O IMAMAT 21
21
O imam-imam manga debini
1Ma Jou wï huloko o Musa wohiädono o pareta nënanga o imam-imamika o Harun aidifauku, ”O imam womatengo yakunua wapeseke ai diri karana wö himanga wanïki ai riadodoto yä lungunu maupacara, 2sowaliua nako yohone-honenge gënanga ngoi ayo, ai ama, ai ngohaka, ai riaka de ai dodoto o nauru 3ekola ai biranga yokawi-kawingowahi, deʼ yogogere o tau moi dede ünanga. 4Yakunua wapeseke ai diri de wanïki ngoi hekata ami riadodoto yalungunu maupacara.
5 #
Im. 19:27-28; Ul. 14:1 O imam womatengo yakunua watoongoro ai haëke mahononga deʼ yakunua waguti ai parahi ekola watopo-topoko ai röehe de o baranga madoto-doto mangale wohidumutu ünanga magogiria ai hininga ihuha. 6Unanga madutu Tongohi tïtingakoka yakunua wapeseke Ahi romanga. Unanga wohihuba o huhuba o inomo Ngohino, hoʼünanga kokiani wotebini. 7O imam womatengo yakunua wokawingi de o ngoheka momatengo tengo mahira ami röehe mahuku-hukunu ekola momatengo o ngoheka o moholehe maboroua ekola mohelekonoka, karana o imam ganga Tongohi madutu. 8O Israel manyawa kokiani ihi goungu o imam hokä o nyawa yatatinga-tingakoka mangale Ngohi karana ünanga wohihuba o huhuba o inomo Ngohino. Ngohi ma Jou; Ngohi nënanga totebini deʼ Ngohi tatebini Ahi umati. 9Nako ma imam womatengo ngoi ora modadi o ngoheka ami roëhe mahuku-hukunu munanga mihikauku ami ama deʼ kokiani imi hukumu hiädono mohonenge.
10Ma Imam wo Amo-amoko iwi tabisoka de madodagi iwihituagi o upacara maminya ai haëkuku deʼ iwihinoa unangika o imam wo Amo-amoko ai pakeanga. Karana gënanga ünanga yakonua wa mal̄aika ai tadauru ihuta-hutaino ekola wakakihi ai pakeanga hokä manonako ünanga ai hininga ihuha. 11-12Unanga iwihihubaka Ngohino mangale wodadi Togohi madutu, hoʼ yakunua wapeseke ai diri. Unanga yakunuali wapeseke Ahi Tau genangino deʼ wohupu mangale wowohama o tau naga deʼ mamaiyeti, ngaroko gënanga ai ama ai mayeti ekola ngoi ayo mahirete ayo mahirete. 13-14Unanga duga-duga yakunu wokawingi deʼ momatengo o moholehe maboro ai hoanino mahirete. Unanga yakunua wo kawingi deʼ momatengo o babao, ekola o ngoheka momatengo mohelekonoka ekola o ngoheka mo matengo mahira ami röehe mahuku-hukunu. 15Nako ünanga watilakuru o datoro gënanga, aingoha-ngohaka kokiani yotebini done aha yopeseke. Ngohi ma Jou deʼ Ngohi tï tingakoka ünanga wodadi o Imam wo Amo-amoko.”
16Ma Jou wï hipareta o Musa 17mangale yahetongo nënanga o Harunika, ”Womatengo ani difauku ai röehe deʼ maboditoka yakunua wohihuba-o huhuba o inomo Ngohino. Genanga imoteke kahi ado-adonika. 18O nyawa ihi huba-huba o huhuba yakunua manga röehe de ma boditoka, enagënanga yopiloko ekola yolugu, o nyawa manga biono de ma boditoka ekola ai röehika, 19manga giama ihonenge ekola manga l̄ou isuga, 20yohugu-hugu ekola yopö poluluku, manga lako yohiri-hiri ekola yä pado-pado deʼ yä kokabirioka. 21Moi-moi ma Imam Harun aidifauku manga röehe deʼ ma boditoka yakunua ihihuba o inomo Ngohino. 22Mä önanga yakunu yaol̄omo o inomo ihihuba-huba, kayaoa o huhuba o inomo itebi-tebini kayaoa o inomo duru itö tebi-tebini. 23Karana o nyawa gënanga ai röehe deʼ maboditoka, ünanga yakunua wohitigi o guba ihitö tinga-tingakoka o Ngï i Tebi-tebini ekola o huhuba mangï. Unanga yakunua wapëseke o bara-baranga yatö tinga-tingakoka mangale Ngohi, karana Ngohi ma Jou deʼ Ngohi tatö tinga-tingakoka o bara-baranga gënanga.”
24Genanga doka o datoro-o datoro o Musa wohiädono o Harunika ikali ai ngoha-ngohaka, deʼ o Israel manyawaika yongodumu.
Currently Selected:
O IMAMAT 21: TLB
Highlight
Share
Compare
Copy
Want to have your highlights saved across all your devices? Sign up or sign in
