O IMAMAT 5
5
Maöraha okia iparalu ihihuba o baradoha ma apongo mahuhuba?
1O baradoha ma apongo mahuhuba iparalu ihihuba: Maöraha nako womatengo deʼ madodagi madiai yogahoko wohakihi o juru hakimoka, mä woluku wohidöaka wohitararono mangale okia wamö make-makeoka ekola woihene hiädono ünanga kokiani wa tagongo toenanga mahasili.
2Maöraha nako womatengo wahowono karana wohangajaua idadi wopeseke, hababu wapekeoka okianaga moi ipese-peseke, o demo ma ade o aiwani mahonenge, deʼ ipahaika wamäo ai manarama.
3Maöraha nako womatengo wahowono karana wohangajaua wapeke o baranga ipese-peseke ma ahali o nyawaino, deʼ ipahaika wamao ai manarama.
4Maöraha nako womatengo wahowono karana wosabaranga wo koboto mangale okia dika wodiai, deʼ ipahaika wamäo ai manarama.
5O hali magetongo gënanga magoronaka, o nyawa yahowo-howono kokiani ima ngaku manga howono. 6De mangale o baradoha maduduhuhu, ünanga kokiani woao o duba ekola o kabingi o dutu moi mabeka mangale ma Jou. Ma imam kokiani wohihuba o huhuba gënanga hupaya o nyawa gënanga ai baradoha iapongo.
7Mä nako o nyawa wahowo-howono womä gakunua wasadia o duba ekola o kabingi mangale ai baradoha maduduhuhu, ünanga ko kiani woao o pombo furu o habi moi ekola o namodara magö, o gahumu moi mangale o baradoha ma apongo mahuhuba, deʼ o gahumu moioli mangale o huhuba itö tuhu-tuhuku. 8O totaleo-o totaleo gënanga kokiani yao ma imamika. Ma imam kokiani ihira wohihuba o totaleo ihitö tantu mangale o baradoha ma apongo mahuhuba. O totaleo gënanga kokiani ma tomara wahirikiti, mä yakunua hiädono itoaka mahaëke. 9O totaleo gënanga ma awunu kokiani wodohurero o huhuba mangï magumuruku, deʼ maboloi yapoloso ihihupu o hu huba mangï mabuku uku mangale o baradoha ma apongo mahuhuba. 10Genanga deʼiböto ma imam wohihuba o totaleo hinotö mangale o huhuba yatö tuhu-tuhuku. Hoko gënanga madodagi ma imam wohihuba o huhuba mangale o nyawa gënanga ai baradoha, done ünanga aha ma Jou wï apongo.
11Nako o nyawa wahö howo-howono womagakunua wasadia o pombo furu o habi moi ekola o namodara mangale o baradoha ma apongo mahuhuba, ünanga kokiani woao o gopuno o kilo moi. O gopuno gënanga yakunua ihikaganu o zaitun maminya ekola deʼ manyanyi oka, hababu o huhuba gënanga ganga o baradoha ma apongo mahuhuba, deʼ koigoungua o huhuba yadodiaiuku. 12O gopuno gënanga kokiani yao ma imamika. Ma imam kokiani wal̄ë o bokoto moi o gopunoino gënanga hokä o nonako ingodumu ihihubaka ma Jouika. O gopuno o bokoto moi gënanga kokiani waharongo o huhuba mangï mal̄okuoka hokä o huhuba o inomo. Genanga mahuhuba mangale o baradoha ma apongo. 13Hoko gënanga madodagi ma imam wohihuba o huhuba mangale o nyawa gënanga ai baradoha, deʼ ünanga aha wï apongo ma Jou. O gopuno maboloi ganga ma imam ai hidoku, hokä o huhuba o gandum.
O rugi madagali mahuhuba
14Ma Jou wohidöaka o Musaika o datoro-o datoro nënanga. 15Nako womatengo kowohangajaua o baradoha wodiai karana woalipä wohidöaka ihihö huba-huba ihi patu-patutoka mangale ma Jou, done o nyawa gënanga woao o rugi madagali mahuhuba. O huhuba gënanga kokiani o duba ekola o kabingi manauru koiwa ma nabo, deʼ maija yobetongo imoteke maija ma Jou Ai Tauoka. 16O nyawa gënanga kokiani wofangu okianaga mahira wo alipä, wodogo deʼ o ratuhu moi yaregu monaoko. De ipaha ünanga kokiani wohidöaka o aiwani gënanga ma imamika, deʼma imam wohi-huba mangale o nyawa gënanga ai baradoha, done ünanga aha wï apongo ma Jou.
17Nako womatengo wohangajaua o baradoha wodiai karana wa tilakuru moiani ma Jou Ai tita, o nyawa gënanga wahowono deʼ kokiani watagongo mahasili. 18Mangale o rugi madagali mahuhuba ünanga kokiani woao o duba ekola o kabingi manauru o dutu moi koiwa naga manabo deʼ maija yobetongo imoteke maija ma Jou Ai Tauoka. Ma imam wohihuba o huhuba mangale o nyawa gënanga ai baradoha, done ünanga aha ma Jou wï apongo. 19Genanga o rugi madagali mahuhuba mangale o howono yadodiai ma Jouika.
Currently Selected:
O IMAMAT 5: TLB
Highlight
Share
Compare
Copy
Want to have your highlights saved across all your devices? Sign up or sign in
