O KELUARAN 25
25
O huhuba mangale ma Jou Ai Tau
(Kel. 35:4-9)
1Ma Jou wïtemo o Musaika, 2”Nähuloko o Israel manyawa yoao o huhuba Ngohino. Onagona manga hininga igaraki, kokiani yoao o huhuba, 3marupa: o gurasi, o haaka deʼ o tabaga; 4o ngöere o lenan ma aluhu, o ngöere o wol mabihi-bihi, mawüwungu deʼ madoka-dokara o ngöere o kabingi magogo, 5o duba manauru makai yadodokarika, o aiwani makai ma aluhu, o gota akasia, 6o hilo maminya, o upacara maminya marampa-rampa de mangale o dupa mabou-bounu, 7rupa-rupa o intan deʼ o folori mangale ihiporomu ma Imam wo Lamo-amoko ai kutanga deʼ ai alu mangunungu madadamunu. 8Nähuloko o Israeloka gënanga yodiai o tau o gahumu moi mangale Ngohi, hupaya Ngohi yakunu togogere toönanga manga hidogoronaka. 9O tau deʼ mapakakaha kokiani önanga yadiai imoteke mahirahi Tatatoroka aha Tonihimatoko ngonaika.”
Yodiai o jaji ma Peti
(Kel. 37:1-9)
10”Nidiai o peti o gahumu moi magota o akasia magurutu o senti o ratuhu moi de ngimoi, mangöata deʼ magurutil̄e moi-moi o senti mori butanga de butanga. 11Nihilape magoronaka deʼ maporetino de o gurasi madutu deʼ niodiai mariwoto o gurasi. 12Mangale magota madodowiti, niodiai o gogoli o gurasi iata deʼ nihilaketika mal̄ouika iatö, o gogoli hinoto magumuruku yögetongo. 13Niodiaiö madodowiti magota o akasia deʼ nihilape de o o gurasi. 14Daha nihingohama madodowiti o gota gënanga mapeti magogolioko gënanga magumurukoko yögetongo. 15Madodowiti o gota gënanga kokiani kahirahi naga magogoli-gogolioka gënanga, deʼ yakunua ihihupu. 16Daha o peti magoronaka gënanga kokiani ngona nakelengauku o helewo hinoto deʼ o tita-o tita aha Tohi döa-döaka ngonaika.
17 #
Ibr. 9:5
Niodiai opeti gënanga madadamunu o gurasi madutu, magurutu o senti o ratuhu moi de ngimoi deʼ mangöata o senti mori butanga de butanga. 18Nidiai hinoto o malaekat o gurasi yatütutukoka, 19o peti gënanga mabarene yogetongo moi. Hinoto o malaekat gënanga kokiani idadi kamoi deʼ madadamunu, 20deʼ niadiai imarihimangino deʼ magahuhu yoderefeuku o peti gënanga mal̄okuku. 21Nionoauku o helewo hinoto o peti gënanga magoronauku deʼ niödiai madadamunu mal̄okuku. 22Genangoka mangï Ngohi aha homamake dede ngona, deʼ madadamunu mal̄okuoka, o malaekat hinoto gënanga mahidogoronaka, Ngohi aha tohidöaka hagala Ahi tita o Israel manyawaika.”
O meja mangale o roti ihidö dodiaiukuoka
(Kel. 37:10-16)
23”Nidiai o gahumu moi o meja de o gota akasia magurutu o senti moritufange de tufange mangöata o senti moruata de iata, deʼ magurutil̄e o senti moributanga de butanga. 24Nihilape de o gurasi madutu deʼ niariwotino de o gurasi madatekino yakilolitino. 25Niodiai mameja madateke mangöatika o senti tumidi de mahononga deʼ niabatingino de o gurasi madateke magilolitino gënanga. 26Nio diai o gogoli o gurasi o gahumu iata deʼ nihilaketika gënanga malibuku iatika mal̄ouika imahi tigi-tigika madatekika. 27O gogoli gënanga mangale yatumungu magota madodowiti, hupaya o meja gënanga yakunu yadowiti. 28Magota madodowiti gënanga kokiani yadiai de o gota akasia deʼ ihilape de o gurasi. 29Nidiai o dodai-dodai, o udo-udomo, o kendi deʼ o mangko-mangko mangale o huhuba o angguru mateongo. Mata-mata o meja gënanga mapakakaha kokiani yadiai de o gurasi madutu. 30#Im. 24:5-8 O meja gënanga kokiani yakelenga o Jaji ma Peti mahimangoka, deʼ o meja mal̄okuoka gënanga kokiani salalu i sadia o roti yadodiaiukuoka.”
Yodiai o hilo mal̄ou
(Kel. 37:17-24)
31”Nidiai o hilo mal̄ou de o gurasi madutu. Mabuku deʼ majojö kokiani yadiai de o gurasi itütutukoka; o bunga-bunga ihipoporomu, maboro deʼ maboro mahahawo kokiani idadi moi de mabuku de majojö. 32Majojöika kokiani niodiai majaga butanga, hange majaga magumuruku yögetongo. 33Majaga yögetongo kokiani niodiai o poromu marupa o niara mahuri o gahumu hange maboro deʼ maboro mahahawo. 34Majojöika kokiani niodiai o poromu marupa o niara mahuri o gahumu iata maboro deʼ maboro mahahawo. 35Majaga mahabi yögetongo gënanga matimiuku kokiani niodiai moi o bunga maboro. 36Ingodumu o hilo mal̄ou gënanga deʼ mabunga maboro de majaga-jaga kokiani niadiai de o gurasi madutu itü tutukoka, o dobiki moi. 37O hilo mal̄ouoka gënanga niodiai o hilo o gahumu tumidi deʼ nihigogere hoko gënanga marupa hiädono madararono iruba mahimangika. 38Nidiai o pakakaha mangale ihi tebi-tebini o hilo mahubu deʼ mabobilanguö de o gurasi madutu. 39Niapake o gurasi o kilo moruange de motoa o gurasi madutu hupaya yadiai o hilo mal̄ou gënanga de hagala toënanga mapakakaha. 40#Kis. 7:44; Ibr. 8:5 Nogoana hupaya mahilo mal̄ou gënanga yadiai imoteke madüku tonihi mato-matokoka ngonaika ol̄oku nënanga matubuoka.”
Currently Selected:
O KELUARAN 25: TLB
Highlight
Share
Compare
Copy
Want to have your highlights saved across all your devices? Sign up or sign in
