O MARKUS 1
1
O Yohanis Wo ohi-ohiki airiwayati
(Mat. 3:1-12; Luk. 3:1-18; Yoh. 1:19-28)
1Nenangala o Abari ma Oa mangale o Yesus Kristus, ma Jou Madutu ai Ngohaka. 2#Mal. 3:1 O Abari ma Oa gënanga imuläenge hokä ma Nabi Yesaya wotulihi, hokonënanga,
”Ma Jou Madutu wotemo, ’Ne ünanga Ahi huhuloko,’
’Ngohi tihuloko unanga wohira de Ngona,
hupaya ünanga wahelenga o ngëkomo mangale Ngona.’
3 #
Yes. 40:3
Naga o nyawa yopöa-pöaka o tonaka i kokakahaka,
’Ma Jou ai ngëkomo nia sadia; nihirata mangëkomo aha genangino wakokaino.’ ”
4Hokä gënanga itulihoka, kogenangoli o Yohanis wohupu womahinyata o tonaka ikokakahaka. Unanga wäohiki o nyawa deʼ wohingahu o abari ma Jou Madutuino. ”Ngini kokiani nitoba yakunokaua o baradoha nidiai, deʼ kokiani inïohiki hupaya ma Jou Madutu winïapongo,” hokogënanga o Yohanis wotemo. 5O Yudea maberera deʼ o Yerusalem manyawa mata-mata yoiki ihigihene o Yohanis wotemo-temo. Onanga imangaku manga baradoha, deʼ o Yohanis wäohiki önanga o Yordan ma Ngairoka.
6 #
2Kok. 1:8
O onta o aiwani ma ago-agomo toënanga magogo deyadiai o Yohanis aipakeanga, gënanga womahi baju. Ai gorona maninikutu o aiwani makai, deʼ ai inomo o kahoho deʼ o ohungu honganika magula. 7Unanga wohingahu o abari nënanga, ”Dahaö ngohi de iböto, aha woböa womatëngo iholoi wolamoko de ngohi. Toma ruku tahohe Ai hapato maliliko, kagangö dë topatutua. 8Ngohi tinï ohiki ngini de o akere, mä Unanga aha winï ohiki ngini dema Jou Madutu ai Womaha.”
O Yohanis wïohiki o Yesus
(Mat. 3:13-17; Luk. 3:21-22)
9O öraha gënanga o Yesus woböa o Nazaret o Galilea madaeraka de waino, deʼ o Yohanis wïohiki Unanga o Yordan ma Ngairoka. 10Hoko gënanga o Yesus o ngairil̄e wopuda de woma böa, ünanga wamäke o dihanga ihelenga deʼ ma Jou Madutu ai Womaha iuti Unanguku hokä o namo dara. 11#Kej. 22:2; Mzm. 2:7; Yes. 42:1; Mat. 3:17, 12:18; Mark. 9:7; Luk. 3:22 Ipaha yoihene ma Jou Madutu ai ilingi ihingahu, ”Ngona Ahi Ngohaka tonï dora-dora. Ngona nasanangi Ahi hininga.”
O Yesus o Ibilihi iwitaili
(Mat. 4:1-11; Luk. 4:1-13)
12Gënanga iböto, de gila-gila ma Jou Madutu ai Womaha iwiao o Yesus yoiki o tonaka i kokakahaika. 13O wange moruata Unanga wogogere genangokadau, o Ibilihi iwitaili. O aiwani-aiwani mahuhuhukö naga kamamoi dede Unanga genangokadau, deʼ o malaekat-malaekat i wï leleani Unanga.
O Yesus wä ahoko o nawoko yolingi-lingiri yaruata
(Mat. 4:12-22; Luk. 4:14-15, 5:1-11)
14O Yohanis de iwibuioka, o Yesus woiki o Galileaika deʼ dokengoka Unanga wohiabari o Abari ma Oa ma Jou Madutuino. 15#Mat. 3:2 Wato, ”Ma Jou Madutu i tedekanokaua aha muläenge wopareta. Nitoba yakunokaua o baradoha nidiai, deʼ niangaku o Abari ma Oa ma Jou Madutuino!”
16Maöraha o Yesus wotowongi o Galilea ma Taaga mahohanino, Unanga wämäke yahinoto o nawoko yolingi-lingiri, enagënanga o Simon deʼ aidödoto o Andreas. Onanga manga gogiriaka o nawoko yotagoko o taagaka gënanga de o homa. 17O Yesus wätemo onangika, ”Nihi nïki Ngohi. Ngohi aha tinï dotoko ngini o nyawa nihoma.” 18Gila-gila önanga yamal̄aika manga homa de iwi nïki o Yesus.
19O Yesus wotowongi gila-gila, de wä mäkeoli o riadodoto yahinoto mahomoa, enagënanga o Yakobus deʼ o Yohanis, o Zebedeus aingoha-ngohaka. Onanga naga manga ngotiroka, deʼ manga gogiriaka yoboro manga homa. 20O Yesus gila-gila wä ahoko önanga. Deʼ onanga iwimal̄aika manga ama o ngotiroka de toona manga hewa manyawa. Deʼ o Yakobus deʼ o Yohanis yoiki iwinïki o Yesus.
