O KELUARAN 33
33
Ma Jou wähuloko o Israel manyawa yamal̄a o Sinai mal̄oku
1 #
Kej. 12:7, 26:3, 28:13 De ma Jou wïtemo o Musaika, ”Na mal̄a o ngï nënanga deʼnoiki kamamoi de o nyawa nä ao-aoka o Mesir de yaino gënanga yoiki o bereraika Tahi jäjajioka o Abraham, o Ishak deʼ o Yakubika de toönanga manga ngohaka de manga danongo. 2Ngohi aha tähuloko imatengo o malaekat la winï tuda ngini. Ngohi aha Täduhu o Kanaan manyawa, o Amori, o Het, o Feris, o Hewi deʼ o Yebus manyawa. 3Ngini niö dumutu o tonaka ikaya-kaya deʼ iboburereika. Mä Ngohi mahirete tininïkua dede ngini, hupaya uha Tinï binaha ngini o ngekomo mahoanika, hababu ngini ganga o nyawa manga haëke itotogowini.”
4-6De ipaha ma Jou wïhuloko o Musa wahetongo o Israel manyawaika, ”Ngini o nyawa niahaëke itotogowini. Nako Ngohi tininïki dede ngini ngarokä hokokiaua dika, marai ngini Tinï binaha kamamoiuku. Nia huputu hagala niapake-pake done Ngohi aha tohitantu okia aha Todiai nginika.” Yoihene deʼ iböto ma Jou Ai dodaaere gënanga, önanga duru manga hininga i huha hokä o nyawa yapakeoka o huha mapakeanga. Daha önanga yahuputu toönanga manga pake-pake. Ho o Sinai mal̄oku yamal̄a de iböto, o Israel manyawa yapakeokaua o pake-pake.
Ma Jou Ai Tau
7Ihi geto-getongo, nako o Israel manyawa imä tau, o Musa wal̄ë o Tau deʼ wohigoko ikurutika de toönanga manga tau. O tau gënanga yahetongo ma Jou Ai Tau deʼ o nagona yomau yogahoko ma Jou Ai nasihati, yoiki genangikadau. 8Nako o Musa woiki o Tauika gënanga, o Israel manyawa imaokoino toönanga manga tau mangorana mahimangoka deʼ iwilega-lega o Musa hiädono ünanga wowohama. 9O Musa wowohama de iböto, o liate o lobi iuti deʼ ima togumu ma Jou Ai Tau mangoranoka. O lobino gënanga ma Jou de o Musa ima temo-temo. 10Maöraha o Israel manyawa yamake o liate o lobi ma Jou ai Tau mangoranoka, önanga mata-mata imaoko deʼ ima rukuku yohuba manga tau mangoranoka moi-moi. 11Ma Jou de o Musa ima temo-temo imarihimangino, hokä o nyawa ima koketemo de manga dodiawo. Genanga de iböto o Musa womakilioro manga tau madoomuika. Mä o Yosua o Nun aingohaka, o goduru womatengo o Musa ai roriwo, kahirahi wogogere o Tau gënanga magoronaka.
Ma Jou wojaji aha wä goana Ainyawa
12O wange moiuku o Musa wïtemo ma Jouika, ”Jou, Ngona nohihipareta ngohi tätuda o nyawa neonanga o berera Nahi jäjajika. Mä Ngona nahetongua o nagona aha Nähuloko la ihïriwo ngohi. Jou Ngona nato Ngona nohinako ngohi, deʼ nosanangi ngohino. 13Nako hoko gënanga, nömodeke nohihingahu okia Ani datoro Nadiai, Jou, hupaya ngohi takunu Tonï leleani deʼ kahirahi tasanangi Ani hininga. Nomä hiningaö o nyawa neonanga Nairikoka yodadi Tongona madutu.”
14Ma Jou wotemo, ”Ngini aha Tinigoana hupaya yakunu nial̄ë o tonaka Tihijä jajioka.”
15O Musa wohaluhu, ”Nako Jou nonïkua dede ngomi, uha nomi huloko ngomi miamal̄a o ngï nënanga. 16Sarakia aha o nyawa ihi öriki Ani hininga isanangi ngohiino deʼ o nyawa neonangika nako Ngona nomï riwoua ngomi? Jou Ngona naga tongomi mia hidogoronaka aha ngomi mimakohowono deʼ o hoana de o berera mahomoa o duniaka.”
17Ma Jou wïtemo o Musaika, ”Ani gogahoko aha Tohimoteke, hababu Ngohi toninako ngona deʼ Ngohi ahi hininga isanangi ngonaika.”
18Daha o Musa wogahoko, ”Jou nohihimatoko ngohino Ani himanga ma cahaya.”
19 #
Rm. 9:15
Ma Jou wohaluhu, ”Ngohi aha takaino ani himangino de hagala Ahi mulia, de inoli Tahetongo Ahi romanga i tebi-tebini. Ngohi ma Jou, deʼ Ngohi tohidumutu o hininga mamura deʼ o hayanga de o dora hagala o nyawa Tä iri-irikoka. 20Ahi biono aha tohimatokua ngonaika, hababu koidadiua o nyawa ihi make Ngohi, deʼ kahirahi yowango. 21Ahi honongaika nënanga naga o doporono helewo; ngona yakunu nomaokoino genangokadau. 22Maöraha Ahi himanga macahaya yakaino, ngona Tonihi ngohama moi o helewo mabilatu magoronaika deʼ Tohitamunu deʼ Ahi giama hiädono Ngohi tatilakuroka. 23De aha Tatauru Ahi giama hupaya ngona yakunu nohimake Ngohi Ahi poretino, mä Ahi biono aha konamakeua.”
Currently Selected:
O KELUARAN 33: TLB
Highlight
Share
Compare
Copy
Want to have your highlights saved across all your devices? Sign up or sign in
