O KELUARAN 35
35
O datoro mangale o Sabat mawange
1O Musa wä toomu yongodumu o Israel manyawa daha wätemo onangika, ”Nënanga ma Jou Ai tita mangale ngini: 2#Kel. 20:8-11, 23:12, 31:14-15, 34:21; Im. 23:3; Ul. 5:12-14 Naga o wange butanga mangale nimanarama, mä o wange matumidi gënanga o wange mangale nimahi batongo, o wange ma amoko i tingakoka ma Jouika. O nagona yomanarama o Sabat mawangeoka kokiani yahukumu yohonenge. 3O wange gënanga ngini yakunua o uku nitofo nia tauoka.”
O huhuba mangale ma Jou Ai Tau
(Kel. 25:1-9)
4O Musa wätemo ingodumu o Israel ma nyawaika, ”Hoko nënanga ma Jou Aipareta: 5Niao o huhuba ma Jouika. Onagona yögaraki manga hininga, kokiani ihi huba o gurasi, o haaka, deʼ o tabaga; 6o ngöere o lenan ma aluhu, o ngöere o wol mabihi-bihi, ma wuwungu deʼ madoka-dokara; o ngöere o kabingi magogo; 7o duba manauru makai yadodokarika; o aiwani makai ma aluhu, o gota o akasia, 8o hilo maminya; o upacara maminya marampa-rampa deʼ mangale o dupa mabounu mahemo-hemoro; 9o paramata delima deʼ o paramata mahomoa mangale ihi poromu ma Imam wo Amo-amoko ai kutangika deʼ ai alu madadamunika.”
Ma Jou Ai Tau-tau mapakakaha
(Kel. 39:32-43)
10”Mata-mata yogö gao-gao yososawaro nia hidogoronaka kokiani yaino mangale yadiai hagala ma Jou wohi popareta, enagënanga: 11O Tau-tau, makatu deʼ madadamunu, malalakete deʼ ma röehe, mahita magota, mangorana maliate deʼ mahohol̄e; 12O Jaji ma Peti madodowiti magota, madadamunu, deʼ mangöere madadamunu; 13mameja de madodowiti magota, mata-mata mapakakaha deʼ o roti yadodiai ukuoka 14o hilo mal̄ou mangale yatotararono de mapakakaha, o hilo de maminya; 15o huhuba mangï o dupa yö duhu-duhuku de madodowiti magota o upacara maminya, o dupa mabounu ihemo-hemoro; o tau mangorana madadatoko, 16o huhuba yö duhu-duhuku mahuhuba mangï de o tarali o tabaga, madodowiti magota de mata-mata mapakakaha; ima iho-ihoro mamabak de mabukuil̄e, 17o löa mahidete, o liate de mahohol̄e, o löa mangorana madadatoko, 18o bebeloho de magumi-gumini mangale o Tau-tau deʼ mangale malöa; 19o imam-imam manga puji mapakeanga maöraha önanga yomanarama o Ngi i Tebi-tebinoka deʼ o pakeanga yatinga-tingakoka mangale ma imam Harun deʼ aingoha-ngohaka.”
O Israel manyawa yao toönanga manga huhuba
20De mata-mata o Israel manyawa ima totoomuino gënanga ima kilianga, 21deʼ o nagona dika manga hininga i garaki, yao o huhuba ma Jouika mangale ihi totomo ma Jou Ai Tau. Onangö yoao mata-mata ipö paralu mangale o pupuji deʼ o baranga ihi dodiai ma imam ai pakeanga. 22O nagona dika yomau, kayaoa o nauru kayaoa o ngoheka, yoboa yoao o paneti imahi poporomu, o ngati-ngati, o ali-ali, o gule, deʼ hagala irupa o poromu o gurasi mangale ihihuba ma Jouika. 23O nyawa moi-nyawa moi de manga ngöere o lenan ma aluhu, o ngöere wol mabihi-bihi, mawuwungu ekola madoka-dokara, o ngöere o kabingi magogo, o duba manauru makai yadodokarika, ekola o aiwani makai ma aluhu, ihihuba o baranga gënanga. 24O nyawa moi-nyawa moi yakunu yobatumu de o haaka ekola o tabaga, yoao mangale ma Jou. Hoko genangoli yodiai hagala o nyawa de manga gota o akasia mangale o manarama gënanga. 25O ngongoheka yososawaro yorugihi yoao o lenan ma aluhu malawe, mawuwungu deʼ madoka-dokara önanga yadodiaioka. 26Onangö ihirugihi o kabingi magogo malawe. 27O tutuda-tutuda yoao permata delima deʼ o permata-permata mahomoa mangale ihiporomu o kutangika deʼ o alu madadamunu. 28Onangö yoao o rampa-rampa deʼ o hilo maminya, o upacara maminya deʼ o dupa mabounu ihemo-hemoro. 29O Israel manyawa mata-mata de manga hininga mahuka yao toönanga manga huhuba ma Jouika mangale o manarama ma Jou wihi poparetaka o Musaika.
Yogö gao-gao yahimanarama yodiai ma Jou Ai Tau-tau
(Kel. 31:1-11)
30De ipaha o Musa wätemo o Israel manyawaika, ”Ma Jou wïirikoka o Bezaleel o Uri aingohaka, o Hur ai danongo, o Yehuda ai hoanino 31deʼ ünanga wihidöaka de Ai kuaha. Ma Jou Madutu wihidöaka o mangarati, o sawaro deʼ o dagakunu hagala irupa o manarama ma aluhu magoronaka, 32mangale wodiai wohidailako o datoro ipöparalu o sawaro, inoli wadodiai de o gurasi, o haaka de o tabaga; 33mangale ihigihoro o paramata mahelewo aha ihipoporomu; mangale o gota wogarade deʼ mangale hagala irupa o manarama ma aluhu mahomoa. 34O Bezaleel deʼ o Aholiabika, o Ahisamakh aingohaka o Dan ai hoanino, ma Jou wahidöaka o sawaro mangale yadotoko toönanga manga sawaro o nyawa mahomoaika. 35Onanga yahidöaka o sawaro hagala irupa o manarama yadodiai yososawaro yohonotoko, yodato-datoro deʼ yososawaro youriti o lenan ma aluhu o wol mabihi-bihi, mawuwungu deʼ madoka-dokara, deʼ o ngöere mahomoahi. Onanga ganga yodato-datoro yososawaro deʼ yakunu yadiai hagala irupa o manarama.
Currently Selected:
O KELUARAN 35: TLB
Highlight
Share
Compare
Copy
Want to have your highlights saved across all your devices? Sign up or sign in
