O KELUARAN 38
38
Wodiai o huhuba mangï mangale o huhuba yatuhu-tuhuku
(Kel. 27:1-8)
1O Bezaleel wal̄ë o gota akasia, daha wodiai o huhuba mangï mangale o huhuba ituhu-tuhuku. O huhuba mangï gënanga madüku ipahagi, magurutu deʼ mangoata moi-moi o metere hinoto de o senti monaoko, deʼ magurutil̄e o metere moi de o senti moruange. 2Malibuku yogetongo mal̄okuoka wodiai o tataduku idadi kamoi de mahuhuba mangï gënanga. Yamode-modekika wohilape de o tabaga. 3Wodiaiö o bohoko, o huhugara, o mangko, o garpu deʼ o uku mangï. Mata-mata o pakakaha gënanga idiai de o tabaga. 4Wodiai o asaki o kawa tabaga ihipali daengino mahuba mangïika-magurutil̄e yatogoronail̄e. 5Daha wodiai o gogoli iata mangale mamomoku magota malibuku iata matimino. 6Mamomoku magota gënanga wodiai de o gota akasia ihilape de o tabaga. 7Daha mamomoku magota hinotö gënanga wohingohama gogolioko magumurukoko hinotö o huhuba mangï gënanga. O huhuba mangï gënanga yadiai de o aoto deʼ magoronauku i pidahoka.
Wodiai o bak tabaga
(Kel. 30:18)
8 #
Kel. 30:18
O Bezaleel wodiai o tabaga de mabukuil̄e o tabaga. Otabaga gënanga o ngongoheka yolöleleani ma Jou Ai Tau mangoranoka manga kahinä.
Ma Jou Ai Tau-tau malöa
(Kel. 27:9-19)
9O Bezaleel wöpagari ma Jou Ai Tau-tau malöa de o hidete o ngöere o lenan ma aluhu. O koreharail̄e idadadu magurutu o metere moruata de iata, 10ihitumungu o liate tabaga monaoko, moi-moi mahohol̄e o tabaga, de o lalakete deʼ madudumungu o häaka. 11O koremieuku idadadu yadiai hoko genangoli. 12O wange madumuniha idadadu ihipake o hidete magurutu o metere monaoko de hinoto, de o liate ngimoi deʼ mahohol̄e ngimoi; malalakete deʼ madodohanga yadiai de o haaka. 13O wange mahiwaroko idadadu, naga de mangoranoka mahidete mangoata o metere monaoko de hinotoli. 14-15Mahigilika de manirakika o ngorana gënanga ihipake o hidete, moi-moi magurutu o metere butanga de o senti moributanga de oliate hange deʼ mahohol̄e hange. 16O hidete mata-mata o löa gënanga magilolitino idiai de o ngöere o lenan ma aluhu. 17Ma liate-liate mahohol̄e yadiai de o tabaga, mä malalakete, madohanga deʼ maliate mabarene yadiai de o haaka. O liate mata-mata malooa gënanga magilolitino ihikodohanga moi de moi de o lalakete o häaka. 18O löa mangorana ma amoko gënanga madadatoko idiai de o lenan ma aluhu ihirugihi de o wol mabihi-bihi, mawuwungu deʼ madoka-dokara ikali ihiporomu de o suji-suji. Magurutu o metere hiwo deʼ magurutil̄e o metere hinoto, imatero de o löaka mahidete. 19O ngorana mangöere gënanga ihitumungu o liate iata de o hohol̄e o tabaga iata. Mata-mata malalakete, mabarene madadamunu deʼ madudumungu yadiai de o haaka, 20mä mata-mata mabebeloho mangale o Tau-tau deʼ mangale mapagari yadiai de o tabaga.
O gurasi, o haaka, o tabaga ihi pake-pake ma Jou Ai Tau-tau magoronaka
21Nenanga yatuli-tulihuku o gurasi, o haaka, o tabaga ihipake-pake ma Jou Ai Tau-tau magoronaka, o helewo hinotö de ma Jou Madutu Ai Tita Ngimoi gënanga mangï yagogono. Yatuli-tulihuku gënanga yadiai imoteke o Musa aipareta deʼ yatatoro gënanga o Lewi manyawa yomomanarama o Itamar, ma Imam Harun aingohaka ai tutuda matimiuku.
22O Bezaleel o Uri aingohaka, o Hur ai danongo o Yehuda ai hoanino, wadiai hagala wihipopareta ma Jou. 23Wï riwo-riwo, o Aholiab o Ahisamakh aingohaka o Dan ai hoanino, ganga womatengo wogogarade, wödato-datoro deʼ worörugi-rugihi o ngöere o lenan ma aluhu, inoli o wol mabihi-bihi mawuwungu deʼ madoka-dokara.
24O gurasi ihihöhuba-huba ma Jouika mangale o Tau-tau i Tebi-tebini ingodumu magegetongo o kilo ribuhu moi, yatibanga i moteke o duduga ma Jou Ai Tau-tauoka yapake-pake. 25#Kel. 30:11-16 O haaka yamömake-makeino o Israel manyawaka yosensus magegetongo okilo o ribuhu hange de o ratuhu iata de moruange yatibanga imoteke o duduga ma Jou Ai Tau-tauoka yapake-pake. 26#Mat. 17:24 O gegetongo gënanga imatero de okia yoföfangu-fangu o nyawa mata-mata yahituli-tulihi o sensus gënanga magoronaka. O nyawa moi-nyawa moi yofangu maija ihitötantantu, yatibanga imoteke o duduga yapake-pake. O sensus magoronaka gënanga ihi tulihi o nau-nauru manga umuru o taongo monaoko de i hikail̄e yaribuhu ratuhu butanga de hange de yaratuhu motoa de yamoritoa. 27O haaka gënanga wapake o kilo o ribuhu hange de o ratuhu iata mangale wodiai ma Jou Ai Tau-tau maliate mahohol̄e o ratuhu moi deʼ mangorana madadatoko mangöere. Ma hohol̄e moi madubuho o kilo moruange de iata. 28O haaka mahou gënanga, o kilo moruange, o Bezaleel wo diai o dodohanga deʼ o lalakete mangale maloliate, inoli liate-liate gënanga mabarene madadamunu. 29O tabaga ihihohuba-huba ma Jouika magegetongo mata-mata o kilo o ribuhu hinoto de o ratuhu iata de monaoko de motoa. 30O tabaga gënanga wapake mangale wadiai ma Jou Ai Tau mangorana mahohol̄e, o huhuba mangï de ma asaki o kawa tabaga, ingodumu mahuhuba mangï mapakakaha, 31malöa yakilolitino mahidete mahohol̄e de mangorana ma amoko, ma Tau mabebeloho mata-mata deʼ malöa magilolitino.
Currently Selected:
O KELUARAN 38: TLB
Highlight
Share
Compare
Copy
Want to have your highlights saved across all your devices? Sign up or sign in