Womatëngo iwï ngohamika o womaha madorou
(Luk. 4:31-37)
21O Yesus deʼ iwinöninïki imahiädono o Kapernaum makotaika. O Yahudioka manga Puji mawange moioli, o Yesus wowohama o pupuji matauika deʼ muläenge wodotoko. 22#Mat. 7:28-29 O nyawa yoihe-ihene, yokiriri mangale Unanga wodotoko madodagi. Hababu, Unanga wodotoko de makumati, imako howono de o guru-guru agama yodotoko.
23O öraha gënanga womatëngo iwï ngohamika o womaha madorou, wowohama o pupuji matau magoronaika, de wopöaka, 24”Hei Yesus, o Nazaret manyawa, Ngona nomau okia nodiai dede ngomi? Ngona naino lä nomi binaha ngomi? Ngohi tohi öriki Ngona o nagona: Ngonala o huhuloko notebi-tebini ma Jou Madutuino!”
25”Nomarïdi!” o Yesus wodorohu o womahika gënanga, ”Nohupu de o nyawa nënanga!”
26Ho mawomaha madorou gënanga iwigiwi duru yakua-kuata, ipaha o womaha madorou gënanga ihupu o nyawaka gënanga, de wopöaka. 27Mata-mata o nyawa duru yohëranga, hiädono önanga imakoketemo, ”Uwee, kaokia nënanga? O dodötoko mahungioli! De makumati deʼ makuaha Unanga wapareta o womaha madorou i hupu, deʼ onanga iwihi moteke!”
28Deʼ o abari mangale o Yesus dema japati yödogilianga o Galilea madaera mata-mataika.
O Yesus wahitogumu manga ngöe o nyawa
(Mat. 8:14-17; Luk. 4:38-41)
29O Yesus deʼ iwinöninïki yamal̄a o pupuji matau gënanga, deʼ yoiki o Simon deʼ o Andreas manga tauika. O Yakobus deʼ o Yohanis onangö yoiki ima kinïki dede ona. 30O Simon ngoi toroa imi gogama magogiriaka ami ngidu-ngiduoka. Hoʼ maöraha o Yesus deʼ iwinöninïki yowohama o tau gënanga, o Yesusika iwihi ngahu o hali gënanga. 31Ho o Yesus woiki o Simon ngoi toroaika, deʼ wasö amigiama, deʼ womihimoteke münanga momomiki. Ami gogama ihihanga, deʼ munangö momuläenge mä leleani önanga.
32O bobimaoa, o wange de itumunoka, o nyawa manga ngöe yä ao o Yesusika mata-mata o nyawa yopopanyake deʼ o womaha madorou yangohamika. 33Mata-mata o kotaka gënanga ima toomuino o tau gënanga mahimangoka. 34Deʼ o Yesus wahi togumu manga ngöe o nyawa yatago-tagongo de yädäe-däene rupa-rupa o panyake, deʼ waduhuö mangöe womaha madorou. Unanga wohi gumal̄aua o womaha madorou gënanga yotemo, hababu önanga ihi öriki Unanga o naguna.
O Yesus woriwayati o Galilea madaeraka
(Luk. 4:42-44)
35Yarehino, kama hohuhutuohi, o Yesus womomiki deʼ wamal̄a o tau gënanga. Unanga woiki o ngï o gigoro koiwa-iwaika o kota maporetoka, deʼ dokengoka womäniata. 36Mä o Simon deʼ aidodiawo yoiki iwilingiri Unanga. 37Deʼ onanga iwi mäkeoka, önanga iwi temo, ”Mata-mata o nyawa naga ini lingiri Bapa.”
38Mä o Yesus wohaluhu, ”Niaino ngone hohigila-gila nanga dodagi o kota-kota mahomoaika hakokiloliti o daera nënanga. Ngohi kokiani toriwayati genangokaö, hababu madungutu ganga hö Ngohi taino.”
39 #
Mat. 4:23, 9:35 Karana gënanga o Yesus woiki o Galilea wamöde-mödeke, deʼ woriwayati o pupuji matauoka de waduhu o womaha madodorou.
O Yesus wihitogumu womatëngo iwipado-pado
(Mat. 8:1-4; Luk. 5:12-16)
40Womatëngo iwipado-pado hoboborohono woböa o Yesusika. O nyawa gënanga watilabuku deʼ wotemo, ”Nako Bapa nömodeke, Bapa yakunu ngohi nohihi togumu.”
41O Yesus wïdora o nyawa gënanga. Hoʼ, Unanga wipal̄anga o nyawa gënanga de wotemo, ”Ngohi tomau, notogumu!” 42O öraha gënanga dika aipanyake ihihanga deʼ unanga wotogumu. 43Dahaö o Yesus wïhuloko ünanga woiki, wohidöaka o hohininga nënanga, 44#Im. 14:1-32 ”Kao nagonaikaö de yakunua nohiade-ade, mä noiki ma imamika, deʼ nogahoko unangika la wohigoungu ngona notogumoka. Dahaö mangale notogumoka gënanga, nohi döaka o huhuba, imoteke o Musa wohi popareta, hokä o nonako moi o nyawaika i gou-goungu ngona notogumoka.”
45Mä o nyawa gënanga woiki deʼ gila-gila wohiade-ade kiaka dika, okia idadadioka gënanga, hiädono o Yesus wakunua womahi totararonuku wowohama o kotaika. Unanga duga-duga wogögogere o kota maporetoka o ngï kiaka o gigoro koiwa. Mä o nyawa gila-gila dika yoböa Unangika okiaino hönanga.
Currently Selected:
O MARKUS 1: TLB
Highlight
Copy
Compare
Share
Want to have your highlights saved across all your devices? Sign up or sign in
