O IMAMAT 4
4
O huhuba mangale hagala o baradoha ihohangajaua
1-2Ma Jou wïhuloko o Musa wohingahu o nagona dika yo baradoha yohangajaua karana yatilakuru moi ani ma Jou Ai tita, kokiani yanïki o datoro nënanga.
3Maöraha nako ma imam wo Amo-amoko wo baradoha, hi adono o Israel manyawa ihimoteke yahowono, ünanga kokiani wohihuba ma Jouika o hapi manauru magö o dutu moi koiwa naga manabo, hupaya ai baradoha iapongo. 4O hapi gënanga kokiani yao ma Jou Ai Tau mangoranika. Ma imam wo Amo-amoko kokiani wogelenga ai giama o aiwani gënanga mahaëke mal̄okuku, daha yatoaka o Tau mahimangoka. 5Ma awunu o hidoku moi kokiani ihi ngohama o Tau magoronaika. 6De ünanga kokiani ai hagarara watono o awunuku gënanga deʼ wö dohurero wohigali matumidi o guba ihi tinga-tingaka o Ngï i Tebi-tebini mahimangoka. 7O hidoku moi o awunu gënanga kokiani wohinauhu o dupa ma bounu ihemo-hemoro mahuhuba mangï matatadukika malibuku-libukuoka o Tau magoronaka, deʼ maboloi kokiani wohituagi mabukuku o huhuba itö tuhu-tuhuku mahuhuba mangï o naga o Tau mangorana mahimangoka. 8Ma imam kokiani wal̄ë ingodumu o hapi manauru gënanga mahaki, enagënanga maraka yahawoino ma mamata madol̄a, 9madudu mahiri deʼ mahaki deʼ magate duru yaoa-oa. 10Mata-mata gënanga kokiani watuhuku o huhuba itö tuhu-tuhuku mahuhuba mangï mal̄okuoka hokä o dame mahuhubaka. 11Mä o hapi gënanga maakeme, makai, mahaëke, mal̄ou, ma mamata madol̄a maboloi inoli mawariki, 12hoʼ, sawaliua o hidoku yatinga-tingakoka, i ngodumu ko kiani yao ihihupu o tau madodoomu maporetika. Genangokadau o hapi gënanga kokiani yatuhuku o gota ihi dofo-dofo mal̄okuoka o kafo magugumo mangïoka, enagënanga o ngï yatinga-tingakoka mangale gënanga.
13Maöraha nako ingodumu o Israeloka yobaradoha, hababu ko yo hangajaua yatilakuru moi ani ma Jou Ai tita, 14deʼ ihi örikoka o baradoha gënanga deʼ iböto itaiti o kawaha kokiani o hapi manauru magö o dutu moi yao ma Jou Ai Tau mahimangoka. O aiwani gënanga kokiani ihihuba mangale o baradoha ma apongo mahuhuba. 15O hoana matutuda-tutuda kokiani yogelenga toönanga manga giama o aiwani gënanga mahaëke mal̄okuku, daha yatoaka genangokadau. 16Ma imam wo Amo-amoko kokiani wao o aiwani gënanga ma awunu o hidoku moi wohingohama o Tau magoronaika. 17Genangokadau ünanga kokiani ai hagarara watono o awunuku gënanga daha wodohurero wohigali matumidi o guba ihi tinga-tingakoka o Ngï i Tebi-tebini mahimangino. 18O hidoku moioli kokiani ihinauhu o dupa mahuhuba mangï matotatadukika malibuku-libukuoka o Tau mangoranoka, deʼ maboloi kokiani wohituagi mabuku uku o huhuba itö tuhu-tuhuku mahuhuba mangï naga o Tau mangorana mahimangoka. 19O aiwani gënanga mahaki ingodumu kokiani wal̄ë deʼ watuhuku o huhuba mangï mal̄okuoka. 20Madodagi hokä o hapi manaurika ihi huba-huba mangale o baradoha ma apongo mahuhuba. Hoko gënanga madodagi ma imam wo Amo-amoko wohihuba o huhuba mangale o kawaha manga baradoha, done o baradoha-baradoha gënanga aha ma Jou wa apongo. 21De ipaha o hapi manauru gënanga kokiani yao maporetika, deʼ yatuhuku o dodoomu matau maporetoka hokä o hapi manauru ihi huba-huba mangale ma imam wo Amo-amoko gënanga mahirete ai baradoha ma apongo mahuhuba.
