O KELUARAN 31
31
Ma Jou Madutu wä iriki o nyawa yododiai o Tau-tau deʼ ma pakakaha
(Kel. 35:30–36:1)
1Ma Jou wïtemo o Musaika, 2”Ngohi tï irikoka o Bezaleel o Uri aingohaka, o Hur ai danongo o Yehuda ai hoanino, 3deʼ Tihidöaka o ngongike unangika de Ahi kuaha. Unanga Tihi döaka o mangarati, o sawaro deʼ o kuata hagala irupa o manarama ma aluhu magoronaka: 4mangale idiai itä tatoroka iparalu o sawaro inoli yamo manarama de o gurasi o haaka deʼ o tabaga; 5mangale ihi gihoro o intan aha yahohonotoko; mangale ya gogarade o gota deʼ mangale hagala irupa o manarama ma aluhu mahomoa. 6O Oholiab, o Ahisamakh aingohaka o Dan ai hoanino Ngohi tï irikoka la wï riwo ünanga. Tahidöakoli o sawaro kabiahaua o tukang-tukang yososawaroika, hupaya önanga yodiai okia dika Tahi popareta. 7Ahi Tau-tau, o Jaji ma Peti deʼ madadamunu, mata-mata o Tau mapake-pake: 8enagënanga o meja de mapakakaha, o hilo mal̄ou o gurasi madutu de mapakakaha, o huhuba mangï o dupa yoduhu-duhku mangï. 9O huhuba mangï o huhuba ituhu-tuhuku deʼ hagala ma pakakaha, o akere mabak de mabuku, 10o Harun deʼ aingoha-ngohaka manga puji mapakeanga, kokiani yapake maöraha önanga yomanarama hokä ma imam, 11o upacara maminya, deʼ o dupa mabounu ihemo-hemoro mangale o Ngï i Tebi-tebini. Mata-mata gënanga kokiani önanga yadiai imadaene imoteke o hidumutu Tonihi döa-döakoka ngonaika.”
O Sabat o dodogumu mawange
12Ma Jou wihipareta o Musaika 13hupaya wahingahu o Israel manyawaika, ”Ihimulia o Sabat mawange, o wange Tohi totatapuoka hokä ohibatongo mawange. Mangale o wange gënanga kahiado-adonika idadi o hohininga nanga hidogoronaka ngini deʼ Ngohi, hupaya ngini nihiöriki Ngohi ma Jou, deʼ Ngohi tinihidadioka ngini Ahi nyawa mahirete. 14-15#Kel. 20:8-11, 23:12, 34:21, 35:2; Im. 23:3; Ul. 5:12-14 Ohibatongo mawange gënanga kokiani ngini niahoromati hokä o wange itebi-tebini. Ngini Tinihidöaka o wange butanga mangale nimanarama, mä o wange matumidi gënanga o wange ma amoko Tohitingaka mangale Ngohi. O nagona yahoromatiua, mä yomanarama mawangeoka gënanga kokiani yähukumu yahohonenge. 16O Israel manyawa kokiani ihimulia o wange gënanga o ngohaka de o danongo de manga ngohakuku hokä o jaji manonako. 17#Kel. 20:11 O wange gënanga ganga o hohininga moi itotatapu Ngohi de o Israel manyawa miahidogoronaka, karana Ngohi, ma Jou todiaioka o dihanga de o dunia o wange butanga magoronaka, deʼ o wange matumidoka Ngohi tomatogumu tomanarama deʼ tomahi batongo.”
18Ho de ipahaka wotemo-temo de o Musa o Sinai mal̄okuoka, ma Jou Madutu wohidöaka unangika obelaka hinoto ma helewo ma Jou Madutu wöduli-dulihoka hagala Ai tita.
Currently Selected:
O KELUARAN 31: TLB
Highlight
Share
Compare
Copy
Want to have your highlights saved across all your devices? Sign up or sign in
