O IMAMAT 1
1
O huhuba itö tuhu-tuhuku
1Ai Tau-tauino deʼ ma Jou wï ahoko o Musa deʼ wohidöaka hagala o datoro unangika 2kokiani o Israel manyawa ihingounu.
Nako maöraha ima tengoani ihihuba o aiwani ekola o huhuba itö tuhu-tuhuku ma Jouika, ünanga yakunu wohihuba o hapi, o duba ekola o kabingi. 3Nako ihihuba o hapi o dutu moi, o aiwani gënanga kokiani manauru deʼ yakunua naga deʼ manabo. O hapi kokiani wao ma Jou Ai Tau ma ngoranika, hupaya ma Jou Ai hininga ya daëne o nyawaika gënanga. 4De o nyawa gënanga kokiani wogelengauku ai giama o aiwani gënanga ma haëke ma l̄okuoka, done wohihö huba-huba ma Jou aha watarima mangale ai baradoha ma apongo. 5De ipaha o hapi gënanga kokiani yatoaka o Tau ma ngorana mahimangoka. Ma awunu kokiani o imam-imam o Harun aidifauku ihi huba ma Jouika, deʼ ihi tuagi mahuhuba mangï magumuruku iatika o Tau mangorana mahimangoka. 6De ipaha o nyawa gënanga kokiani makai wahelenga deʼ wa lui-luiti o aiwani gënanga. 7O imam-imam kokiani o huhuba mangï mal̄okuoka o uku ya wangoil̄e daha mal̄okuoka yodatoro o gota ihi dofo-dofo. 8O huhuba ilö lui-luituku, inoli mahaëke deʼ mahaki, ko kiani önanga yakelenga o uku mal̄okuoka. 9Daha o nyawa gënanga kokiani waihoro mamamata madol̄a inoli o hapi gënanga mauguru, deʼ ma imam womomanarama kokiani ingodumu watuhuku. O huhuba itö tuhu-tuhuku gënanga mabounu yasanangi ma Jou Ai hininga.
10Nako ihihö huba-huba o duba o dutu moi ekola o kabingi, o aiwani gënanga kokiani manauru deʼ koiwa manabo. 11O nyawa gënanga kokiani watoaka o aiwani o huhuba mangïoka o koremieuku ihima-himanga, daha o imam-imam kokiani ihituagi ma awunu o huhuba mangï magumuruku iatika. 12O aiwani gënanga yalui-luiti, deʼ iböto mata-mata ya lö lui-luituku, inoli mahaëke deʼ mahaki, kokiani ma imam wa kelengauku o huhuba mangï mal̄okuoka. 13Daha o nyawa gënanga kokiani waihoro mamamata madol̄a deʼ mauguru o aiwani gënanga. De ipaha ma imam kokiani i ngodumu wohihuba ma Jouika, deʼ watuhuku o huhuba mangï mal̄okuoka. O huhuba itö tuhu-tuhuku gënanga mabounu yasanangi ma Jou Ai hininga. 14Nako ihihö huba-huba gënanga o totaleo o gahumu moi kokiani o pombo furu ekola o namodara ma gö. 15Ma imam kokiani wao o totaleo gënanga o huhuba mangïika, daha wahirikiti matomara deʼ watuhuku mahaëke o huhuba mangï mal̄okuoka. O totaleo gënanga ma awunu kokiani yakururu ihi hupu o huhuba mangï magumurukoka. 16Ma bilaono mangï de ingodumu madol̄a kokiani ihihupu, daha yaumo o wange mahiwaroko o huhuba mangï o kafo mangï ika. 17De ipaha o totaleo gënanga kokiani yakakihi magahuhu magoaino, mä magahuhu yakunua hiädono itoaka. Daha o totaleo gënanga kokiani yatuhuku o huhuba mangï mal̄okuoka. O huhuba itö tuhu-tuhuku gënanga mabounu yasanangi ma Jou Ai hininga.
Currently Selected:
O IMAMAT 1: TLB
Highlight
Share
Compare
Copy
Want to have your highlights saved across all your devices? Sign up or sign in
