O KELUARAN 17
17
O akere o helewo ma amo-amokino
(Bil. 20:1-13)
1 #
Bil. 20:2-13
De ipaha o Israel manyawa yongodumu yamal̄a o Sin matonaka ikokakaha deʼ imatotagali o ngï moioka de o ngï mahomoaikali hokä sarakia ma Jou wähipareta. O öraha moiuku önanga imä tau o Rafidim matonakoka, mägenangoka koiwa o akere ya oke-okere. 2Daha önanga yotaiana o Musaika deʼ iwitemo, ”Nomihi döaka o akere mia oke-okere.” O Musa wohaluhu, ”Yadodoa ho ngini nitaiana deʼ niwitaili ma Jou?”
3Mä hagala o nyawa gënanga duru manga kiriti madudungu deʼ önanga itogu-togumua yotaiana o Musaika. Onanga yato, ”Ya dodoa ho ngona nomï ao ngomi o Mesir mabereraka demi hupu? Hupaya ngomi, tongomi mia ngoha-ngohaka deʼ tongomi mia aiwani o gigini o kiriti madudungu mihihonenge?”
4Done o Musa womahi böaka ma Jouika, wato, ”Okia kokiani ngohi todiai hagala o nyawaika nënanga? Namake, önanga yomau ihikaweli ngohi de o helewo.”
5Ma Jou wïtemo o Musaika, ”Nä ahoko o tutuda yamuruono naga deʼ nomädagi nimakomoteke dede önanga nia hihira o nyawa geonanga. Nao oli o diki-diki napöpake-pake o Nil ma Ngairi nohigö goha-gohara. 6Ngohi aha toma okoino ani himangoka moi o helewo mapako-pako ma l̄okuoka o Sinai mal̄okuoka. Nagöhara o helewo gënanga, done o akere aha ihupu hiädono hagala o nyawa gënanga yakunu yokere.” O Musa wadiai hoko gënanga yahakihi o Israel manyawa manga tutuda-tutuda.
7O ngï gënanga ihi romanga o Masa karana genangoka mangï o Israel manyawa iwitaili ma Jou maöraha önanga yoleha, ”Boteka ma Jou wonädodiawo ngone ekola kowali?” O ngï genangö ihiromanga o Meriba karana genangoka mangï o Israel manyawa yotaiana.
O parangi de o Amalek manyawa
8De ipaha o Amalek manyawa yoboa deʼ yäparangi o Israel manyawa o Rafidim matonakoka. 9O Musa wïtemo o Yosuaika, ”Näiriki yamuruono naga la yäparangi o Amalek manyawa. Yarehe ngohi aha tomaokoino ol̄oku matubuoka tomahi jöino o diki-diki ma Jou wohihulo-huloko tomä gao.” 10O Yosua wadiai okia o Musa wihipopareta unangika. Unanga woiki wäparangi o Amalek manyawa mä o Musa, o Harun deʼ o Hur yadoa o l̄oku hiädono matubuil̄e. 11Hoko gënanga madekana o Musa wagorakil̄e ai giama, o Israel manyawa youtumu. Mänako o Musa wohiguti ai giama, o Amalek manyawa youtumu. 12Maöraha o Musa iwiboleoka, o Harun deʼ o Hur yal̄ë o gahumu moi o helewo hupaya o Musa yakunu wogogeruku; o Harun deʼ o Hur ima okoino o Musa ai higiloka deʼ ai nirakoka hupaya yatikil̄e hiädono o wange itumunu. 13Mabaha o Yosua wahohihangoka o Amalek manyawa.
14 #
Ul. 25:17-19; 1Sam. 15:2-9 Ma Jou wïtemo o Musaika, ”Natulihi mangale o utumu nënanga hupaya kahirahi niohininga. Nahetongo o Yusakika Ngohi aha täbinaha o Amalek manyawa.” 15Daha o Musa wohigoko o gahumu moi o huhuba mangï deʼ wohi romanga ”Ma Jou ganga ahi Paji-paji”. 16O Musa wato, ”Nia sö niakokurutil̄e ma Jou Ai paji-paji! Ma Jou woparangi wälawani o Amalek manyawa kahi ado-adonika!”
Currently Selected:
O KELUARAN 17: TLB
Highlight
Share
Compare
Copy
Want to have your highlights saved across all your devices? Sign up or sign in
