O KELUARAN 32
32
O hapi o gurasi
(Ul. 9:6-29)
1 #
Kis. 7:40
Maöraha o Israel manyawa yamake duru kaidekana woutiua ol̄okuku, mä makadokengokahi dika, önanga iwihidoomuino o o Harun de yotemo unangika, ”Ngone hohi örikua okia idadi deʼ Musa, o nyawa wonä ao-aoka ngone o Mesir mabereraka de hohupu: hoʼ nodiai mangale ngomi o gikiri aha womï tuda ngomi.”
2De aha o Harun wätemo onangika, ”Niahuputu o ngati-ngati o gurasi yapö pake-pake niaheka-hekata deʼ niangoha-ngohaka, deʼ niaoino ngohino.” 3Done önanga yahuputu moi-moi manga ngati-ngati o gurasi deʼ yao o Harunika. 4#Kis. 7:41 O Harun wal̄ë o ngati-ngati gënanga, daha wauihi deʼ wauhe o pahitakauku deʼ wadiai o gahumu moi o hapi madulada.
O nyawa geönanga yotemo, ”Hee Israel, nënanga nanga gikiri inä ngota-ngotaka ngone o Mesir mabereraka de hohupu!”
5Daha o Harun wohigoko o gahumu moi o huhuba mangï o hapi o gurasi gënanga mahimangoka de wohingahu, ”Yarehe naga o rameanga mangale hïhoromati ma Jou. 6#1Kor. 10:7 Yarehino duru o ngoru-ngorumino, o Israel manyawa yoao o aiwani o gigini o dutu muruononagali mangale o huhuba i tuhu-tuhuku, deʼ o dutu muruononagali mangale o dame mahuhuba. Onanga yogogeruku yol̄omo deʼ yokere, daha imaoko mangale imahi sosanangi.
7Ma Jou wïtemo o Musaika, ”Nouti itaiti hababu ani nyawa nätuda-tuda önanga o Mesir mabereraka de yohupu yodiaioka o dorou. 8Onanga yörehenoka de hagala Ahi tita. Onanga yodiai o hapi madulada o gurasi yaui-uihuku, daha yahuba daha ihihuba o huhuba enangika. Önanga yato, genangala toönanga manga gikiri yäao-ao önanga o Mesir mabereraka de yohupu. 9Ngohi tohiöriki o nyawa geönanga duru itogowini manga haëke. 10Uha nohitaili nohitätoko Ngohi. Ngohi tängamo onangika deʼ to mau Tä binaha önanga. Mä ngona deʼ ani ngohaka deʼ ani danongo manga ngohaka aha Tahidadi moi o hoana deʼ o berera ma ago-agomo.”
11 #
Bil. 14:13-19
O Musa wogahoko ma Jouika, Ai Jou Madutuika, wato, ”Jou, yadodoa hoʼ Ngona kokiani nodiai hoko gënanga onangika? Koigoungua o Mesir mabereraka deʼ Ngona nahihalamatoka de o kuaha de o kuata ma amo-amoko? 12Nako Ngona näbinaha önanga, o Mesir manyawa aha yotemo Ngona nätuda o nyawa geonanga o Mesir mabereraka de yohupu mangale nätoma önanga ol̄oku-l̄okuoka deʼ näbinaha önanga mata-mata kamamoi. Uha hoko gënanga, ya Jou, nangali Ani niati deʼ uha nabodito o nyawa geönanga. 13#Kej. 22:16-17, 17:8 Nomahininga Ani gogilaongika o Abraham, o Ishak de o Yakub. Nomahininga Ngona nojaji demakoboto mangale nahidöaka önanga o ngohaka deʼ o danongo manga ngöe hokä o murumu o dihangoka inoli ingodumu otonaka Ngona nahijajioka gënanga aha idadi madutu toönanga manga ngohaka de manga danongo kahi ado-adonika.” 14Done ma Jou wangali Ai dungutu deʼ wohidadiua Ai gangamo mangale wähitapal̄u o nyawa geönanga de o bodito.
15O Musa ol̄okuoka gënanga deʼ womakilioro wouti wao mahelewo hinotö de madulihoka mahimanga de maporete hagala ma Jou Madutu Ai tita. 16Ma Jou Madutu mahirete wadiaioka o helewo gënanga deʼ wogaradeika hagala Ai tita genangikadau.
17Magogiriaka yotagi youti, o Yosua woihene o Israel manyawa yopoa-poaka, daha ünanga wïtemo o Musaika, ”Naga o parangi magigoro o tau madodoomuoka.”
