O KELUARAN 30
30
Yodiai o huhuba mangï o dupa yoduhu-duhuku
(Kel. 37:25-28)
1Ma Jou wï temoli o Musaika, ”Nodiai o gahumu moi o huhuba mangï de o gota akasia o dupa yoduhu-duhuku mangï. 2O huhuba mangï gënanga madüku ipahagi iata; magurutu deʼ mangoata moi-moi o senti moruata de motoa, deʼ magurutil̄e o senti morihiwo. Malibuku iatö nodiai o totataduku idadi kamoi de mahuhuba mangï gënanga. 3Mal̄okuino, de magumurukino iatö deʼ matotataduku kokiani ihilape de o gurasi madutu deʼ mariwoto o gurasi ikilolitino. 4Niodiai o gogoli hinoto mariwoto matimiuku magumuruku hinotoika hupaya yatumungu magota madodowiti o huhuba mangï gënanga. 5Madodowiti gënanga kokiani idiai de o gota akasia deʼ ihilape de o gurasi. 6Nakelenga o huhuba mangï gënanga o ngöere maporetoka o Jaji ma Peti mahimangino, genangoka mangï aha Ngohi dede ngona homamake. 7O ngorumino ihigetongo maöraha o Harun waino mangale wohidiai o hilo, ünanga kokiani watuhuku o dupa mabounu i hemo-hemoro o huhuba mangï gënanga mal̄okuoka. 8O hali gënanga kokiani wadiaioli maöraha ünanga watuhuku o hilo o bimaoauku. O dupa ihihuba-huba gënanga kokiani idiai kahoko genangika o öraha magurutu. 9Uha nihihuba o huhuba mangï mal̄okuoka gënanga o dupa yöduhu-duhunu, o huhuba o aiwani ekola o huhuba ihidödöa-döakika; uhali nihituagi mal̄okuino o huhuba o angguru ma akere. 10O taongo moi mamoi o Harun kokiani wadiai o upacara watebini o huhuba mangï de madodagi niodohurero matotataduku iatö deʼ o aiwani o gigini ihihuba-huba ma awunu mangale o baradoha ma apongo. O hali gënanga kokiani idiai o taongo magetongo o öraha magurutu. O huhuba mangï gënanga kokiani ingodumu itebini deʼ nia tingaka mangale Ngohi.”
O soungu mangale ma Jou Ai Tau
11Ma Jou wïtemo o Musaika, 12”Maöraha niä sensus o Israel manyawa, o nau-nauru moi-moi kokiani yofangu Ngohino o duduhuhu matiwi mangale manga diri hupaya önanga yäkoronaua o bodito maöraha o sensus gënanga yadiai. 13#Kel. 38:25-26; Mat. 17:24 O nyawa moi-nyawa moi yäeto-etongoka o sensus gënanga magoronaka kokiani yofangu de o tiwi ma amoko ihitötantantu maragane imoteke Ahi Tau-tauoka hokä o bobatumu yodingakika mangale Ngohi. 14O nyawa moi-nyawa moi yäeto-etongoka o sensus gënanga magoronaka, enagënanga moi-moi o nau-nauru manga umuru o taongo monaokoka ekola iholoi, kokiani ihidöaka o bobatumu yödingakikaoka gënanga. 15O kaya manyawa yakunua kokiani yofangu iholoi deʼ o mihikini manyawa yakunua yofangu ikuranga maöraha önanga yofangu o duduhuhu matiwi mangale manga diri. 16Nial̄ë o tiwi gënanga o Israel manyawaika deʼ nihipake mangale o pupuji Ahi Tau-tau magoronaka. Mata-mata gënanga ganga o duduhuhu matiwi mangale toönanga manga diri, deʼ Ngohi salalu Tähininga mangale Tägoana önanga.”
