O IMAMAT 3
3
O dame mahuhuba
1Maöraha nako ima tengoani ihihuba o hapi o dutu moi mangale o dame mahuhuba, o hapi gënanga yakunu manauru, yakunu mabeka, mä yakunua naga deʼ manabo. 2O nyawa wohihö huba-huba kokiani wö gelenga aigiama o aiwani gënanga mahaëkuku daha yatoaka ma Jou Ai Tau mangorana mahimangoka. O imam-imam o Harun aidifauku kokiani o hapi ma awunu gënanga ihituagi o huhuba mangï magumuruku iatika. 3Mangale o dame mahuhuba ma Jouika, ma imam kokiani wohihuba o aiwani gënanga ma hidoku-hidoku nënanga: maraka yahawo-hawoino mamamata madol̄a, 4madudu mahiri de mahaki deʼ magate duru yaoa-oa. 5Genanga mata-mata kamamoi de o huhuba itö tuhu-tuhuku mahomoa kokiani yatuhuku o huhuba mangï mal̄okuoka. O huhuba o inomo gënanga mabounu yasanangi ma Jou Ai hininga.
6Nako ihihö huba-huba gënanga o duba o dutu moi ekola o kabingi, o aiwani gënanga yakunu manauru, yakunu mabeka, mä yakunua naga manabo. 7Maöraha nako imatengoani ihihuba o duba o dutu moi, ünanga kokiani wao ma Jou Aitauika. 8Genangokadau kokiani ünanga wogelenga ai giama o duba gënanga mahaëke mal̄okuku daha yatoaka o Tau ma himangoka. Daha ma imam kokiani o duba gënanga ma awunu wohi tuagi o huhuba mangï magumuruku iatika. 9Mangale o dame mahuhuba ma Jouika, ma imam kokiani wohi huba o duba gënanga ma hidoku-hidoku nënanga: mahaki, ingodumu mabikini dema haki-hakioka deʼyatobiki imahi tigi-tigika maporete makobongika, maraka yahawo-hawoino ma mamata madol̄a, 10madudu mahiri de mahaki deʼ magate duru yaoa-oa. 11Ma imam womomanarama kokiani watuhuku mata-mata gënanga o huhuba magï mal̄okuoka mangale o huhuba o inomo ma Jouika.
12Nako ihö huba-huba o kabingi o dutu moi, o nyawa wohihö huba-huba kokiani wao ma Jou Ai tauika. 13Genangokadau kokiani ünanga wogelenga ai giama o kabingi gënanga ma haëke mal̄okuku daha yatoaka O Tau mahimangoka. Ma imam kokiani o aiwani ma awunu gënanga wohi tuagi o huhuba mangï magumuruku iatika. 14Mangale o huhuba o inomo ma Jouika, ma imam kokiani wohi huba o aiwani gënanga ma hidoku-hidoku nënanga: maraka yahawo-hawoino ma mamata madol̄a, 15madudu mahiri de mahaki deʼ magate duru yaoa-oa. 16Ma imam womomanarama kokiani mata-mata gënanga watuhuku o huhuba mal̄okuoka. O huhuba o inomo gënanga mabounu yasanangi ma Jou Ai hininga. O aiwani gënanga mahaki mata-mata mangale ma Jou. 17O Israel manyawa hakali-kali yakunua yaol̄omo mahaki ekola ma awunu. O datoro gënanga idiai gila-gila kahi ado-adonika deʼ kokiani o Israel manyawa moi-moi ihingounu kiaka dika önanga yogogere.
Currently Selected:
O IMAMAT 3: TLB
Highlight
Share
Compare
Copy
Want to have your highlights saved across all your devices? Sign up or sign in
