O IMAMAT 20
20
O nyawa ihi ngou-ngounua manga hukumanga
1-2Ma Jou wï huloko o Musa wohi nyata o hali nënanga o Israel manyawaika, ”Moi-moi o nyawa tingini nia hidogoronaka ekola o nyawa maporetino yogogogere nia hidogoronaka ihi huba-huba manga ngohaka o Molokhika, kokiani yongodumu o kawaha yakaweli de o helewo hiädono yohonenge. 3O nyawa ihi huba-huba manga ngohaka o Molokhika, ya peseke Ahi Tau deʼ ihikauku Ahi romanga itebi-tebini. Onanga aha Tä hukumu deʼ Ta etongokaua hokä Ahi umati. 4Nako o kawaha yatamunu manga lako o nyawa manga manaramika gënanga deʼ yähukumua önanga yahohonenge, 5done Ngohi mahirete tä hukumu önanga, ingodumu manga ngohaka deʼ manga hekata, ikali o nyawa mata-mata imakokomoteke dede önanga ihi mal̄aika Ngohi deʼ yahuba o Molokh. Onanga Tä etongokaua Ahi umati.
6O nyawa yoi-oiki yogahoko o nasihati yogogumaterika yodadi o dodohanga de o nyawa yohone-honenge manga gurumini aha Tä hukumu deʼ Tä etongokaua hokä Ahi umati. 7Nio goana hupaya ngini kahirahi nitebini, karana Ngohi ma Jou nia Jou Madutu. 8Nihi ngounu hagala Ahi tita, karana Ngohi ma Jou tinï tingakoka ngini mangale Ngohi.”
9 #
Kel. 21:17; Mat. 15:4; Mark. 7:10 Ma Jou wohidöaka o datoro-o datoro nënanga, ”O nyawa yalolai manga ama ekola manga ayo kokiani yä hukumu yahohonenge.
10 #
Kel. 20:14; Im. 18:20; Ul. 5:18 Nako o Israel manyawa womatengo wohowono de o nyawa ima hoana moi ngoi hekata, ünanga deʼ o ngoheka gënanga kokiani yähukumu yahohonenge. 11#Im. 18:8; Ul. 22:30, 27:20 O nauru womatengo idadi o röehe moi de ai ama ngoi hekata momatengo ani, waora ai ama ai haku. O nauru deʼ o ngoheka gënanga kokiani yähukumu yahohonenge. Onanga yohonenge karana manga howono mahirete.
12 #
Im. 18:15
Nako o nauru womatengo idadi o roëhe moi de ngoi hunungu, o nyawa yahinoto gënanga kokiani yähukumu yahohonenge. Onanga yohowonoka, deʼ yohonenge karana manga howono mahirete. 13#Im. 18:22 Nako o nauru womatengo idadi o röehe moi de o nauru ma homoa, önanga yodiai o manarama i pese-peseke deʼ ipatu-patutua, deʼ yahinoto kokiani yähukumu yahohonenge. Onanga yohonenge karana manga howono mahirete. 14#Im. 18:17; Ul. 27:23 Nako o nauru womatengo wokawingi deʼ o ngoheka moma tengo ikali de o ngoheka gënanga ngomi ayo, yaruangeö kokiani yätuhuku hiädono yohonenge, karana önanga yodiai o manarama ipatu-patutua. O manarama marupa hoko gënanga yakunua naga tingini nia hidogoronaka. 15#Kel. 22:19; Im. 18:23; Ul. 27:21 Nako o nauru womatengo idadi o röehe moi de o aiwani, o nyawa deʼ o aiwani gënanga kokiani yatoma. 16Nako o ngoheka momatengo idadi o röehe moi deʼ o aiwani, o ngoheka deʼ o aiwani gënanga kokiani yätoma. Onanga yo honenge karana toönanga manga howono mahirete.
17 #
Im. 18:9; Ul. 27:22 Nako o nauru womatengo idadi o röehe moi de ngoi hiranga ekola ngoi hiranga o ama moi mä o ayo moiua ekola o ayo moi ma o ama moiua, önanga yakunokaua ya etongo hokä Ahi umati. Onanga yodiaioka o manarama ipatu-patutua deʼ kokiani yatagongo mabahaika. 18#Im. 18:19 Nako o nauru womatengo idadi o röehe moi deʼ o ngoheka momatengo magogiria o mede imidaene, önanga yakunokaua yaetongo hokä Ahi umati.
19 #
Im. 18:12-14
Nako o nauru womatengo idadi o röehe moi deʼ ngoi owa, o dodilakuru gënanga mabahaika kokiani yahinoto yatagongo. 20Nako o nauru womatengo idadi o röehe moi deʼ ai pepe ngoi hekata, ünanga wihikauku ai pepe. O nauru deʼ o ngoheka gënanga kokiani yatagongo mahukumanga. Hiädono yohonenge önanga yamakeua o ngohaka. 21#Im. 18:16 Nako o nauru womatengo womä gora ai dodoto ngoi hekata, Unanga wihikauku ai dodoto deʼ wadiai o manarama ipatu-patutua patutua. Hiädono yohonenge yamakeua o ngohaka.”
22Ma Jou wätemo, ”Nihingounu Ahi tita deʼ Ahi pareta mata-mata, hupaya ngini tinï duhuua o Kanaan mabereraka, kiaika Ngohi tinï ao ngini. 23Uha nimä duru o nyawa yogogogere dokengoka manga adati de manga biaha. Ngohi tä emono önanga de hagala manga manarama ito torou. Ma hababu gënanga önanga yä duhu, hupaya ngini yakunu nio ngohama o berera gënanga. 24O tonaka ikaya-kaya deʼ iboburere gënanga Tinihi jajioka nginika, hoʼ Tinihi döaka nginika idadi tingini madutu.
Ngohi ma Jou nia Jou Madutu tinï tinga-tingakoka ngini deʼ o hoana deʼ o berera mahomoa manyawa. 25Mangale karana gënanga ngini kokiani nihilihowono de madiai o aiwani ihoharamu deʼ ihoharamuua. Uha nia ol̄omo o aiwani ihoharamu. O aiwani gënanga Tohi nyata iharamu, hoʼ nako ngini nia ol̄omo ngini nidadi nipeseke. 26Ngini Tinï tingakoka deʼ hoana deʼ o berera mahomoa ma nyawa hupaya nidadi Tongohi madutu. Ngini kokiani nitebini karana Ngohi ma Jou, deʼ Ngohi totebini.
27Moi-moi o nauru ekola o ngoheka yodiai o dodohanga de o nyawa yohone-honenge manga gurumini kokiani yakaweli de o helewo hiädono yohonenge. O nyawa gënanga yohonenge karana manga howono mahirete.”
Currently Selected:
O IMAMAT 20: TLB
Highlight
Share
Compare
Copy
Want to have your highlights saved across all your devices? Sign up or sign in
