O KELUARAN 40
40
Ma Jou Ai Tau-tau ihi goko deʼ ihi tingaka mangale ma Jou
1Ma Jou wïtemo o Musaika, 2”Nihigoko Ahi Tau o wange mamoi o mede mamoioka. 3Nihingohama magoronaika o Jaji ma Peti madol̄a o Tita Ngimoi deʼ nihipake o dadamunu o ngöere mahimangino. 4Niakelenga o meja de mapakakaha. Nihingohamö o hilo mal̄ou deʼ mahilo niatuhuku. 5Niakelenga o huhuba mangï o gurasi o dupa yoduhu-duhuku o Jaji ma Peti mahimangoka deʼ nio nuneuku o guba o Tau mangoranoka. 6Niakelenga o huhuba mangï mangale o huhuba yatuhu-tuhuku o Tau mangorana mahimangoka. 7Nia kelenga o akere ma bak o Tau deʼ o huhuba mangï gënanga mahidogorona, daha yoguiti o akere. 8De ipaha niö dohohe mahidete o Tau malöa magilolitino, deʼ nia nuneuku o löa mangorana ma amoko madadatoko o ngöere.
9De ipaha o Tau-tau deʼ hagala mapakakaha kokiani nohihihuba Ngohino de madodagi hoko gënanga, hupaya ingodumu yatingaka mangale Ngohi. 10Nohihuba o huhuba mangï deʼ hagala mapakakaha de madodagi hoko gënanga, hupaya ingodumu yatingaka mangale Ngohi. 11Nidiai hoko genangoli de o akere ma bak deʼ mabuku.
12Genanga de iböto, nähuloko o Harun deʼ ai ngoha-ngohaka yoböa o Tau mangoranino de imaohiki. 13Nihipake o imam mapakeanga o Harunika, deʼ nïminya ünanga hupaya ünanga iwitingaka mangale wohileleani Ngohi hokä ma imam. 14Daha nähuloko aingoha-ngohaka imahitigi, deʼ nähipake o kameja onangika. 15Daha näminya önanga hokä ngona nïminya toönanga manga ama, hupaya önanga mayakunu ihïleleani Ngohi hokä ma imam. De o minya upacara gënanga, toönanga manga hoana i uti manga ngohaka de manga danongo yasö o imam mamanarama.”
16O Musa wadiai hagala moi-moi hokä ma Jou wohi popareta. 17O wange mamoi o mede mamoioka o taongo mahinotoka magoronaka o Israel manyawa de ipaha yamal̄aka o Mesir maberera, ma Jou Ai Tau-tau gënanga ihidiai. 18O Musa wögelenga mahohol̄e wohigoko majaro, wohitabi mahita magota-gota, deʼ waoko maliate. 19Daha wohihohe ma Tau makatu de madadamunu maporetino i l̄oku-l̄oku hokä wohipopareta ma Jou. 20De ipaha o helewo hinoto gënanga yonoa o Jaji ma Peti goronauku. Daha o Musa wohitabi o Peti madadamunu gënanga deʼ wohi ngohama madodowiti magota magogolioko. 21Daha ünanga wakelenga o Peti gënanga o Tau-tau magoronaka deʼ mahimangoka wönuneuku o dadamunu o ngöere, hokä ma Jou wohipopareta unangika.
22De ipaha o Musa wakelenga o meja o Tau magoronaka, ma ngöere maporetoka o koremieuku idaduoka. 23Daha o meja mal̄okuoka ikelengauku o roti ihidodiaiukuoka, hokä Ma Jou wohi poparetaka o Musaika. 24O hilo mal̄ou wakelenga o Tau-tau magoronaka, o koreharail̄e idaduoka, ihirihimangino de o meja gënanga. 25Daha, o hilo-hilo gënanga yawango ma Jou Ai himangoka. 26O huhuba mangï o gurasi wakelenga o Tau-tau magoronaka mangöere mahimangoka, 27daha watuhuku o dupa mabounu mahemo-hemoro hokä ma Jou wohipoparetaka o Musaika. 28O Musa wönune madadatoko o ngöere o Tau mangoranika, 29deʼ o ngorana gënanga mahimangoka wakelengauku o huhuba mangï mangale o huhuba yatuhu-tuhuku. O huhuba ihidodiaiuku. 30O bak tabaga wakelenga o Tau deʼ o huhuba mangïmahi dogorona, daha yoguiti o akere. 31O Musa, o Harun deʼ ai ngoha-ngohaka yaihoro manga giama deʼ toönanga manga l̄ou genangokadau, 32önanga ihigeto-getongo yowohama ma Jou Ai Tau magoronaika ekola imahitigi o huhuba mangïika. 33O Tau-tau deʼ o huhuba mangï gënanga magilolitino o Musa wohilaketuku o hidete, daha ünanga wönuneuku madadatoko o ngöere o löa mangorana ma amokoka. De ibötoka o manarama gënanga mata-mata.
Ma Jou Ai Tau-tau o lobi yatamunuku
(Bil. 9:15-23)
34 #
1Kok. 8:10-11; Yes. 6:4; Yeh. 43:4-5; Him. 15:8 De ipaha o lobi iuti yatamunuku ma Jou Ai Tau, deʼ o Tau-tau gënanga iomanga de o cahaya ma Jou Ai himanga. 35Karana gënanga o Musa wakunua wowohama o Tau-tau gënanga magoronaika. 36Ihi geto-getongo o lobi gënanga idoa ma Jou Ai Tauoka de yail̄e, o Israel manyawa yakilianga toönanga manga tau-tau madoomu mangale imatururu o ngï mahomoaika. 37Mä nako o lobi gënanga idoaua, önanga imagorakua genangokadau. 38Hokokia madekana o Israel manyawa yodagi yakaika yakaino, ma Jou naga o Tau-tauoka gënanga, o wange-wange womahi rupa o lobi deʼ o hutu-hutu womahi rupa o uku.
Currently Selected:
O KELUARAN 40: TLB
Highlight
Share
Compare
Copy
Want to have your highlights saved across all your devices? Sign up or sign in
