O KELUARAN 26
26
Ma Jou Ai Tau
(Kel. 36:8-38)
1”Nidiai o Tau-tau mangale Ngohi de o dobiki ngimoi o ngöere o lenan ma aluhu, ihidiai de o wol mabihi-bihi mawuwüngu deʼ madoka-dokara. Nia suji o ngöere gënanga de o malaekat madulada. 2O dobiki moi-dobiki moi kokiani imatero maduduga, magurutu o metere ngimoi de hinoto deʼ mangöata o metere hinoto. 3Ma ngöere o dobiki motoa kokiani ihidohanga idadi o hidete moi, deʼ madobiki motoa mahomoa kokiani yadiai hokogenangoli. 4Niodiai madudumungu de o ngöere mabihi-bihi mahidete hinoto gënanga madatekino. 5Madudumungu moritoa o hidete yögetongo. 6Niodiai o lalakete gurasi moritoa, mangale ihidohanga o hidete gënanga hinoto hupaya yakunu idadi kamoi.
7Mangale matau gënanga makatu niodiai o dobiki ngimoi de moi o ngöere o kabingi magogo. 8O dobiki moi-dobiki moi kokiani imaketero maduduga, magurutu o metere ngimoi de hange deʼ mangoata o metere hinoto. 9O dobiki motoa kokiani ihidohanga idadi o hidete moi, deʼ o dobiki butanga mahomoa kokiani yadiai hoko genangoli. Madohanga mabutangaka kokiani yatupukoro hinoto hupaya yatamunu mahimangino. 10Niodiai odudumungu moritoa mahidete madodihiraka madatekino deʼ moritoa o dudumungu o hidete mahinotoka madatekino. 11Niodiai o lalakete moritoa o tabaga deʼ ihi laketika madudumungika gënanga hupaya o hidete hinoto gënanga yakunu i dadi kamoi o tau-tau makatu. 12Ma ngöere madobiki maboloi ganga mangale i hitamunu ma Tau-tau maporete. 13Ma ngöere mahou mangöata o senti moritoa ma Tau magurutu kokiani imal̄aika yatamunu ma Tau gënanga magumurukoko.
14Nidiai o dadamunu hinoto mangale ma Tau maporetino, moi o duba makai yadodokarika deʼ moioli de o aiwani makai ma aluhu.
15Niodiai matau majaro iriko-rikotil̄e de o gota akasia. 16Moi-moi majaro magurutu o metere iata deʼ mangoäta o senti mori butanga de butanga. 17Majaro yögetongo naga o bebeloho hinoto o habi moi, hiadono majaro-majaro gënanga yakunu imakodohanga moi de mahomoaika. 18Mangale ma Tau yohima-himangil̄e o koreharail̄e, niodiai o jaro monaoko, 19de mahohol̄e o haaka moruata, hinoto majaro yö getongo matimioka mangale mabebeloho hinoto. 20Mangale ma Tau yöhima-himanguku o koremieuku, niodiai o jaro monaoko, 21de mahohol̄e o haaka moruata, hinoto majaro yögetongo matimiuku. 22Mangale ma Tau maporetiha o wange madumuniha yohimangiha niodiai o jaro butanga 23deʼ o jaro hinoto mangale malibuku-malibuku. 24Ma jaro malibuku gënanga kokiani ihi dohanga mal̄ouika, i gila-gilail̄e hiädono daku mal̄okuil̄e. Ma jaro hinoto idödadadi malibuku kokiani idiai madodagi hoko gënanga. 25Hoʼ mata-mata naga o jaro tufange de mahohol̄e o haaka ngimoi de butanga, hinoto majaro yögetongo matimiuku.
26Niodiai mahita ngimoi de motoa o gota akasia, motoa mangale majaro ma Tau magumurukoko, 27motoa magumuruku mahomoaoko, deʼ motoahi ma Tau maporetino o wange madumuniha ihimangoka. 28Mahita ikokorona kokiani ihitabi magurutil̄e yatogoronaika majaro, mabahaka de mabahaika o Tau gënanga. 29Ma Tau majaro deʼ mahita gënanga kokiani ihilape de o gurasi. O gogoli-gogoli layatumungu o gota-o gota gënanga kokiani ihidiai de o gurasi. 30Nihigoko o Tau gënanga imoteke de mahirahi Tatatoroka Tonihidumu-dumutoka ngonaika ol̄oku nënanga matubuoka.
31Niodiai o gahumu moi o ngorana madadatoko de o lenan ma aluhu ihidiai de o wol mabihi-bihi, mawuwungu deʼ madoka-dokara. Niasuji o ngöere gënanga de o malaekat madulada. 32Nia nuneuku o ngorana madadatoko gënanga o liate iatuku o gota akasia ihilape de o gurasi o gahumu iata de malalakete ogurasi deʼ ihitabi mahohol̄e o haaka iata mal̄okuika. 33#Ibr. 6:19, 9:3-5 Nihigogere o ngöere gënanga o lalakete itatatorika matimiuku o Tau makatuoka. O ngöere gënanga maporetoka kokiani yakelenga o Jaji ma Peti madol̄a o helewo hinoto gënanga. O ngöere gënanga ihitingaka o Ngï i Tebi-tebini de o Ngï Duru i Tebi-tebini. 34Niogelenga o Jaji ma Peti madadamunu mapeti mal̄okuku. 35O huhuba mameja nihigogere o Ngï duru i Tebi-tebini maporetoka o koremieuku idaduoka, deʼ mahilo mal̄ou o koremieuku i daduoka o Tau gënanga magoronaka.
36Niodiai o Tau mangorana madadatoko de o lenan mangöere ma aluhu ihidiai de o wol mabihi-bihi, mawuwungu deʼ madoka-dokara, ihiporomu de o suji-suji. 37Mangale mangorana madadatoko gënanga kokiani niodiai motoa o liate de o gota o akasia ihilape de o gurasi deʼ ihi kodohanga de o lalakete o gurasi motoa. Niodiai o gahumu motoa o hohol̄e de o tabaga mangale oliate-liate gënanga.”
Currently Selected:
O KELUARAN 26: TLB
Highlight
Share
Compare
Copy
Want to have your highlights saved across all your devices? Sign up or sign in
