O KELUARAN 27
27
Yodiai o huhuba mangï
(Kel. 38:1-7)
1”Niodiai o huhuba mangï o gahumu moi de o gota akasia. Madüku ipahagi magurutu deʼ mangoata moi-moi o metere hinoto de o senti monaoko deʼ magurutil̄e o metere moi de o senti moruange. 2Malibuku yögetongo mal̄okuino kokiani niodiai o tataduku idadi kamoi de o huhuba mameja. Ingodumu kokiani ihilape deʼ o tabaga. 3Niodiai o bohoko, o sikop, o mangko, o garpu de o uku mangï. Mata-mata o pakakaha gënanga kokiani ihidiai deʼ o tabaga. 4Niodiai o dedeta o kawa o tabaga deʼ ihipakeika iata o gogoli mangale madodowiti magota malibuku iata matimino. 5Ma gurutil̄e madedeta o kawa gënanga yatogoronaino mahuhuba mameja magurutil̄e. Madedeta o kawa gënanga kokiani ihipalino mahuhuba mameja matimino. 6Niodiai hinoto madodowiti o gota akasia malape o tabaga, 7deʼ ihi ngohama magogoli-gogolioko mahuhuba mameja magumurukoko hinoto maöraha yadowiti o huhuba mameja gënanga. 8Niodiai o huhuba mameja gënanga de o aoto deʼ mapidaha magoronaka, imoteke demahirahi Tatatoroka Tonihi mato-matokoka ngonaika o l̄oku nënanga matubuoka.”
Ma Jou Ai Tau ma looa
(Kel. 38:9-20)
9”Niodiai o looa Ahi Tau magilolitino nihi bangi-bangi o hidete o ngöere o lenan ma aluhu. O koreharail̄e idaduoka, mahidete gënanga magurutu o metere moruata de iata, 10ihi tumungu o liate o tabaga monaoko, moi-moi de mahohol̄e o tabaga, deʼ malalakete inoli madudumungu o haaka. 11Niodiai hokä hokogenangoli o koremieuku idaduoka. 12O wange madumuniha idaduoka, o hidete gënanga magurutu o metere monaoko de hinoto, de o liate ngimoi de mahohol̄e ngimoi. 13O wange mahiwaroko idaduoka, naga de mangoranoka, magurutu o hidete genangö o metere monaoko de hinoto. 14-15Mahigili de manirakoka o ngorana gënanga kokiani ihipakeika o hidete, moi-moi magurutu o metere butanga de o senti mori butanga de maliate hange mahohol̄e hangeoka. 16Mangale mangorana kokiani nihi pake o ngorana madadatoko o lenan ma aluhu magurutu o metere hiwo de ihi diai de o wol mabihi-bihi, mawuwungu deʼ madoka-dokara, deʼ ihi poromu de o suji-suji. Mangale mangorana madadatoko gënanga kokiani niodiai o lite iata de mahohol̄e iata. 17Mata-mata o liate o looa gënanga magilolitino kokiani ihi kodohanga moi de moika de madudumungu o haaka; malalakete kokiani o haaka deʼ mahohol̄e o tabaga. 18O hidete o looa gënanga magilolitino magurutu o metere moruata de iata mangöata o metere monaoko de hinoto deʼ magurutil̄e o metere hinoto de o senti monaoko. Mahidete kokiani yadiai de o lenan mangöere ma aluhu de mahohol̄e de o tabaga. 19Ingodumu o pakakaha yapake-pake o Tau magoronaka, mata-mata o bebeloho mangale o Tau deʼ mangale mahidete kokiani yadiai de o tabaga.”
Madodagi ihi dailako o hilo
(Im. 24:1-4)
20”Nähuloko o Israel manyawa yoao o zaitun maminya madutu deʼ duru maoa-oa mangale o hilo Ahi Tau-tau magoronaka, hupaya yakunu yatuhuku deʼ iwango gila-gila. 21O Harun deʼ aingoha-ngohaka kokiani ihidailako o hilo gënanga o bobimaoa hiädono o hutu inohi Tongohi Ahi ngïoka, o ngöere inünuneuku maporetoka o Jaji ma Peti mahimangoka. O pareta gënanga kokiani yadiai kahiado-adonika o Israel manyawa deʼ manga ngohaka de manga danongo.”
Currently Selected:
O KELUARAN 27: TLB
Highlight
Share
Compare
Copy
Want to have your highlights saved across all your devices? Sign up or sign in
