, ”Ngohi toluku tomahi tagongo mabobaluhu, mangale o nyawa neünanga Ai honenge! Gënanga ngini nihi dailako!”
25Mata-mata o nyawa yowöe-wöe gënanga yohaluhu, ”Ia, ma l̄aikala ngomi deʼ tongomi miangoha-ngohaka miatagongo ma hukumanga mangale Ai honenge!”
26Deʼ o Pilatus wïlapahi o Barabas mangale önanga, deʼ wähuloko o nyawa iwigohara o Yesus; deʼ wihilapahi Unanga la iwi salib.
O tentaraka imahigogule o Yesus
(Mark. 15:16-20; Yoh. 19:2-3)
27Ipaha o Pilatus aitentaraoka iwiao o Yesus yowohama magubernur aikadatoika, deʼ mata-mata o tentaraoka manga doomu imatoomu o Yesus iwikilolitino. 28Onanga yahuputu o Yesus aipakeanga, deʼ iwihipäke Unangika o juba magoguhurungu. 29Onanga yal̄ë o gota mararaga mahohihika, deʼ yadiai aimakota, deʼ ihi tamunuku o Yesus aihäekuku. Ipaha önanga iwihi jojö o diki-diki o gahumu moi aigiama manirakoka, deʼ yatilabuku ai himangoka, deʼ iwihohedu Unanga. ”Tabea o Yahudi ma Nyawa manga Koano!” önanga yotemo. 30Onanga iwiobiri, deʼ yal̄ë o diki-diki gënanga, deʼ yagohara aimumukuku de o diki-diki. 31Iböto ima higoguleoka Unanga, önanga yahuputu o juba magoguhurungu gënanga, deʼ iwihi päkeoli Ai pakeanga mahirete. Ipaha Unanga iwihi hupu iwiao la iwi salib.
O Yesus iwi salib
(Mark. 15:21-32; Luk. 23:26-43; Yoh. 19:17-27)
32O ngëkomo mahoanoka, önanga imaka mäke de womatëngo o Kirene manyawa airomanga o Simon. Onanga iwipakisa o nyawa gënanga wamoku o Yesus aisalib. 33Ipaha önanga imahiädono o ngï moi maromanga o Golgota, mamangarati ”O häeke ma Kabelanga ma Ngï”. 34#Mzm. 69:22 Genangoka önanga iwihidöaka o Yesus iwihi okere o angguru higanuino okianaga mamali-mali. Mä o angguru gënanga o Yesus watailoka, Unanga woluku waokere.
35 #
Mzm. 22:19
Ipaha önanga iwisalib, deʼ aipakeanga imäkokeregu imoteke o undi. 36Ipaha de gënanga önanga yogogeruku dokengoka iwï göana Unanga. 37Ai häeke mal̄okuil̄e önanga yonuneuku o dulihi, yakorona o galaki Unangika, enagënanga: ”Nenangala o Yesus, o Yahudi ma Nyawa manga Koano”. 38Ihi domoteke dede Unanga önanga yäsaliboli yahinoto yoora-ora deʼ yotoma-toma; womatëngo ainirakoka, deʼ womatengoli aihigiloka.
39 #
Mzm. 22:8, 109:25 O nyawa yakokaino genangino manga häeke yagiwi-giwi, deʼ iwihohedu o Yesus. 40#Mat. 26:61; Yoh. 2:19 Onanga yato, ”Ngona nomau nakilianga ma Jou Madutu ai Tau, deʼ o wange hange dika de nohigokokali! Nako Ngona ma Jou Madutu ai Ngohaka, o saliboka gënanga deno uti, deʼ nohihalamati Ani diri!”
41Hogenangoli o imam-imam manga häeke deʼ o agama maguru-guru inoli o Yahudioka manga tutuda iwihohedu o Yesus. Onanga yotemo, 42”Unanga wahihalamati o nyawa mahomoa, enahioko Ai diri mahirete wakunua wohihalamati. Nako o Israeloka manga koano, kayaoa de öraha nënanga Ngona nouti o saliboka gënanga, dahao ngomi miningaku Ngona. 43#Mzm. 22:9 Unanga wïngaku ma Jou Madutuika de womahetongo Unanga ma Jou Madutu ai Ngohaka. Aa, niaino ngone hïlega boteka ma Jou Madutu womau örahanënanga wihihalamati.”
44Yo ora-ora de yotoma-toma yä sosalib de Unanga gënanga kahoko genangoli i wi hohedu Unanga.
O Yesus wohonenge
(Mark. 15:33-41; Luk. 23:44-49; Yoh. 19:28-30)
45O wange i korona, madëkana o jam hange o Yerusalem maberera gënanga mata-mataika ihuhutu. 46#Mzm. 22:2 O takoro hange o bimaoa, o Yesus wopöaka de Ai ilingi kahakuatil̄e, ”Eli, Eli, lama sabakhtani?” mamangarati, ”Ya Ahi Jou Madutu, ya Ahi Jou Madutu, yadodoa ho Ngona nohi mal̄aika Ngohi?”
