O IMAMAT 2
2
O huhuba yadodiai ukuoka
1Maöraha nako ima tengoani ihihuba yadodiai ukuoka ma Jouika, o huhuba gënanga kokiani marupa o tarigu duru ma oa-oa ihitotuagika o zaitun maminya deʼ yamanyanyika mal̄okuino. 2Unanga kokiani wao o imam-imamika o Harun aidifauku. Ma imam womomanarama kokiani wal̄ë o tarigu gënanga o bokoto moi deʼ o zaitun maminya deʼ o manyanyi mata-mata, daha watuhuku o huhuba mangï mal̄okuoka hokä manonako ingodumu ihihubaka ma Jouika. O huhuba o inomo gënanga mabounu ya sanangi ma Jou Ai hininga. 3O huhuba yadodiaiuku maboloi ganga mangale o imam-imam. O huhuba gënanga duru itebini karana o inomo ihi huba-hubaka ma Jouika deʼ yal̄ë.
4Nako ihihö huba-huba gënanga o roti ihö haro-harongo o haharongo magoronaka, o roti gënanga kokiani yadiai maragi koiwa. O roti gënanga yakunu mabiri-birini, yodiai deʼ o tarigu ma aluhu yaojo-ojouku deʼ o zaitun maminya, yakunoli o kukisi duga-duga ihi nau-nauhika deʼ o zaitun maminya.
5Nako ihihö huba-huba gënanga o roti matore manonofoka, o roti gënanga kokiani yadiai deʼ o tarigu ma aluhu deʼ o zaitun maminya, ma yapakeua o ragi. 6O roti ihihö huba-huba gënanga kokiani yabela-belaka, daha ihi tuagika o zaitun maminya.
7Nako ihihö huba-huba gënanga o roti yahohakai o bohokuku, o roti gënanga yadiai deʼo tarigu ma aluhu deʼ o zaitun maminya. 8O roti yadodiai madodagi hoko gënanga kokiani ihihuba ma Jouika deʼ ihidöaka ma imamika wa ao-ao o huhuba mangï ika. 9Ma imam wal̄ë o roti gënanga o hidoku moi de watuhuku o huhuba mangï mal̄okuoka hokä manonako ingodumu ihihubaka ma Jouika. Ma bounu yasanangi ma Jou Ai hininga. 10Maboloi ganga mangale o imam-imam. O roti gënanga duru itebini karana o inomo ihihö huba-hubaka ma Jouika deʼ yal̄ë.
11O huhuba yadodiai ukuoka mangale ma Jou yakunua ihi ganu deʼo madu ekola o ragi, karana o madu deʼ o ragi yakunua yatuhuku mangale ihihö huba ma Jouika. 12O tonaka mahasilino madodihiraka o taongo ihi getongo, o hidoku moi kokiani ihihuba ma Jouika, mä yakunua yatuhuku o huhuba mangï mal̄okuoka. 13O huhuba yadodiai ukuoka yogetongo kiani yagahiuku, karana o gahi ihi nonako ma Jou Madutu Ai jaji dede ngini. Hoʼ mata-mata ihihö huba-huba kokiani yagahiuku. 14Maöraha nako ngini nihihuba ma Jouika o gandum nia utuku madodihiraka, niao o gandum mahungi nia tutuku nia alu-aluhuku oka ekola il̄ofo. 15O gandum gënanga kokiani ihituagika o zaitun maminya deʼ yamanyanyika mal̄okuino. 16Ma imam kokiani watuhuku mapine o hidoku moi deʼ o minya gënanga inoli manyanyi mata-mata, hokä manonako ingodumu ihihubaka ma Jouika.
Currently Selected:
O IMAMAT 2: TLB
Highlight
Share
Compare
Copy
Want to have your highlights saved across all your devices? Sign up or sign in