22Maöraha nako womatengo wokokuaha wobaradoha karana wohangajaua watilakuru ma Jou Ai Tita moiani. 23Deʼ iböto itaiti wamao, manga kokiani wohihuba o kabingi manauru o dutu moi koiwa manabo, mangale ai baradoha ma apongo. 24Unanga kokiani wogelenga ai giama o aiwani gënanga ma haëke mal̄oku uku, deʼ yatoaka o huhuba mangï o koremieuku ihimangoka, o ngï o aiwani yatoa-toaka mangale o huhuba yatö tuhu-tuhuku. 25Ma imam kokiani ai hagarara watono o aiwani gënanga ma awunuku de wohinauhu o huhuba mangï matotatadukika malibuku-libukuoka deʼ mahou wohituagi o huhuba mangï mabuku uku. 26De ipaha o aiwani gënanga mahaki ingodumu kokiani ya tuhuku o huhuba mangï mal̄okuoka, hokä o dame mahuhuba. Hoko gënanga madodagi ma imam wohihuba o huhuba mangale womatengo wokokuaha ai baradoha, done o nyawa gënanga aha ma Jou wï apongo. 27#Bil. 15:27-28 Maöraha nako womatengo o kawaha biaha o baradoha wo diai karana wohangajaua watilakuru ma Jou Ai Tita moiani, 28de wamao ipahaino itaiti, ünanga kokiani wohihuba o kabingi mabeka o dutu moi koiwa naga manabo. 29Unanga kokiani wogelenga ai giama o aiwani gënanga ma haëke mal̄okuuku, daha yatoaka o huhuba mangïoka o koremie uku ihima-himanga, mangï o aiwani yatoa-toaka mangale o huhuba yatö tuhu-tuhuku. 30Ma imam kokiani ai hagarara watono o aiwani gënanga ma awunuku, daha wohinauhu o huhuba mangï matotatadukika ma libuku-libukuoka deʼmahou wohituagi o huhuba mangï mabuku uku. 31O aiwani gënanga mahaki ingodumu kokiani wal̄ë hokä o dame mahuhuba. O haki gënanga ma imam kokiani watuhuku o huhuba mangï mal̄okuoka, hupaya mabounu yasanangi ma Jou Ai hininga. Hoko gënanga madodagi ma imam wohihuba o huhuba mangale womatengo o kawaha biaha ai baradoha, done o nyawa gënanga aha ma Jou wihi apongo.
32Maöraha nako ima tengoani wohihuba o duba o dutu moi mangale ai baradoha ma apongo, o duba gënanga kokiani mabeka deʼ koiwa naga manabo. 33Unanga kokiani wogelenga ai giama o aiwani gënanga ma haëke mal̄uku uku daha yatoaka o huhuba mangïoka o koremieuku ihima-himanga, mangï o aiwani yatoaka mangale o huhuba yatö tuhu-tuhuku. 34Ma imam kokiani ai hagarara watono o aiwani gënanga ma awunuku, daha wohinauhu matotatadukika o huhuba mangï ma libuku-libukuoka, deʼ mahou wohituagi o huhuba mangï ma buku uku. 35De ipaha o aiwani gënanga mahaki ingodumu wal̄ë hokä o dame mahuhubaka. O haki gënanga kokiani watuhuku o huhuba mangï mal̄okuoka, kamamoi deʼ o huhuba o inomo ihihö huba-huba ma Jouika. Hoko gënanga madodagi ma imam wohihuba o huhuba mangale o nyawa gënanga ai baradoha, done ünanga aha ma Jou wï apongo.
Currently Selected:
O IMAMAT 4: TLB
Highlight
Share
Compare
Copy
Want to have your highlights saved across all your devices? Sign up or sign in
