O KELUARAN 36
36
1O Bezaleel, o Aholiab, deʼ mata-mata yogö gao-gao yamö make-make o dagakunu deʼ o sawaro ma Jouino, yanako madodagi yadiai hagala ipoparalu mangale yadiai ma Jou Ai Tau. Onanga kokiani yadiai hagala moi-moi hokä ma Jou wohipoparetaka.”
O Israel manyawa ihi döaka o bobatumu mangöe
2O Musa wäahoko o Bezaleel, o Aholiab deʼ o nyawa mata-mata yamömake-make o sawaro ma Jouino deʼ yomodeke yobatumu, wähuloko önanga yomulaenge. 3O Musa wahidöaka önanga hagala ihiböbatu-batumu o Israel manyawa mangale o manarama ihigöko ma Jou Ai Tau. Mä o Israel manyawa kahoko genangika dika yoao manga huhuba o Musaika o ngorumino ihigetongo. 4Yogö gao-gao magogiriaka yadiai o manarama gënanga 5ihingahu o Musaika, ”O bara-baranga ihiböbatu-batumu o nyawa geonanga iholoioka de ipöparalu mangale o manarama ma Jou wähulo-hulokoka.”
6O Musa wohingahu o tau-tauika ingodumu o bobatumu mangale ma Jou Ai Tau yadonoka; hoʼ hagala o nyawa okiakaua yoao. 7O bara-baranga önanga ihiböbatu-batumoka iholoiokali mangale o manarama gënanga iböto.
Yodiai ma Jou Ai tau
(Kel. 26:1-37)
8De ipaha duru yososawaro yogögao-gao manga hidogoronaka gënanga yodiai ma Jou Ai Tau. O Tau gënanga önanga yodiai deʼ o lenan ma aluhu odobiki ngimoi yauriti de o wol mabihi-bihi, mawuwungu deʼ madoka-dokara, daha ihisuji de o malaikat madulada. 9O dobiki moi-dobiki moi maduduga imakoketero; magurutu metere ngimoi de hinoto deʼ mangoata o metere hinoto. 10O ngöere o dobiki motoa ihikodohanga idadi o hidete moi deʼ o dobiki motoa mahomoa hoko genangoli yadiai. 11O hidete hinoto gënanga madatekino yodiai madudumungu de o ngöere mabihi-bihi, 12o lalakete moritoa o hidete yogetongo, hiädono marupa o habi moi. 13Daha yodiai malalakete o gurasi moritoa mangale ihirimoi o hidete hinoto gënanga. 14De iböto önanga yodiai o Tau-tau gënanga makatu de o ngöere o kabingi magogo o dobiki ngimoi de moi. 15O dobiki moi-dobiki moi maduduga imakoketero, magurutu o metere ngimoi de hange deʼ mangoata o metere hinoto. 16O dobiki motoa ihikodohanga idadi o hidete moi, deʼ o dobiki butanga mahomoa, hoko genangoli yadiai. 17Madudumungu moritoa ihipake o hidete madodihiraka madatekino deʼ madudumungu moritoa o hidete mahinotoka madatekino. 18Daha yodiai malalakete moritoa o tabaga mangale ihirimoi o hidete hinotö gënanga idadi o Tau-tau makatu. 19Genanga de ipaha yodiai o dadamunu hinoto mangale ma Tau-tau ihiregu, moi de o duba manauru makai yadodokarika, deʼ mahomoa de o aiwani makai ma aluhu.
20De ipaha önanga yodiai o Tau-tau majaro i riko-rikotil̄e de o gota akasia. 21O jaro yogetongo magurutil̄e o metere iata de mangoata o senti mori butanga de butanga. 22Ma jaro yogetongo yodiai o bebeloho hinoto o habi moi, hiädono o jaro-o jaro gënanga yakunu ihikodohanga moi de mahomoaika. 23Mangale o Tau-tau o koreharail̄e yohima-himanga yodiai majaro monaoko. 24De mahohol̄e o haaka moruata, hinoto majaro yogetongo matimioka mangale mabebeloho hinotö. 25Mangale o Tau-tau o koremieuku yohima-himanga yodiai majaro monaoko 26de mahohol̄e o haaka moruata, hinoto majaro yogetongo matimioka. 27Mangale o Tau-tau maporete o wange madumuniha ihima-himanga, yodiai majaro butanga, 28deʼ majaro hinoto mangale malibuku. 29Majaro malibuku gënanga ihikodohanga mal̄ouika i gila-gila hiädono mal̄okuino. Majaro hinotö imadiai malibuku yadiai hoko genangoli. 30Hoʼ mata-mata naga majaro tufange de mahohol̄e o haaka ngimoi de butanga, hinoto majaro yogetongo matimioka.
31Daha önanga yodiai mahita ngimoi de motoa de o gota akasia, motoa mangale majaro ma Tau-tau magumuruku moi. 32Motoa mangale magumuruku mahomoa, deʼ motoali mangale o Tau-tau maporete o wange madumuniha yohima-himanga. 33Mahita magota ikokorona, ihitabi magurutil̄e majaro yatogoronaino, o Tau-tau gënanga mabahaka de mabahaika. 34Ma Tau-tau majaro deʼ mahita magota gënanga ihilape de o gurasi, daha yödiaika o gogoli-gogoli gurasi mangale yatumungu o gota-gota gënanga.
35Onangö yodiai madadatoko o ngöere o lenan ma aluhu ihirugihi de o wol mabihi-bihi, mawuwungu deʼ madoka-dokara, daha yasuji de o malaekat madulada. 36Mangale yanune o ngöere gënanga yodiai o liate iata de o gota akasia malape o gurasi de malalakete o gurasi de ihipake mahohol̄e o haaka iata mal̄okuoka. 37Daha yodiai o guba mangale o Tau-tau mangorana de o lenan ma aluhu ihirugihi de o wol mabihi-bihi mawuwungu deʼ madoka-dokara deʼ ihiporomu de o suji-suji. 38Mangale mangorana gënanga mangöere yodiai o liate motoa ihikodohanga de o lalakete-lalakete. Ma bare-barene deʼ madohanga-madohanga o liate motoa gënanga ihilape de o gurasi hode mahohol̄e motoa o yadiai de o tabaga.
Currently Selected:
O KELUARAN 36: TLB
Highlight
Share
Compare
Copy
Want to have your highlights saved across all your devices? Sign up or sign in