18O Musa wato, ”Hoihene koigoungua hokä o utumu maulili ekola o hihanga maboaka; gënanga o nyawa manga ilingi yonyanyi.”
19Maöraha o Musa wotigioka o tau madodoomuika gënanga, wamake o hapi o gurasi gënanga deʼ o nyawa magogiriaka yoselo-selo, done ünanga wongamo. Genangokadauö, ol̄oku gënanga matimioka, o Musa wohipaka mahelewo wa ao-ao gënanga hiädono iwedere ibela-belakuku. 20De ipaha wal̄ë o hapi madulada o Israel manyawa yadodiai gënanga, wauihi, watutuku hiädono i aluhu hokä o kafo, daha wohiganu de o akere. De ipaha wahuloko o Israel manyawa yaokere. 21Unanga wïtemo o Harunika, ”Okia önanga yodiai ngonaika hiädono nämal̄aika önanga ma amoko yobaradoha?”
22O Harun wohaluhu, ”Uha nohingamo ngohino; ngona mahirete nohi öriki sarakia manga barani o nyawa neonanga mangale yodiai o dorou. 23Onanga yotemo ngohino, ’Ngone hohi örikua okianaga i dadadi de o Musa o nyawa wonä ao-aoka ngone o Mesir mabereraka de hohupu; hoʼ nodiai o gikiri mangale ngomi kaiyakunu mituda-ngomi.’ 24Ngohi tä huloko önanga ihidöaka manga pake-pake o gurasi, daha önanga ihidöaka ngohino. Mata-mata o pake-pake gënanga ngohi tohingohama o uku magoronaika, hiädono idadi o hapi nënanga!”
25O Musa wanako o Harun wämal̄aika o Israel manyawa hokä o kuda o kurungaka de yapidili, hiädono önanga yodadi o gie-giete toönanga manga haturuika. 26Done ünanga womaokoino o tau madodoomu mangorana ma amoko mahimangoka deʼ wopoaka, ”O nagona iwihiböa ma Jouika kokiani yaino nenangino!” Done o Lewi ai hoana yaino iwihigilolitino o Musa, 27deʼ ünanga wätemo onangika, ”Ma Jou o Israeloka manga Jou Madutu winihi pareta ngini moi-moi la niahiatil̄e nia oworo deʼ nitagi niatilakuru o tau madodoomu nënanga, o ngorana ma amokoka nënanga de yaino hiädono o ngorana ma amoko mahomoaika de ikali niatoma niariadodoto niahoba-hobata deʼ nimakokukere.” 28O Lewi ai hoana yadiai o pareta gënanga deʼ mawange gënanga donehö yaribuhu hange yohonenge yatoma. 29O Musa wätemo o Lewi ai hoana manyawaika, ”O wange nënanga ngini tinïtingakoka niadiri nidadi ma imam iwï löleleani ma Jou de niätoma niangoha-ngohaka deʼ niariadodoto done ma Jou winihidöaka Ai barakati nginika.”
30Yarehino o Musa wätemo o Israelokaika gënanga, ”Ngini nidiaioka o baradoha ma amoko. Mä o öraha nënanga ngohi aha todöali ol̄okuil̄e gënanga la tïhimanga ma Jou, tanu ngohi tamake o apongo mangale niabaradoha.” 31Daha o Musa woikoli wïhimanga ma Jou deʼ wotemo, ”O nyawa geönanga yodiaioka o baradoha ma amoko. Onanga imädiai o gikiri o gurasi. 32#Mzm. 69:28; Him. 3:5 Tanu nömodeke nahi apongo toönanga manga baradoha; nako kowali, ahi romanga naehe o nyawa yowango-wango manga buku magoronaka.”
33Ma Jou wïbaluhu, ”Duga-duga o nyawa yobaradohaka Ngohino aha Taehe manga romanga o bukuoka gënanga. 34O öraha nanga noiki, deʼ nä ao önanga gënanga mangï Taheto-hetongoka ngonaika. Ahi malaekat aha wonituda, mä maöraha aha iböa o nyawa geonanga Tähukumu karana toönanga manga baradoha.”
35Daha ma Jou wädotagao o bodito o nyawa geonangika karana önanga iwipakisa o Harun wädiai o hapi gurasi madulada gënanga.
Currently Selected:
O KELUARAN 32: TLB
Highlight
Share
Compare
Copy
Want to have your highlights saved across all your devices? Sign up or sign in
