O KELUARAN 39
39
Ma imam ai pakeanga yodiai
(Kel. 28:1-14)
1O Bezaleel deʼ o Aholiab yodiai o pupuji mapakeanga de o wol mabihi-bihi, mawuwungu deʼ madoka-dokara mangale o imam-imam maöraha önanga yomanarama o Ngï i Tebi-tebinoka. O imam mapakeanga mangale o Harun yadiai hokä ma Jou wohipöparetaka o Musaika.
2O kutang yadiai de o ngöere o lenan ma aluhu, o wol mabihi-bihi, mawuwungu deʼ madoka-dokara deʼ o lawe gurasi. 3Onanga yatutuku o gurasi mabobal̄äna de ipaha yatobi-tobiki idadi o lawe mangina-ngina, daha ihiduguriti de o ngoöre o lenan ma aluhu deʼ o wol mabihi-bihi, mawuwungu deʼ madoka-dokara. 4Genanga de iböto yodiai mabeleka magumini makutanga maninikutu ihiduguriti magumurukika. 5O gorona maninikutu ihirugi-rugihino ma aluhu ihidiai kahokogenangoli mabaranga yapake-pake deʼ ihiduguriti makutangika gënanga hiädono idadi kamoi hokä ma Jou wohipopareta o Musaika. 6Onanga ihigihoro o helewo delima daha ihipake mariwoto o gurasi magoronaka. De manga sawaro magahumu önanga yagarade o Yakub aingohaka yangimoi de yahinoto manga roma-romanga o helewoika gënanga. 7De ipaha o helewo-helewo gënanga ihipake makutanga mabeleka maguminika hokä o hohininga manonako mangale o Israeloka manga hoana ngimoi de hinoto, hokä ma Jou wohipopareta o Musaika.
O alu madadamunu yodiai
(Kel. 28:15-30)
8O Bezaleel deʼ o Aholiab yodiai o alu madadamunu ihidiai mabaranga yapake-pake imaketero de o kutanga, deʼ masuji-suji ma imaketero. 9Madüku ipahagi itupukoro hinoto, mangoata deʼ magurutu moi-moi o senti monaoko de hinoto. 10Ma alu madadamunika gënanga önanga ihibooteke o datoro iata o helewo permata. O datoro madodihiraka o helewo delima, o topas deʼ o baiduri sepah. 11O datoro mahinotoka o zamrud, o helewo nilam deʼ o intan. 12O datoro mahangeoka o helewo luzuardi, o akik, deʼ o helewo kecubung. 13O datoro maiatoka o helewo pirus, o yakut, deʼ o ratna cempaka. O permata ngimoi de hinoto gënanga yaliko de o gurasi. 14Mapermataika yogetongo yogarade imatengoani manga romanga o Yakub aingohaka yangimoi de yahinoto hokä o hohininga manonako o Israeloka manga hoana. 15Daha yadiai hinoto o rante o gurasi madutu ihirugi-rugihino hokä o gumini. 16Yodiaiö o gogoli gurasi hinoto ihipake o alu madadamunu gënanga mabarene hinoto il̄oku-l̄okuika. 17Daha o rante gurasi hinoto gënanga ihingohama magogoli-gogolioko gënanga, 18deʼ mabarene hinoto mahomoa ihi liko mariwoto hinotoika, hiädono o alu madadamunu gënanga yakunu ihidohanga de o kutanga mabeleka magumini mahimangino. 19Daha yodiai o gogoli gurasi hinotoli ihipake o alu dadamunika gënanga, mabarene itimi-timi magoronaka yakokorona makutanga. 20Genanga de iböto yodiai o gogoli gurasi hinoto ihipake o kutanga mabeleka magumini hinoto mahimangino, imahi tigi-tigika de maguguriti madohanga hatoli daukino, o gorona maninikutu ihi rugi-rugihino ma aluhu mal̄okuil̄e. 21Imoteke de ma Jou Aipareta o Musaika, o alu madadamunu magogoli ihidohanga de o gumini mabihi-bihi o kutanga magogolika, hiädono o alu madadamunu gënanga hirahi naga o gorona maninikutu mal̄okuil̄e deʼ ihoheua.
Yodiai o pakeanga mahomoa mangale o imam-imam
(Kel. 28:31-43)
22O juba yapake-pake o kutanga mal̄okuino, ingodumu i diai de o wol mabihi-bihi. 23Matomara mapidaha yakuata de o pita ihirugi-rugihi hupaya igapangua ikakihi. 24-26Madateke itimi-timi magilolitino yodiai maporomu o delima mahohoko de o ngöere o lenan ma aluhu deʼ o wol mabihi-bihi, mawuwungu deʼ madoka-dokara, ihikokotoaka de o guguru gurasi, imoteke de ma Jou Aipareta o Musaika. 27Onanga yodiai o kameja mangale o Harun de ai ngoha-ngohaka, 28o haëke madadamunohi, o haluara mabobolulu o ngöere lenan, 29deʼ o gorona maninikutu o ngöere lenan ma aluhu o wol mabihi-bihi, mawuwungu deʼ madoka-dokara, yaporomu de o suji-suji, hokä ma Jou wohipopareta o Musaika. 30Yodiaioli o poromu o gurasi madutu, manonako önanga yatingakoka mangale ma Jou. O poromuika gënanga yogarade mabetongo ”Yatingaka mangale ma Jou”. 31O poromu gënanga ihipake o haëke madadamunika mahimangino, imoteke de ma Jou Aipareta o Musaika.
O manarama gënanga ibötoka
(Kel. 35:10-19)
32Mabaha o manarama yodiai ma Jou Ai Tau-tau mata-mata i bötoka. O Israel manyawa yadiaioka hagala moi-moi hokä ma Jou wohi popareta o Musaika. 33Onanga yoao o Musaika o Tau de hagala mapakakaha, malalakete, mahita magota, o liate de mahohol̄e, 34o dadamunu o kabingi manauru makai yadodokarika, o dadamunu o aiwani makai ma aluhu, o ngöere o dadamunu. 35O Jaji ma Peti madol̄a o helewo hinotö de madodowiti magota de madadamunu, 36o meja de mata-mata mapakakaha deʼ o roti yadodiaiukuoka. 37O hilo mal̄ou o gurasi madutu, mahilo de hagala mapakakaha, mangale o hilo maminya, 38o huhuba mangï o gurasi, o upacara maminya, o dupa mabounu mahemo-hemoro. O Tau-tau mangorana maguba, 39o huhuba mangï o tabaga de ma asaki o kawa tabaga madodowiti magota deʼ hagala mapakakaha; o bak ima iho-ihoro mangï de mabuku, 40malöa mahidete deʼ maliate-liate inoli mahohol̄e, malöa mangorana ma amoko mangöere madadatoko, inoli magumi-gumini, o Tau-tau mabebeloho; mata-mata o pakakaha yapake-pake o Tau-tau magoronaka, 41deʼ o pupuji mapakeanga mangale o imam-imam maöraha önanga yomanarama o Ngï iTebi-tebinoka deʼ o pakeanga yatinga-tingakika mangale o Harun deʼ ai ngoha-ngohaka. 42O Israel manyawa yadiaioka o manarama gënanga mata-mata hokä ma Jou wohipopareta o Musaika. 43O Musa watailako hagala moi-moi deʼ wamake önanga yadiaioka yakokoronaika hokä ma Jou wohipopareta. Daha o Musa wahi barakati önanga.
Currently Selected:
O KELUARAN 39: TLB
Highlight
Share
Compare
Copy
Want to have your highlights saved across all your devices? Sign up or sign in