47Yamuruono naga genangokadau yoihene o böaka gënanga, deʼ yotemo, ”Unanga wïahoko o Elia!” 48#Mzm. 69:22 Womatëngo manga dodiawo woma tai-taiti woiki wol̄ë o bunga karang, deʼ watono o angguru magogiohikuku. Ipaha ünanga wohi hakarika o didipoika, deʼ wohi peke o Yesus aiuru makaika.
49Mä mahomoa yotemo yato, ”Hodamä, niaino ngone hïlega boteka o Elia waino wihihalamati Unanga!”
50Ipaha o Yesus wopöakoli de Ai ilingi kahakuatil̄e, deʼ wowomaha wohi bobaha.
51 #
Kel. 26:31-33
O guba inünuneuku ma Jou ai Tauoka ikakihi ibëlaka hinoto daku de yauku. O dunia igiwi deʼ o l̄oku mahelewo ibëlaka. 52O lungu-lungunu ihelenga, deʼ manga ngöe ma Jou Madutu aiumati yohone-honengoka yowangokali. 53Ipaha de o Yesus womomiki o honenge mahidogoronaka, önanga yohone-honengoka yohupu manga lungunino, deʼ önanga yowohama o Yerusalem makotaika. Deʼ dokengoka manga ngöe o nyawa yämäke önanga.
54O tentaraoka de manga doomu mahäeke iwïgöa-göana o Yesus önanga duru yohawana, maöraha yamäke o ohu de mata-mata idädadi gënanga. Onanga yotemo yato, ”I goungu, Unanga nënanga ma Jou Madutu ai Ngohaka!”
55 #
Luk. 8:2-3
Genangoka nagaoli manga ngöe o ngongoheka, magurutoka de yölega-lega. Onanga gënanga iwinïkoka o Yesus la iwïriwo o Yesus madero kao Galilea okahi. 56Manga hidogoronaka genangala o ngo Maria Magdalena, o ngo Maria o Yakobus ngoi ayo deʼ o Yusuf, deʼ o Zebedeus aingoha-ngohaka manga ayo.
O Yesus iwi lungunu
(Mark. 15:42-47; Luk. 23:50-56; Yoh. 19:38-42)
57O hutu gënanga woböaino womatëngo wokaya-kaya o Arimatea makotaino airomanga o Yusuf. Unangö o Yesus winöninïki. 58Unanga woiki o Pilatusika, deʼ wogahoko o Yesus aimayeti. Ho o Pilatus wohipareta hupaya o Yesus aimayeti ihidöaka unangika. 59Ho o Yusuf wal̄ë o mayeti gënanga, deʼ wohihawoino de o ngöere magare-garehe, o hutara mahungi. 60Deʼ o Yusuf wakelenga o Yesus aimayeti o lungunuku, o lungunu gënanga tö Yusuf mahirete, de o lungunu gënanga yadiai o doporono i hohelewoka. Iböto gënanga ünanga wödululu o helewo moi ma amo-amoko wohibeno o lungunu gënanga mangorana, deʼ o Yusuf womajoboka. 61O ngo Maria Magdalena deʼ o ngo Maria mahomoahi yogogeruku genangokadau yöhimangika o lungunu gënanga.
Yogöa-göana o lungunu
62Yarehino mawange, o Yahudioka manga Puji mawangeoka, o imam-imam manga häeke deʼ o Farisi manyawa yoiki kamamoi, o Pilatus iwï himanga 63#Mat. 16:21, 17:23, 20:19; Mark. 8:31, 9:31, 10:33-34; Luk. 9:22, 18:31-33 deʼ yotemo, ”Tuanga, ngomi mio hininga maöraha wotipu-tipu gënanga kawoma ngangoikahi, Unanga wotemoka, ’Ipahaika o wange hange Ngohi aha tomomiki’. 64Karana gënanga, nähuloko o nyawa yögöana o lungunu gënanga ihidodiai, hiädono o wange hangeoka, hupaya iwinöninïki yakunua yatohiki Ai mayeti deʼ yahetongo o nyawaika, Unanga womomikoka, o honenge mahidogoronaka. Deʼ o tipu mabobaha nënanga aha i holoi itorou de madodihiraka.”
65”Ngini dema ënanga niatentara yogöa-göana,” o Pilatus wätemo onangika, ”nioiki la niogöana o lungunu gënanga, kagenangö magogöana.”
66Ho önanga yoiki o lungunika de yasegeluku madadamunu o helewouku, deʼ yögöana mahimangoka, hupaya koiwa naga yaruae o lungunu gënanga.
Currently Selected:
O MATIUS 27: TLB
Highlight
Copy
Compare
Share
Want to have your highlights saved across all your devices? Sign up or sign in