O bak o tabaga
17Ma Jou wïtemo o Musaika, 18#Kel. 38:8 ”Nidiai o gahumumoi o bak o tabaga de mabukuil̄e mao tabaga. Nihigögere o bak gënanga o Tau-tau de o huhuba mangï mahidogorona, daha nioguheuku o akere. 19O akere gënanga mangale o Harun deʼ aingoha-ngohaka hupaya önanga yakunu yaihoro manga giama deʼ manga l̄ou, 20-21ihira de yöngohama o Tau-tau ekola yahebanga o huhuba mangï mangale yao o huhuba i tuhu-tuhku. Onanga kokiani yadiai gënanga hupaya Tätomaua. O datoro gënanga kokiani önanga ihingounu de toönanga manga difauku kahiado-adonika.”
O upacara maminya
22 #
Kel. 37:29
Ma Jou wïtemo o Musaika, 23”Nal̄ë o rampa-rampa duru maoa-oa, o mur i waro-warouku okilo butanga, o kilo hange o kayumanis, o kilo hange o ugaka mabounu i hemo-hemoro, deʼ o kilo butanga o gota teja. 24Mata-mata yatibanga imoteke odidibanga yapö pake-pake Ahi Tau-tauoka. Nihidogo o litere iata o zaitun maminya, 25deʼ nidiai o upacara maminya, yoganu hokä o minya maboyu-bounu. 26Niapake yaganu-ganuoka gënanga mangale ihiminya Ahi Tu-tau, o Jaji ma Peti, 27o meja deʼ mata-mata mapakakaha, o hilo mal̄ou deʼ mata-mata mapakakaha, o huhuba mangï o dupa yoduhu-duhuku mangï, 28o huhuba mangï mangale o huhuba i tuhu-tuhuku de hagala mapakakaha, deʼ o akere mabak de mabuku. 29De madodagi hoko gënanga kokiani ngona nodingakika okia honanga gënanga mangale Ngohi, hupaya ingodumu idadi itebini. Okiadika yakorona o huhuba mangï gënanga kokiani nihilapahi ma Jouika, deʼ o nagona dika yapeke aha yamake o bodito karana toenanga manga debini makuata. 30Näminya o Harun deʼ ai ngoha-ngohakö hupaya önanga yatabis yodadi ma imam mangale ihïleleani Ngohi. 31Nahetongo o Israel manyawaika madekana demagurutu o öraha o minya upacara gënanga itingakika mangale Ngohi. 32O minya gënanga yakunua yahituagi o nyawa biahauku. Uha nidiai o minya hokä hoko gënanga deʼ nia pake maganu ka genangoli. O minya gënanga itebini, deʼ kokiani niapulono hokä o baranga madebi-debini. 33O nyawa yododiai o minya hokä hoko gënanga, ekola koma imamua, de yapake yakunokaua yodadi o gegetongo Ahi umati.”
O dupa
34Ma Jou wïtemo o Musaika, ”Nal̄ë o rupa muruono naga o rampa-rampa imakoketero mangöe enagënanga o hilo o tigono, o jojongo makai, o rasamala matigono deʼ o dupa madutu. 35Nia pake mata-mata gënanga mangale nihidiai o dupa i ganu-ganuino mabounu ihemo-hemoro. Nihidogo o gahi mawaja hupaya o dupa gënanga hirahi o dupa madutu deʼ yakunu ipake mangale Ngohi. 36-37O hidoku moi o dupa gënanga kokiani yatutuku hiädono ialuhu. Nao gënanga Ahi Tau-tauika deʼ nohibarihi o Jaji ma Peti mahimangino. O dupa gënanga kokiani niapulono hokä o baranga madebi-debini yatingakika mangale Ngohi. Uha nidiai o dupa deʼ maganu deʼ masapuru hokä hoko genangoli mangale ngini mahirete. 38O nagona yodiai iböbou-bounu hokä hoko gënanga, yakunokaua yodadi o gegetongo Ahi umati.”
Currently Selected:
O KELUARAN 30: TLB
Highlight
Share
Compare
Copy
Want to have your highlights saved across all your devices? Sign up or sign in
