O KELUARAN 28
28
Ma imam ai pakeanga yodiai
(Kel. 39:1-7)
1”Nïahoko o Harun ani riaka de inoli aingoha-ngohaka o Nadab, o Abihu, o Eleazar deʼ o Itamar, deʼ nätingaka önanga hokä ma imam hupaya yakunu ihileleani Ngohi. 2Nidiai o imam mapakeanga mangale o Harun, hupaya ünanga iwimake de ai horomati. 3Nä ahoko mata-mata youri-uriti Tahi döa-döakoka o sawaro. Nähuloko önanga yodiai o Harun ai pakeanga hupaya ünanga yakunu hïtingaka hokä ma imam mangale wohïleleani Ngohi. 4Nähuloko önanga yodiaiö o alu madadamunu, o kutang, o juba, o kameja i suji-suji, o häeke madadamunu de o gorona maninikutu. O imam mapakeanga gënanga kokiani önanga yodiai mangale o Harun ani riaka deʼ aingoha-ngohaka hokä ma imam hupaya yakunu ihïleleani Ngohi. 5-6O pakeanga gënanga kokiani önanga yadiai de o wol mabihi-bihi, mawü wuwungu deʼ madoka-dokara, o lawe o gurasi deʼ o lenan ma aluhu. De mahomoa gënanga o kutang kokiani yaporomu de o suji-suji. 7O beleka magumini hinoto o kutang maliliko kokiani ihiduguritika madatekika. 8O gahumu moi o gorona maninikutu ihidodiai de o lawe ma aluhu mangöere de malawe kaimatero kokiani ihiduguriti makutangika gënanga hupaya idadi kaohidoku moi. 9-12Nal̄ë hinoto o helewo delima. Nïlingiri womatengo okianaga wosawaro wododiai de o gurasi wososawaro mangale wagarade o helewoika gënanga o Yakub aingoha-ngohaka yangimoi de yahinoto manga roma-romanga imoteke manga umurudaku de yauku, o romanga butanga o helewo yogetongo. Daha hinoto o helewo delima gënanga kokiani ihipake o riwoto o gurasi magoronaka deʼ yogelenga o kutang mabeleka maguminika hokä o nonako o hohininga o Israel mahoana ngimoi de hinoto. De madodagi hoko gënanga o Harun wao toönanga manga romanga ai belekaoka, hiädono Ngohi, ma Jou, salalu Tä hininga onangika. 13Mahomoa o riwoto gurasi hinoto gënanga 14kokiani yadiaiö hinoto o rante gurasi madutu ihi rugi-rugihino hokä o gumini, mangale ihipakemariwoto gurasika gënanga.”
O alu madadamunu yodiai
(Kel. 39:8-21)
15”Niwidiai ma Imam wo Amo-amoko o gahumu moi o alu madadamunu la wapake maöraha ünanga womau wohi öriki ma Jou Madutu Ai mau. Okia naga ihidodiai deʼ ma alu madadamunu masuji gënanga kokiani imatero de okianaga ihidodiai de makutang masuji. 16Madüku ipahagi iata deʼ itupukoro hinoto, magurutu de mangoäta moi-moi o senti monaoko de hinoto. 17Nihi pake o datoro iata o helewo o paramata ma alu madadamunika gënanga. Ma datoro madodihiraka o helewo delima, topas de o baiduri sepah. 18Madatoro hinotoka o helewo zamrud, o helewo nilam deʼ o intan. 19Madatoro mahangeoka o helewo lazuardi, o helewo akik deʼ o helewo kecubung. 20Madatoro maiatoka o helewo pirus, o yakut deʼ o ratna cempaka. O paramata ngimoi de hinoto gënanga kokiani yaliko de o gurasi. 21O paramata yögetongo kokiani yogarade moi o romanga o Yakub aingohaka yangimoi de yahinoto hokä o nonako o hohininga o Israeloka manga hoana. 22Nidiai mangale o alu madadamunu gënanga hinoto o rante gurasi madutu i hirugihi hokä o gumini. 23Niodiaiö hinoto o gogoli o gurasi deʼ ihi pake mabarene hinotoika il̄oku-l̄oku ma alu madadamunu gënanga 24daha ihi ngohama o rante gurasi hinoto gënanga magogoli kangano magoronaoko. 25Hinotö mabarene mahomoa o rante gënanga kokiani ihi liko mariwoto hinotoika, hupaya o alu madadamunu gënanga yakunu ihidohanga de mahimangino o efod mabeleka magumini. 26Niodiai o gogoli o gurasi hinotoli, daha ihi pake ma alu madadamunika gënanga mabarene itimi-timi doka magoronaka yakokorona o kutang. 27Genanga de iböto, nidiai o gogoli o gurasi hinotoli deʼ ihipake mahimangino hinoto makutang mabeleka magumini ihitigi-tigika maguguriti madohanga hatoli daukino, mal̄okuil̄e o gorona maninikutu ihidiai de o lawe ma aluhu. 28O alu madadamunu magogoli kokiani ihi kodohanga de magumini mabihi-bihi makutang magogolika hupaya o alu madadamunu gënanga kahirahi naga o gorona maninikutu mal̄okuil̄e deʼ ihoheua.
29Maöraha o Harun wowohama o ngï itebi-tebinika, ünanga kokiani wao o Israeloka manga hoana maroma-romanga yagogaradeika ai alu madadamunika, hupaya Ngohi ma Jou salalu Tähininga Ahi umatika. 30#Bil. 27:21; Ezr. 2:63; Neh. 7:65 Niogelenga o Urim deʼ o Tumim o alu madadamunu gënanga magoronaka mangale o Harun wapake nako ünanga wohihimanga Ngohi. Maöraha-maöraha hoko gënanga ünanga kiani salalu wa pake o alu madadamunu, hupaya ünanga yakunu wohiöriki Ahi mau mangale o umati o Israeloka.”
Yodiai o pakeanga mahomoa mangale o imam-imam
(Kel. 39:22-31)
31”O juba yapö pake-pake makutang mal̄okuino kokiani ingodumu yadiai de o wol mabihi-bihi. 32Matomara mapidaha yakuata de o pita ihirugi-rugihino hupaya igapangua ikakihi. 33-34Yakiloliti madateke matimino kokiani yodiai o poromu marupa o delima mahohoko de o wol mabihi-bihi, mawüwuwungu deʼ madoka-dokara, ihikokotoaka de maguguru o gurasi. 35O juba gënanga kokiani o Harun wapake nako ünanga womanarama hokä ma imam. Maöraha ünanga waino Ahi himangino o Ngï iTebi-tebinoka ekola wamal̄a o ngï gënanga, aha yögihene o guguru gënanga mailingi, hupaya ünanga uha wohonenge.
36Nidiai moi o poromu gurasi madutu deʼ nio garade o demo-o demo ihitingaka mangale ma Jou. 37Nialiko gënanga o haëke madadamunika de o gumini mabihi-bihi. 38O poromu o gurasi gënanga kokiani o Harun wohïpake ai bionoko hupaya Ngohi, ma Jou, Tomau Tatarima mata-mata o huhuba o Israel manyawa yoao-ao Ngohino, ngarokä yoao o huhuba gënanga magoronaka önanga yadiaioka o howono.
39O Harun ai kameja kokiani ihidiai de o lenan ma aluhu. Ni diaiö o gahumu moi o haëke madadamunu de o lenan ma aluhu deʼ o gorona maninikutu yasuji-sujika.
40Niadiai o kameja, ogorona maninikutu deʼ o haëke madadamunu mangale o Harun aingoha-ngohaka hupaya önanga yämake de manga horomati. 41Niahipake o pakeanga gënanga o Harunika ani riaka deʼ aingoha-ngohaka. Niä minya önanga de o zaitun maminya; deʼ gënanga önanga yätabis deʼ yätingaka hokä ma imam la ihïleleani Ngohi. 42Daha niädiai mangale önanga o haluara mabobolulu de o ngöere o lenan magurutuku manga goronaino hiädono manga gaonuku la yatamunu manga röehe mahidokui patu-patutua yamake. 43O haluara gënanga kokiani salalu önanga yapake maöraha yowohama Ahi tau-tau magoronaika ekola imahitigi o huhuba mangïika mangale yadiai o pupuji hokä ma imam o Ngï i Tebi-tebinoka hupaya önanga yohonengua karana yamake manga roëhe mahidoku i patu-patutua yamake. O datoro gënanga hirahi imadadi mangale o Harun de aingohaka de ai danongo.”
Currently Selected:
O KELUARAN 28: TLB
Highlight
Share
Compare
Copy
Want to have your highlights saved across all your devices? Sign up or sign in
